ބައިނަލްއަގްވާމީ ރިސާޗް ކޮންފަރެންސް ވެފައިވަނީ އެކި ދާއިރާތަކުން އައު އުފެއްދުންތައް ކުރިއަރުވާ ޕްލެޓްފޯމަކަށް: ވައިސް ޗާންސެލަރު

އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ބައިނަލްއަގްވާމީ ރިސާޗް ކޮންފަރެންސް ވެފައިވަނީ އެކި ދާއިރާތަކުން އައު އުފެއްދުންތައް ކުރިއަރުވާ ޕްލެޓްފޯމަކަށް ކަމަށް އެޔުނިވާސިޓީގެ ވައިސް ޗާންސެލަރ ޑރ.އިބްރާހީމް ޒަކަރިއްޔާ މޫސާ ވިދާޅުވެއްޖެއެވެ.

މި ކޮންފަރެންސްގެ ހުޅުވުމުގެ ރަސްމިއްޔާތުގައި ވައިސް ޗާންސެލަރ ވިދާޅުވީ ރިސާޗަރުން މި ކޮންފަރެންސަށް ވަޑައިގަންނަވަނީ އަގުހުރި ތަޖުރިބާތަކާއި މައުލޫމާތުތަކާއި ހިކުމަތްތަކާ އެކު ކަމަށެވެ. އަދި އެ ބޭފުޅުންގެ ދިރާސާތަކާއި މަޝްވަރާތަކުން، ބައިވެރިންނަށް ނުހަނު ފައިދާތައް ކުރާ ކަމަށެވެ. އެގޮތުން މި އަހަރުގެ ކޮންފަރެންސުން ވެސް ބައިވެރިންނަށް، މުޖުތަމައު އަށް ފައިދާކުރުވަނިވި ކަންކަން ދަސްވާނެ ފަދަ ތަޖުތިބާއެއް ކުރެވޭނެ ކަމަށް އުއްމީދުކުރައްވާ ކަމަށް ވިދާޅުވި އެވެ.

ވައިސް ޗާންސެލަރ ވިދާޅުވީ މަސައްކަތް ކުރަނީ އައިޔޫއެމްގެ ތަސައްވުރާ އެއްގޮތަށް ކަމަށާއި، ގައުމާއި އިސްލާމްދީނުގެ އިލްމު ފެތުރުމަށް އިސްކަންދޭނެ ކަމަށެވެ. އަދި އިލްމު ފެތުރުމުގެ ދާއިރާއަށް ބޮޑު ބަދަލެއް ގެންނަ މުއައްސަސާއަކަށް އައިޔޫއެމްވާނެ ކަމަށް ވިދާޅުވިއެވެ.

މީގެ އިތުރުން ވައިސް ޗާންސެލަރ ވިދާޅުވީ މުޖުތަމައުގައި ކިޔަވައިދިނުމުގެ ދާއިރާއިން ކުރިއަށް ދިއުމުގައި ދިރާސާތަކަށް އިސްކަން ދޭންޖެހޭ ކަމަށެވެ. މާސްޓާސް، ޕީއެޗްޑީ އަދި އެކި ލެވަލްގެ ގިނަ ޕްރޮގްރާމްތައް ހިންގަމުންދާކަން ފާހަގަކުރައްވައި ވައިސް ޗާންސެލަރ ވިދާޅުވީ ކޮންމެ އަހަރަކު ބާއްވާ މި ކޮންފަރެންސްގެ އެހީގައި ޕްރޮގްރާމްތައް ކުރިއަށް ގެންދިއުމުގައި އިތުރު އިލްމާއި ބޮޑު އެހީތެރިކަމެއް ލިބޭ ކަމަށެވެ.

މީގެ ކުރީގެ އަހަރުތަކުގައި ވެސް ކުރިއަށް ގެންދިޔަ ކޮންފަރެންސްތަކަކީ ވަރަށް ކާމިޔާބު އިލްމީ ކޮންފަރެންސްތަކެއް ކަމަށް ވައިސް ޗާންސެލަރ ވިދާޅުވިއެވެ. އަދި ވިދާޅުވީ އިލްމީ ބޭފުޅުން ގިނަ މައުލޫމާތުތައް ހިއްސާކޮށް، އަހަރުތަކުގައި ވެސް މުހިންމު ކީނޯޓު ތަގުރީރު ތައް ދެއްވާފައިވާކަން ފާހަގަކުރެއްވިއެވެ. ވައިސް ޗާންސެލަރ ވިދާޅުވީ ކޮންފަރެންސްގައި ވާހަކަދައްކަވާ ބޭފުޅުން ހިއްސާކޮށްދެއްވި މައުލޫމާތާއި، ތަޖުރިބާގެ ސަބަބުން ބައިވެރިންނަށް ހިތްވަރު ލިބިގެންދިޔަ ކަމަށެވެ. އަދި އެއީ ދާއިރާއިން ކުރިއަށް ދިއުމަށާއި، އިތުރު ދިރާސާތައް ހެދުމަށް ލިބިގެން ދިޔަ ފުރުސަތެއް ކަމަށް ވައިސް ޗާންސެލަރ ވިދާޅުވިއެވެ. އަދި ވިދާޅުވީ މިއަދު ބައިނަލްއަގްވާމީ ރިސާޗް ކޮންފަރެންސް ވެފައިވަނީ އެކި ދާއިރާތަކުން އައު އުފެއްދުންތައް ކުރިއަރުވާ ޕްލެޓްފޯމަކަށް ކަމަށެވެ.

ވައިސް ޗާންސެލަރ ވިދާޅުވީ ކުރިއަށް އޮތްތަނުގައި ބާއްވާ ކޮންފަރެންސްތަކުގެ ފެންވަރު އިތުރަށް ހަރުދަނާ ކުރުމަށް ގިނަ މަސައްކަތްތައް ކުރައްވާނެ ކަމާށާއި، އިތުރަށް އިލްމީ ގާބިލް ބޭފުޅުން ކޮންފަރެންސްއަށް ގެނެސްދެއްވާނެ ކަމަށެވެ. އަދި މިއަދު އިލްމު ކުރިއެރުވުމުގައި ދިރާސާ ކުރުމަކީ ވަރަށް މުހިންމު ކަމެއް ކަމަށާއި، އެމަގަށް އައިޔޫއެމްއިން މަސައްކަތް ކުރާނެ ކަމުގެ ޔަގީން ވައިސް ޗާންސެލަރ ދެއްވިއެވެ.