ކިނޮޅަހު ބަނދަރު ތަރައްގީކުރުމުގެ މަޝްރޫއުގެ މަސައްކަތް ނިމިއްޖެ

ރ. ކިނޮޅަހު ބަނދަރު ތަރައްގީކުރުމުގެ މަޝްރޫއުގެ މަސައްކަތް ނިމިފައިވާކަމަށް، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.

މިމަޝްރޫއު، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އެމްޓީސީސީއާ ހަވާލުކޮށްފައިވަނީ 46.55 މިލިއަން ރުފިޔާއަށެވެ.

678 މީހުންގެ އާބާދީގެ ކިނޮޅަހު ރައްޔިތުން އާމްދަނީ ހޯދުމަށް މައިގަނޑު ގޮތެއްގައި ކޮށްއުޅެނީ މަސްވެރިކަމާއި ދަނޑުވެރިކަމެވެ. އެގޮތުން ރަށުގައި ކަންނެލި މަސްވެރިކަންކުރާ 3 އޮޑި އޮންނައިރު، ކަނޑުމަހުގެ މަސްވެރިކަން ކުރާ އެއް އޮޑި އޮވެއެވެ. ދަނޑުވެރިކަމަށް ބަލާއިރު؛ ކައުންސިލުން ދޫކޮށްފައިވާ 4,000 އަކަފޫޓުގެ 62 ބިމުގައި މިހާރުވެސް ރަނގަޅު ފެންވަރަކަށް ދަނޑުވެރިކަން ކުރަމުންދާކަމަށް ކިނޮޅަހު ކައުންސިލުން ބުނެއެވެ.

ކިނަޅޮހަކީ ޒަމާނުއްސުރެ ލަފާފުރުމުގެ ދަތިކަން ކުރިމަތިވެފައިވާ ރަށެކެވެ.

އެގޮތުން ދެ މޫސުން ބަދަލުވާއިރު ރަށުގެ ނެރަށް ވެލި ވަނުމުގެ ސަބަބުން ބަނދަރު ތިލަވެ، ނެރު ބެދުމަކީ މީގެ ކުރިން މި ރަށުގައި އާންމު ކަމެކެވެ. ނަމަވެސް ބަނދަރު ތަރައްގީކުރުމުގެ މަޝްރޫއު ނިމުމުން އެ ރަށުގެ ރައްޔިތުންނަށް ވަނީ ކުރިއަށްވުރެ ޖާގަ ތަނަވަސް, ޒަމާނީ، ރީތި ބަނދަރެއް ލިބިފައެވެ. އަދި ބަނދަރާ އިންވެގެން އޮންނަ ދެ ފަރާތުގެ ގޮނޑުދޮށު ސަރަހައްދުގައި މިހާރު ގްރޮއިންސް ޖަހާފައިވުމާއެކު، ކުރިން ބަނދަރަށް ވެލި ވަނުމުގެ ސަބަބުން ދިމާވި މައްސަލަތަކަށް ހައްލު ލިބޭނެކަމަށް އެމްޓީސީސީން ބުނެއެވެ.

އެމްޓީސީސީން ބުނީ މިބަނދަރާއެކު ކިނޮޅަހު ރައްޔިތުންނަށް ލަފާފުރުމުގައި ގިނަ ލުއިފަސޭހަތައް ލިބޭނެ ކަމަށެވެ. އަދި ބާރުބޮޑުވެފައިވާ ރަށުގެ ބަނދަރަށް ޖާގައިގެ ތަނަވަސްކަން ލިބ،ި ކޮޅުވެއްޓި ފަދަ އުޅަނދުތައްވެސް ކައިރިކުރެވޭނެ ކަމަށް އެމްޓީސީސީން ބުނެއެވެ.

އެމްޓީސީސީން ބުނީ މިމަޝްރޫއުގެ ދަށުން 31,726 ކޮޑިމީޓަރުގެ ސަރަހައްދެއްގެ އައު ހާބަރ ބޭސިން ފުންކުރުމާއ،ި 15,252 ކިއުބިކްމީޓަރުގެ ސަރަހައްދެއްގެ މިހާރު ހުރި ހާބަރ ބޭސިން ފުންކުރުމާއ،ި 1,920 ކިއުބިކްމީޓަރުގެ ސަރަހައްދެއްގެ ނެރު ފުންކުރުމާއ،ި 6,100 ކިއުބިކްމީޓަރުގެ ދޯނި އެހެލާ ސަރަހައްދު ފުންކުރުމާއ،ި 186 މީޓަރުގެ ސަރަހައްދެއްގައި އެއްގަމުތޮށި ލުމާއ،ި 172.30 މީޓަރުގެ ސަރަހައްދެއްގެ މިހާރު ހުރި އެއްގަމުތޮށި މަރާމާތުކުރުމާއ،ި 285 މީޓަރުގެ ސަރަހައްދެއްގައި ބޭރުތޮށި ލުމާއ،ި 65 މީޓަރުގެ ސަރަހައްދެއްގައި ރިވެޓްމެންޓް ޖެހުމާއ،ި 130 މީޓަރުގެ ސަރަހައްދެއްގައި ގްރޮއިން ޖެހުމާއި އަދި 1884 އަކަމީޓަރުގެ ސަރަހައްދެއްގައި ހާބަރ ޕޭވްމަންޓް ހެދުމާއ،ި ކޮންކްރީޓް ޖެޓީއެއް ހެދުމާއ،ި ބީކަން ހަރުކުރުމާއ،ި މޫރިންގ ބްލޮކްސް ހަރުކުރުމުގެ އިތުރުން، ރޭމްޕެއް ހެދުމުގެ މަސައްކަތްވެސް ހިމެނޭކަމަށެވެ.

ވޭތުވެދިޔަ 42 އަހަރުތެރޭގައި އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ގިނަ މަޝްރޫއުތަކެއް ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްގީގެ ދަތުރުގެ މުހިއްމު މަރުހަލާއެއްގައެވެ. ކުންފުނި އުފެދުނީއްސުރެ ރާއްޖޭގެ އުމްރާނީ ތަރައްގީއާއި އިޖުތިމާއީ ވަސީލަތްތައް ބިނާކުރުމުގައި އެމްޓީސީސީން ވަނީ މުހިއްމު ދައުރެއް އަދާކޮށްފައެވެ.