ފުއްގިރި މައްސަލަ: އިފްތިތާޙީ ބަޔާން ހުށަހެޅުމަށް ޔާމީނަށް އަނެއްކާވެސް އިތުރު ފުރުސަތެއް ދެއްވައިފި
ޔާމީނާ ދެކޮޅަށްވެސް ދައުލަތުން ވަނީ 15 ޝަފަހީ ހެއްކާއި 67 ކިތާބީ ހެކި ހުށައަޅާފައި
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ރ ފުއްގިރި ހިޔާނަތުގެ މައްސަލައިގައި ކުރީގެ ރައީސް ޔާމީން އަބްދުލްޤައްޔޫމްގެ މައްޗަށް އުފުލާފައިވާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި އޮތީ ޝަރީއަތް ފަށައި އިފްތިތާޙީ ބަޔާން އިއްވެވުމެވެ.
އެ ދުވަހު ޔާމީނުގެ ފަރާތުން ވަނީ އިފްތިތާޙީ ބަޔާން އިއްވުމަށް ވަގުތު ބޭނުންވާކަމަށް ވިދާޅުވެފައެވެ. ވުމާއެކު، ގާޒީ އެ ދުވަހު ވަނީ އެ ފުރުސަތު ދެއްވަވާފައެވެ.
އާދިއްތަ ދުވަހުގެ އަޑުއެހުމުގައި ގާޒީ ވިދާޅުވީ، އިފްތިތާހީ ބަޔާން އިއްވުމަށް އަދިވެސް އިތުރު ވަގުތު ބޭނުންވާކަމަށް ބަޔާން ކުރައްވައި ޔާމީނުގެ ފަރާތުން ސިޓީއެއް ހުށައަޅުއްވާފައިވާ ކަމަށާއި، ނަމަވެސް މިހާރު އެކަށީގެންވާ ވަގުތު ދެވިފައިވާ ކަމަށެވެ.
އިފްތިތާޙީ ބަޔާނަކީ ދިފާއު ބިނާ ކުރާނެ ގޮތް ބަޔާންކުރާ ބަޔާނެއް ކަަމަށާއި، އެކަމަށް އެކަށީގެންވާ ވަގުތު ދެވިފައިވާ ކަމަށް ވިދާޅުވެ ގާޒީ ވަނީ އިފްތިތާޙީ ބަޔާން އިއްވެވުމަށް ދަންނަވާފައެވެ.
އެހެންނަމަވެސް އެންމެ ފަހުން އޮތް އަޑުއެހުމަށްފަހު ވަކީލުންނާ ބައްދަލު ކުރެއްވުމުގެ ފުރުސަތު ލިބިލައްވާފައިނުވާކަމަށް ވިދާޅުވެ ޔާމީނު ވަނީ އިފްތިތާޙީ ބަޔާން އިއްވެވުމަށް އިތުރު ވަގުތު ދެއްވުމަށް އެދިވަޑައިގެންފައެވެ.
ޔާމީނުގެ ވަކީލުންވެސް ވަނީ އިފްތިތާޙީ ބަޔާން އިއްވެވުމަށް އިތުރު ވަގުތަށް އެދިލައްވާފައެވެ.
ގާޒީ ވިދާޅުވީ، ވަކީލުންނާ ބައްދަލު ކުރުމާ ގުޅޭގޮތުން ކަރެކްޝަންސްގެ ލިއުމެއް ދައުލަތުން ހުށައަޅާފައިވާ ކަމަށާއި، މި މަސް ތެރޭގައިވެސް 3 ފަހަރު ވަކީލުންނާ ބައްދަލު ކުރެއްވުމުގެ ފުރުސަތު ދެވިފައިވާ ކަމަށެވެ. ވުމާއެކު، އިފްތިތާޙީ ބަޔާން ކުރިއަށް ގެންދެވުމަށް ގާޒީ ދެންނެވިއެވެ.
އެއާއެކު، ފުރަތަމަ ދައުލަތުން ވަނީ އިފްތިތާޙީ ބަޔާން އިއްވާފައެވެ.
ޔާމީނުގެ މައްޗަށް މި މައްސަލައިގައި ކުރަނީ ރިޝްވަތު ޤަބޫލު ކުރުމުގެ ކުށުގެ ދައުވާއާއި މަނީ ލޯންޑަރިންގ ގެ ކުށުގެ ދައުވާއެވެ.
ދައުލަތުން ވަނީ ކުށް ކޮށްގެން ހޯދާފައިވާ މަންފާ ދައުލަތަށް ނަގައިދިނުމުގެ އަމުރަކަށްވެސް އެދިފައެވެ. އެއީ 2،295،000 އެމެރިކާ ޑޮލަރެވެ.
ޔާމީނާ ދެކޮޅަށްވެސް ދައުލަތުން ވަނީ 15 ޝަފަހީ ހެއްކާއި 67 ކިތާބީ ހެކި ހުށައަޅާފައެވެ. އަދި މައްސަލަ ކުރިއަށް ދަނިކޮށް ޕެންޑޯރާ ޕޭޕާރސް އިން ލީކުވި ބައެއް މައުލޫމާތު އައު ހެކީގެ ގޮތުގައި ދައުލަތުން ވަނީ ކޯޓަށް ހުށައަޅާފައެވެ.
އެއަށްފަހު ދިފާއަށް އިފްތިތާޙީ ބަޔާން އިއްވުމަށް ގާޒީ ފުރުސަތު ދެއްވިއެވެ.
އެ ފުރުސަތުގައިވެސް ވަކީލުން ވިދާޅުވީ، ޔާމީނާ މަޝްވަރާ ކުރުމެއް ނެތި އިފްތިތާޙީ ބަޔާން ހުށައެޅުމަށް ދަތި ކަމަށެވެ.
ޔާމީނުވެސް ތަކުރާރުކޮށް ވަނީ އިފްތިތާޙީ ބަޔާން ހުށައެޅުމަށް އަދި ފުރުސަތެއް ދެއްވުމަށް އެދިލައްވާފައެވެ. އެކަމާ ގުޅޭގޮތުން ސުވާލުކުރުމުން ދައުލަތުން ވަނީ ވަކީލު ބައްދަލުވުމަށް ފަހު ފުރުސަތެއް ދެއްވުމަށްފަހުވެސް އިފްތިތާޙީ ބަޔާން ކުރިއަށް ގެންދިއުމަށް ދިފާއަށް ފުރުސަތު ދިނުމާމެދު އިއުތިރާޒެއް ނެތްކަމަށް ބުނެފައެވެ.
ވުމާއެކު ގާޒީ ވަނީ އެ ފުރުސަތު ދެއްވަވައި އަޑުއެހުން ކުރުކޮށްލައްވާފައެވެ.
ދެން އޮންނަ އަޑުއެހުމުގައި އޮންނާނީ ޔާމީނުގެ ފަރާތުން އިފްތިތާޙީ ބަޔާން އިއްވުމާއި ހެކިންގެ ހެކިބަސް ނަގަން ފެށުމެވެ.
