ވެމްކޯއިން ބިންލައިނަރ ވިއްކާ އަގުތައް އާންމުކޮށްފި، އާންމު ސައިޒުގެ ކޮތަޅު ބޮނޑިއެއް 35ރ އަށް
ކުނި އެޅުމަށް ހާއްސަ "ބިންލައިނަރ" ވިއްކަން އަންނަ ބުރާސްފަތި ދުވަހުން ފެށިގެން ފަށާނެ
ކުނި ނެރެފައި
ވެމްކޯއިން ފޯރުކޮށްދޭ ބިންލައިނަރ ނުވަތަ ކުނި އުކާލާ ކޮތަޅު ވިއްކާ އަގުތައް އެ ކޯޕަރޭޝަނުން އާންމުކޮށްފިއެވެ.
ވެމްކޯއިން ކުރި އިއުލާނުގައި ވަނީ، ކުނި މެނޭޖްކުރުމުގެ ގާނޫނުގައި ވާގޮތަށް، ކުނި އެޅުމަށް ހާއްސަ "ބިންލައިނަރ" ވިއްކަން އަންނަ ބުރާސްފަތި ދުވަހުން ފެށިގެން ފަށާނެ ކަމަށެވެ. ވެމްކޯގެ ކަސްޓަމަރ ފްރޮންޓް އޮފީސްތަކުން އެ ކޮތަޅުތައް ގަންނަން ލިބޭނެ ކަމަށްވެސް ބުނެފައި ވެއެވެ.
އާއްމު ސައިޒު ނުވަތަ L ސައިޒު [17 އިންޗީ ދިގު] ގެ ބޮނޑިއެއްގައި 100 ކޮތަޅު އޮންނާނެއެވެ. އޭގެ އަގަކީ 35ރ އެވެ. ސައިޒު XXL [27 އިންޗި ދިގު]ގެ 100 ކޮތަޅު ބޮނޑިއާއި XXXL [48 އިންޗީގެ] ގެ 50 ކޮތަޅު ބޮނޑި ވިއްކަން ހަމަޖައްސާފައިވަނީ 165ރ އަށެވެ.
ކުނި މެނޭޖް ކުރުމުގެ ގާނޫނުގެ ދަށުން، މި މަހުގެ 18 ވަނަ ދުވަހުން ފެށިގެން ޕްލާސްޓިކް ކޮތަޅުން ދެ ރުފިޔާ ނަގަން ވަނީ ފަށައިފައެވެ. އެއާއެކު އާންމުންގެ އެންމެ ބޮޑު ޝަކުވާއަކަށް ވެގެންގޮސްފައިވަނީ ކުނި އަޅާ ކޮންމެ ކޮތަޅަކަށް 2 ރުފިޔާ ދައްކަންޖެހޭތީއެވެ. ނަމަވެސް ގާނޫނު ބުނާގޮތުން، ޕްލާސްޓިކް ކޮތަޅުން ދެ ރުފިޔާގެ ފީއެއް ނެގިނަމަވެސް، ކުނި މެނޭޖްކުރުމާ ގުޅޭ އިދާރާއިން ފޯރުކޮށްދޭ ބިންލައިނަރއިން ފީ ނެގުން އިސްތިސްނާވާނެއެވެ. އަދި ރޯ މަސް އެޅުމަށް ބޭނުންކުރާ ކޮތަޅުންނާއި ޑިއުޓީ ފްރީ ފިހާރަތަކުން ދޫކުރާ ކޮތަޅުންވެސް ދެ ރުފިޔާގެ ފީ ދައްކާކަށް ނުޖެހެއެވެ.
ވެމްކޯއިން ދެ ކުލައެއްގެ ކޮތަޅު ވިއްކާނެއެވެ. އެއީ ކަޅުކުލައާއި ފެހިކުލައިގެ ކޮތަޅެވެ. ކުނި އުކާލުމުގައި، ކުނިވާ ޒާތުގެ ކުނި ނުވަތަ އަމިއްލައަށް ފަނާވެދާ ޒާތުގެ ކުނި، ފެހި ކޮތަޅުގައި ބަންދުކުރުމަށާއި، އަދި އެހެނިހެން ކުނި ކަޅު ކޮތަޅުގައި ބަންދުކުރުމަށް ވެމްކޯއިން އެދެއެވެ. އަދި ވެމްކޯއިން ތައާރަފުކުރާ ކޮތަޅު ހަމައެކަނި ކުނި އުކާލުމުގައި ބޭނުންކުރުމަށްވެސް ވަނީ އިލްތިމާސްކޮށްފައެވެ.
ވެމްކޯއިން ބުނީ، އެ ކޯޕަރޭޝަނުގެ މާލެ، ހުޅުމާލެ އަދި ވިލިމާލެ ވޭސްޓް ޓްރާންސްފަރ ސްޓޭޝަންތަކުގެ ކަސްޓަމަރ ފްރަންޓް އޮފީސްތަކުން، ބުރާސްފަތި ދުވަހުން ފެށިގެން ބިންލައިނަރ ލިބެން ހުންނާނެ ކަމަށެވެ.
