ކޭ ޕާކު މައްސަލަ: ގުޅުން ހުރި ބައެއް ތަންތަން ބަލާ ފާސްކުރަނީ
އެ މަސައްކަތް ކުރިއަށްދާ ގޮތުގެ އިތުރު އެއްވެސް ތަފްސީލެއް ފުލުހުން ހާމައެއް ނުކުރޭ
ހަންބޯ މޯލްޑިވްސް ދެ ހިއްސާދާރުން، (ކ) މައި ހިއްސާދާރު ޖިން ޝީ ހޫ، (ވ) 5 އިންސައްތައިގެ ހިއްސާދާރު މަމްދޫހު
ހުޅުމާލޭގައި ތަރައްގީކުރަމުން ދާ ކޭ ޕާކު ފްލެޓުތައް ދޭނެ ކަމަށް ބުނެ އޮޅުވާލައިގެން ފައިސާ ހޯދާފައިވާ ކަމަށް ތުހުމަތު ކުރެވޭ މައްސަލައާ ގުޅިގެން ބައެއް ތަންތަން ބަލާ ފާސްކުރަން ފަށައިފިއެވެ.
ފުލުހުން ބުނީ ކޭޕާކު މައްސަލައާ ގުޅިގެން ފުލުހުން މިހާރު އެ މައްސަލައިގައި ތުހުމަތުކުރެވޭ މީހުންނާއި ގުޅުންހުރި ތަންތަން ބަލާ ފާސްކުރަމުންދާ ކަމަށެވެ. ނަމަވެސް އެ މަސައްކަތް ފެށީ ކޮން އިރަކު ކަމެއް އަދި އެ މަސައްކަތް ކުރިއަށްދާ ގޮތުގެ އިތުރު އެއްވެސް ތަފްސީލެއް ފުލުހުން ހާމައެއް ނުކުރެއެވެ.
ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއްގެ އެހީގައި މަކަރާއި ހީލަތުން އެޕާޓްމަންޓުތައް ވިއްކައި ފައިސާއަށް ހިޔާނާތްތެރިވި މައްސަލައެއް ފެންމަތިވުމާއި ގުޅިގެން ފުލުހުން ދަނީ އެ މައްސަލަ ތަހުގީގުކުރަމުންނެވެ. އަދި ކޭޕާކު މައްސަލައާ ގުޅިގެން ބައެއް މީހުންގެ ޕާސްޕޯޓު ހިފަހައްޓާފައިވާކަމަށް ފުލުހުން ވަނީ ނިމިދިޔަ ހަފްތާގައި ހާމަކޮށްފައެވެ.
ހަންބޯ ކުންފުނީގެ ދިވެހި ހިއްސާދާރު ކަމަށްވާ ހަސަން މަމްދޫހު (މަންޑޭ) ކޭޕާކު ފްލެޓް ދިނުމުގެ ނަމުގައި ބޮޑެތި އޮޅުވާލުންތަކެއް އޮޅުވާލާފައިވާ ކަމަށް ތުހުމަތުކޮށް އެ މައްސަލައިގެ ޖިނާއީ ތަހުގީގެއް ކޮށްދިނުމަށް އެދި ހަންބޯ މޯލްޑިވްސްގެ މައި ހިއްސާދާރު ވަނީ ކަމާއި ބެހޭ ފަރާތްތަކަށް އޭނާގެ މައްސަލަ ހުށަހަޅާފައެވެ. އަދި މި މައްސަލައާ ގުޅިގެން، މީގެ ކުރިން ފުލުހުން އެދިގެން ކްރިމިނަލް ކޯޓުން ވަނީ މަމްދޫހުގެ ޕާސްޕޯޓް ހިފަހައްޓަން އަމުރެއް ނެރެދީފައެވެ.
މީގެ އިތުުރުން މިމައްސަލައާ ގުޅިގެން އިތުރު ދިވެއްސަކާއި ބިދޭސީއެއްގެ ޕާސްޕޯޓު ހިފެހެއްޓިކަން ހާމަކުރި ނަމަވެސް އެ މީހުންގެ ވަނަވަރު އާންމުކޮށްފައެއް ނުވެއެވެ.
މަމްދޫހު ވަނީ އޭނާ އަށް ކުރާ ތުހުމަތުތަކަށް އިންކާރުކޮށްފައެވެ. އޭނާ ވަނީ ހަންބޯ މޯލްޑިވްސްގެ މައި ހިއްސާދާރު އުޅެނީ ފައިސާ ހިފައިގެން ފިލަން ކަމަށް ތުހުމަތުކޮށްފައެވެ.
ފުލުހުން ވަނީ، ކޭ ޕާކު ރެޒިޑެންސްއިން އެޕާޓްމަންޓް ގަނެފައިވާ މީހުން އެއްވެސް ޝަކުވާއެއް އޮތްނަމަ އެކަން ދިވެހި ފުލުހުންގެ ޚިދުމަތަށް އެންގުމަށް އެދިފައެވެ.
