ރ ފުއްގިރި ހިޔާނަތުގެ މައްސަލައިގައި ސަން އިންވެސްޓުމަންޓް ޕްރައިވެޓް ލިމިޓެޑުގެ މައްޗަށް އުފުލާފައިވާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އާދިއްތަ ދުވަހުގެ އަޑުއެހުމަކީ މި މައްސަލައިގެ ޝަރީއަތް ފެށުމަށް ބޭއްވި އަޑުއެހުމެކެވެ. އެގޮތުން އެންމެ ފުރަތަމަ ދައުލަތުން ވަނީ އިފްތިތާޙީ ބަޔާން އިއްވާފައެވެ.

ސަން ކޮންސްޓްރަކްޝަން އެންޑް އިންޖިނިޔަރިންގެ މައްޗަށް ދައުލަތުން އުފުލާފައިވަނީ މަނީ ލޯންޑަރިންގެ ކުށުގެ ދައުވާއެވެ.

ދައުލަތުން ބުނެފައިވާ ގޮތުގައި އެމްއެމްޕީއާރްސީ މެދުވެރިކޮށް ރ ފުއްގިރި ކުއްޔަށް ދޫކުރުމުގެ މުއާމަލާާތާއި ގުޅިގެން އެ ކުންފުނިން ވަނީ ޑޮލަރު މާރުކުރުމުގެ މުއާމަލާތެއްގެ ގޮތުގައި ދައްކައި، 1،117،000 އެމެރިކާ ޑޮލަރުގެ ޗެކަށްވާ ފައިސާ ޔާމީނަށް ރައްދުކޮށް، މަނީ ލޯންޑަރިންއަށް ފަށަލަކޮށްފައެވެ.  

ދައުވާ ސާބިތު ކުރުމަށް ދައުލަތުން ވަނީ 15 ޝަފަހީ ހެއްކާ 67 ކިތާބީ ހެކި ހުށަހަޅާފައެވެ. އަދި މައްސަލަ ކޯޓުގައި ކުރިއަށް ދަނިކޮށް ޕެންޑޯރާ ޕޭޕަރސް އިން ލީކުވި މައުލޫމާތުތަކުން ލިބުނު އައު ހެކިތަކެއް ދައުލަތުން ވަނީ ޖިނާއީ އިޖުރާއަތުގެ ޤާނޫނުގެ 135 ވަނަ މާއްދާގެ ދަށުން ހެކީގެ ގޮތުގައި ހުށައަޅާފައެވެ.

އެއަށްފަހު ދައުވާލިބޭ ފަރާތުން އިފްތިތާޙީ ބަޔާން ހުށައަޅުއްވާފައިވާއިރު، މި މައްސަލަ ކޯޓަށް ހުށަހަޅައި ޝަރީއަތް ހިނގަމުން ދަނިކޮށް ދައުލަތުން ހުށަހަޅާފައިވާ އިތުރު ލިޔެކިޔުންތައް ޝަރީއަތަށް ބަލައިނުގަތުމަށް ދައުވާލިބޭ ފަރާތުން ހުށަހަޅާފައިވެއެވެ.

އަދި މި މައްސަލަ ވީހާވެސް އަވަހަށް ނިންމައިދިނުމަށް އެ ކުންފުނީގެ ފަރާތުން އެދިފައިވެއެވެ.

ނަމަވެސް ހެކި ހާމަ ކުރުމުގެ މަސްއޫލިއްޔަތު ދެމިގެންދިއުމަކީ ދައުލަތަށްވެސް ދިފާއަށްވެސް ޖިނާއީ އިޖުރާއަތުގެ ޤާނޫނުގެ 135 ވަނަ މާއްދާގެ ދަށުން ލިބިދޭ ޙައްޤެއްކަމަށް ދައުލަތުގެ ވަކީލު ވިދާޅުވިއެވެ.

ގާޒީ ވިދާޅުވީ، ދިފާއުގެ އެ ހުށަހެޅުމާމެދު ޤާނޫނީ އަސާސެއް ދެއްކެވިފައިނުވާ ކަމަށެވެ. މި ފުރުސަތުގައި އެ ހެކިތައް ބަލައިނުގަންނަންޖެހޭ ޤާނޫނީ އަސާސެއް އޮތްނަމަ، އެކަމެއް ފާހަގަކުރެއްވުމަށް ގާޒީ ވިދާޅުވިއެވެ.

އެ ނުކުތާގައި ދެފަރާތުން ދެއްކެވި ވާހަކައަށްފަހު ގާޒީ ވިދާޅުވީ، ދިފާއުގެ އެ ހުށަހެޅުމާމެދު ދެން އޮންނަ އަޑުއެހުމެއްގައި ގޮތެއް ނިންމަވާނެ ކަމަށެވެ.

ދެން އޮންނާނީ މި މައްސަލައިގެ ހެކިބަސް ނެގުމެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި ކުންފުންޏާއެކު ދެން ދައުވާ އުފުލާފައިވާ ސަން އިންވެސްޓްމަންޓަށް ކުރާ ދައުވާއާ ގުޅިގެންވެސް މީގެ ކުރިން ބޭއްވި އަޑުއެހުމެއްގައި ވަނީ ޝަރީއަތް ފަށައި އިފްތިތާޙީ ބަޔާން އިއްވާފައެވެ.