އިޓްލޮސްގައި ރާއްޖެއިން ކުރި މަސައްކަތަކާއި މެދު ހިތްހަމަޖެހިވަޑައިގަންނަވާ ކަމަށް ބަންޑާރަ ނައިބު އިބްރާހިމް ރިއްފަތު ވިދާޅުވެއްޖެއެވެ.
ބަންޑާރަ ނައިބް އިބްރާހިމް ރިއްފަތު މިފަދައިން ވިދާޅުވީ ރާއްޖެއާއި ޗާގޯސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން) އިން ނިންމުމާއި ގުޅިގެންނެވެ.
ބަންޑާރަ ނައިބް ރިއްފަތު ކުރެއްވި ޓްވީޓުގައި ވިދާޅުވީ ދިވެހި ސަރުކާރުން، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި، އެމަނިކުފާނުގެ ބައިނަލްއަގްވާމީ ގާނޫނީ ޓީމުން ވަނީ މޮރިޝަސް އާއި ރާއްޖޭގެ އިންވަކިކުރުމުގެ މައްސަލައިގައި، ރާއްޖޭގެ މަސްލަހަތު ވަރަށް ވަރުގަދައަށް ދިފާއުކޮށްފައި ކަމަށެވެ. އަދި ނަތީޖާއާމެދު ހިތްހަމަޖެހިވަޑައިގަންނަވާ ކަމަށް ރިއްފަތު ވިދާޅުވިއެވެ.
ރިއްފަތު ވިދާޅުވީ ބައިނަލްއަޤްވާމީ ޤާނޫނުތަކުގެ ދަށުން ރާއްޖެއަށް ލިބިދޭ ޙައްޤުތަކާމެދު ރާއްޖޭގެ ވިސްނުމާއި އުންމީދުތަކާ އެއްގޮތްވާ ގޮތުގެ މަތިން މިހާރު ކަނޑުގެ ސަރަޙައްދެއް އެބައޮތް ކަމަށެވެ. އަދި އައުޓަރ ކޮންޓިނެންޓަލް ޝެލްފް އާއި ގުޅޭ ގޮތުން މޮރިޝަސް އިން ކުރި ދައުވާއާ ގުޅޭ ގޮތުން ސްޕެޝަލް ޗެމްބަރުގެ އިއްތިފާގުން ރާއްޖެއާ އެއްކޮޅަށް މައްސަލަ ނިންމާފައިވާ ކަމަށް ރިއްފަތު ވިދާޅުވިއެވެ.
އިޓްލޮސްއިން ނިންމި ނިންމުމުގައި ވަނީ ރާއްޖޭން ފާހަގަކުރި ނުކުތާތަކަށް ތާއީދުކޮށްފައެވެ. އިޓްލޮސްގެ ސްޕެޝަލް ޗޭމްބަރުން އިއްވި ނިންމުމުގައި ބުނީ، ތިލަ ދިޔަވަރުގައި ފެންނަ އޮންނަ ފަރަކުން، އިން ވަކިކުރުމަށްޓަކައި އިކުއިޑިސްޓަންސް ރޮނގު ދެމޭނެ އެއްވެސް ހަމައެއް ނެތް ކަމަށެވެ. އެއާއެކު މޮރިޝަސްއާ ދެކޮޅަށް މައްސަލަ ނިމުމުން، ދެގައުމުގެ ފުށުއަރާ ސަރަހައްދުން ރާއްޖެއަށް ވަނީ 4،687 އަކަކިލޯމީޓަރުގެ އިތުރު ސަރަހައްދެއް ކަށަވަރުވެފައެވެ.
