ގދ, ގއ އަދި ފ.އަތޮޅު ރަށްތަކުގެ ސްކޫލުތަކުގައި ތަރައްގީގެ ގިނަ މަޝްރޫއުތައް ކުރިއަށްދޭ: ސަރުކާރު
ބައެއް މަޝްރޫއުތައް ނިމި ދަރިވަރުންނަށް އެކަމުގެ ފައިދާވޭ
ގދ, ގއ އަދި ފ.އަތޮޅު ރަށްތަކުގެ ސްކޫލުތަކުގައި ތަރައްގީގެ ގިނަ މަޝްރޫއުތައް ކުރިއަށްދޭ: ސަރުކާރު
ގދ, ގއ އަދި ފ.އަތޮޅު ރަށްތަކުގެ ސްކޫލުތަކުން ފޯރުކޮށްދޭ ތައުލީމީ ނިޒާމު އިތުރަށް ހަރުދަނާ ކުރުމުގެ ގޮތުން ތަރައްގީގެ ގިނަ މަޝްރޫއުތައް ކުރިއަށް ގެންދާކަން ސަރުކާރުން ހާމަކޮށްފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ ރާއްޖޭގެ ހުރިހާ ސްކޫލުތަކެއްގައި ކުރިއަށް ގެންދާ ތަރައްގީގެ މަޝްރޫއުތަކަށް އަލިއަޅުއްވާލައްވައި މައުލޫމާތު ހިއްސާކޮށްދެއްވާފައެވެ. އަދި ގދ, ގއ އަދި ފ.އަތޮޅު ރަށްތަކުގެ ސްކޫލުތައް ތަރައްގީ ކުރުމުގެ މަޝްރޫއުތައް ކުރިއަށްދާ ކަމަށާއި، ބައެއް މަޝްރޫއުތައް ނިމި ދަރިވަރުންނަށް އެކަމުގެ ފައިދާވާ ކަމަށް މިއުވާން ވިދާޅުވިއެވެ.
ގދ.ރަށްތަކުގެ ސްކޫލުތަކުގައި ކުރިއަށް ގެންދާ މަޝްރޫއުތަކަށް ބަލާއިރު، ތިނަދޫ އަބޫބަކުރު ސްކޫލުގެ ސެން ކްލާސްރޫމް، ގދ.އަތޮޅު ތައުލީމީ މަރުކަޒުގެ ފާހަނާބަރި ހެދުން، ހޯނޑެއްދޫ ސްކޫލުގެ 2 ކްލާސްރޫމް، ލެބް އައިސީޓީ އިމާރާތް، ނަޑެއްލާ 02 ކްލާސްރޫމް އަދި ސްޓާފްރޫމް އިމާރާތް ކުރުން، ރަތަފަންދޫ ސްކޫލުގެ 06 ކްލާސްރޫމްގެ މަސައްކަތް ކުރިއަށްދާ ކަމަށެވެ. އަދި ފިޔޯރީ ސްކޫލުގެ 06 ކްލާސް އިމާރާތް ވަނީ ނިމިފައެވެ. ގދ. ފަރެސްމާތޮޑާ ސްކޫލް މަލްޓިޕާޕަސް ހޯލް އަދި 05 ކްލާސްރޫމް ރޭވިފައިވާއިރު، ފަރެސްމާތޮޑާ ސްކޫލުގެ އަޕްގްރޭޑްކުރުމުގެ މަސައްކަތް ނިމިފައިވާ ކަމަށް މިއުވާން ވިދާޅުވިއެވެ.
މިއުވާން ވިދާޅުވީ ގައްދޫ ސްކޫލުގެ ލެބޯރެޓަރީ އަޕްގްރޭޑްކުރުމުގެ މަސައްކަތް ނިމި، މަލްޓި ޕާޕަސް ހޯލާއި އޮފީސް އިމާރާތް ކުރުމަށް ނިންމާފައިވާ ކަމަށެވެ. ވާދޫ ސްކޫލުގެ އެޑްމިން އިމާރާތް، ވާދޫ ޖަމާލުއްދީން ސްކޫލުގެ 4 ކްލާސްރޫމް އިމާރާތް އަދި މަލްޓިޕަރޕަސް ހޯލް މަސައްކަތް ކުރުމަށް ނިންމާފައިވާ ކަމަށެވެ.
މީގެ އިތުރުން މިއުވާން ވިދާޅުވީ ގއ.އަތޮޅު ރަށްތަކުގެ ސްކޫލުތަކުގައި ކުރިއަށް ގެންދިއުމަށް ނިންމާފައިވާ ގިނަ މަޝްރޫއުތައް ކުރިއަށްދާ ކަމަށެވެ. އެގޮތުން ކޮލަމާފުށި ގއ.އަތޮޅު މަދަރުސާ މަލްޓި ޕާޕަސް ހޯލް، ދެއްވަދޫ ސްކޫލުގެ ސުލްތާން މުހައްމަދު ސްކޫލު 2 ބުރި އިމާރާތް ނިމިފައިވާ ކަމަށް މިއުވާން ވިދާޅުވިއެވެ. އަދި ގއ. ކަނޑުހުޅުދޫ ސްކޫލު މަލްޓިޕާޕަސް ހޯލް މަސައްކަތް ދަނީ ކުރަމުންނެވެ.
މިއުވާން ވިދާޅުވީ ގެމަނަފުށި ސްކޫލު 10 ކްލާސްރޫމް ނިމިފައިވާ ކަމަށާއި، ކޮނޑޭގެ 04 ކްލާސްރޫމްގެ މަސައްކަތް، ދާންދޫ ސްކޫލުގެ މަލްޓި ޕާޕަސްހޯލް، ނިލަންދޫ ސްކޫލުގެ 4 ކްލާސްރޫމްގެ މަސައްކަތް ވެސް ނިމިފައިވާ ކަމަށެވެ. ވިލިނގިލި 12 ކްލާސްރޫމް ތަރައްގީކުރާއިރު، ގއ.އަތޮޅު ތައުލީމީ މަރުކަޒުގެ 12 ކްލާސްރޫމް އިމާރާތުގެ މަސައްކަތް ވެސް ނިމިފައިވާ ކަމަށް މިއުވާން ވިދާޅުވިއެވެ.
ފ.އަތޮޅު ރަށްތަކުގެ ސްކޫލުތަކަށް އިޝާރާތް ކުރައްވައި މިއުވާން ވިދާޅުވީ ނިލަންދޫގައި ފ.އަތޮޅު ތައުލީމީ މަރުކަޒުގެ 8 ކްލާސް، 2 ލެބް އަދި މަލްޓި ޕާޕަސް ހޯލްގެ މަސައްކަތް ނިމިފައިވާ ކަމަށެވެ. އަދި ވިދާޅުވީ ފީއަލީ ސްކޫލުގެ ސައިންސް ލެބްގެ މަސައްކަތާއި ބިލެއްދޫ ސްކޫލުގެ ސައިންސް ލެބް އަދި މަލްޓި ޕާޕަސް ހޯލްގެ މަސައްކަަތް ނިމިފައިވާ ކަމަށެވެ.
