ބާރ ކައުންސިލުން، ގާނޫނީ ވަކީލުންނަށް ދިމާވާ ގޮންޖެހުންތައް ދެނެގަތުމަށް ސިލްސިލާ ފޯރަމެއް ފަށައިފި
މިއީ ސިލްސިލާކޮށް ކުރިއަށްގެންދާ ފޯރަމެއް
ބާރ ކައުންސިލުންގެ ފޯރަމް
ދިވެހިރާއްޖޭގެ ބާރ ކައުންސިލުން އިންތިޒާމްކޮށްގެން، މަދަނީ އިޖުރާއަތުގެ ގާނޫނާއި ހެތްކާބެހޭ ގާނޫނު ތަންފީޒުކުރުމުގައި ގާނޫނީ ވަކީލުންނަށް ދިމާވާ ގޮންޖެހުންތަކާއި ހުރި ހުރަސްތައް ދެނެގަތުމަށް ސިލްސިލާ ފޯރަމެއް ފަށައިފިއެވެ.
ބުދަ ދުވަހު ''ބާރ ކައުންސިލް ފޯރަމް-7'' ގެ ނަމުގައި ކުރިއަށް ގެންދެވުނު ފޯރަމްގައި މައިގަނޑު ގޮތެއްގައި މަޝްވަރާކޮށްފައިވަނީ މަދަނީ އިޖުރާއަތާ ގުޅޭގޮތުންނެވެ.
ގާނޫނީ ވަކީލުންނާއި މި ދާއިރާގެ ފަންނުވެރިން ބައިވެރިވާ މި ސިލްސިލާ ފޯރަމްތަކުގެ ޒަރީއާއިން، ގާނޫނީ ދާއިރާގައި ހަރަކާތްތެރިވާ ފަރާތްތަކަށް މި ގާނޫނުތަކާ ގުޅިގެން ދިމާވާ ގޮންޖެހުންތަކާއި، ކަންބޮޑުވުންތަކާ ގުޅޭގޮތުން މަޝްވަރާކުރުމަށް ޕްލެޓްފޯމެއް ގާއިމްކުރެވިގެންދާނެއެވެ. މެއި މަހާއި ޖޫން މަހަށް ބަހާލައިގެން، ކޮންމެ ދެ ހަފުތާއިން ބޭއްވުމަށް ހަމަޖެހިފައިވާ ފޯރަމްތަކުގައި ގާނޫނީ ދާއިރާގައި މަސައްކަތްކުރާ ގިނަ ފަރާތްތައް އެއް ތަނަކުން ބައްދަލުވެ، މި ގާނޫނުތަކުގައި ހުރި މައްސަލަތައް ދެނެގަނެވި ޓެބިއުލޭޓް ކުރެވިގެންދާނެއެވެ.
މެއި 25-24 އަދި 08-07 ޖޫންގައި މި ސިލްސިލާގެ ދަށުން ބާއްވާ ފޯރަމްތައް އަމާޒުކުރެވިފައިވަނީ މަދަނީ އިޖުރާއަތާ ގުޅޭގޮތުން މަޝްވަރާކުރުމަށެވެ. އަދި 12 ޖޫން 2023ން ފެށިގެން 15 ޖޫން 2023އާ ހަމައަށް ކުރިއަށްގެންދެވޭ ފޯރަމް ޚާއްސަކުރެވިފައި ވަނީ ހެތްކާބެހޭ ގާނޫނަށެވެ.
މީގެ އިތުރުން، 07 ޖޫން 2023 އަދި 11-15 ޖޫން 2023ގައި ފޯރަމް ކުރިއަށްގެންދިއުމަށް ނިންމާފައިވާކަމަށް ބާރ ކައުންސިލުން ބުނެއެވެ.
ގާނޫނީ ފަންނު ރެގިއުލޭޓުކޮށް، ގާނޫނީ ވަކީލުންގެ ކިބައިގައި ކޮންމެހެންވެސް ހުންނަންޖެހޭ ގާބިލުކަމާއި އަޚުލާގީ މިންގަނޑުތައް ކުރިއަރުވައި، ގާނޫނީ ވަކީލުންނަށް، އެ ފަރާތްތަކުގެ މުވައްކިލުންނާއި އާއްމުންނަށް މިހާރަށްވުރެ ރަނގަޅަށް ޚިދުމަތްކުރުމުގެ ފުރުސަތު ފަހިކޮށްދީ، ރާއްޖޭގައި އަދުލު އިންސާފު ގާއިމުކުރުމުގެ ފުރުސަތު މިހާރަށްވުރެ ބޮޑަށް ފަހިކޮށްދިނުމަކީ އެ ކައުންސިލުގެ އެންމެ މުހިއްމު އެއް އަމާޒެވެ. އަދި މި އަމާޒަށް ވާސިލުވުމަށްޓަކައި، މި ފަންނުގައި މަސައްކަތްކުރާ ފަރާތްތަކަށް ދިމާވާ އުނދަގޫތަކާއި ގޮންޖެހުންތަކުގެ އަޑުއަހައި، ހުރި ކަންބޮޑުވުންތައް ވީހާވެސް ބޮޑަށް ބަލައި، ހައްލުކުރުމަކީ މި ފަދަ ފޯރަމްތަކުގެ ޒަރީއާއިން ބާރ ކައުންސިލުން ހާސިލްކުރަން ބޭނުންވާ އެންމެ ބޮޑު އެއް ކަންތަކެވެ.
