ފުއްގިރި މައްސަލަ: ދައުލަތުން ފަހުން ހުށަހެޅި ހެކިތައް ބަލައިނުގަތުމަށް ސަން އިންވެސްޓުމަންޓުގެ ފަރާތުން އެދޭ

ރ ފުއްގިރި ހިޔާނަތުގެ މައްސަލައިގައި ސަން އިންވެސްޓުމަންޓް ޕްރައިވެޓް ލިމިޓެޑުގެ މައްޗަށް އުފުލާފައިވާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އަންގާރަ ދުވަހުގެ އަޑުއެހުމަކީ މި މައްސަލައިގެ ޝަރީއަތް ފެށުމަށް ބޭއްވި އަޑުއެހުމެކެވެ. އެގޮތުން އެންމެ ފުރަތަމަ ދައުލަތުން ވަނީ އިފްތިތާޙީ ބަޔާން އިއްވާފައެވެ.

Advertisement

ސަން އިންވެސްޓުމަންޓުގެ މައްޗަށް ދައުލަތުން އުފުލާފައިވަނީ މަނީ ލޯންޑަރިންގ ގެ ކުށުގެ ދައުވާއެވެ.

ދައުލަތުން ބުނާ ގޮތުގައި ސަން އިންވެސްޓުމަންޓުން މަނީ ލޯންޑަރިންގ ގެ މުއާމަލާތް ހިންގީ ޑޮލަރު މާރު ކުރުމުގެ މުއާމަލާތެއް ކަމުގައި ދައްކައިގެންނެވެ.

މި ދައުވާ ސާބިތު ކުރުމަށް ދައުލަތުން ހުށައަޅާފައިވާ ހެކިތަކާއި، ހެކިތަކުން ސާބިތު ކުރެވޭނެ ކަންކަންވެސް ދައުލަތުން ވަނީ ބަޔާންކޮށްފައެވެ.

އެއަށްފަހު ސަން އިންވެސްޓުމަންޓުގެ ފަރާތުން ވަނީ އިފްތިތާޙީ ބަޔާން އިއްވާފައެވެ. ދައުވާއިން ދިފާއުވުމަށް ޝަފަހީ ހެކިންގެ އިތުރުން 37 ކިތާބީ ހެއްކެއްވެސް ދިފާއުން ވަނީ ހުށައަޅާފައެވެ.

ދައުވާގެ އުންސުރުތަކާއި، ދައުވާލިބޭ ފަރާތުގެ އަމަލާ ގުޅުވާލެވޭ ގޮތް ދައުލަތަށް ބުނެދެވިފައިނުވާކަމަށްވެސް ކުންފުނިން އިފްތިތާޙީ ބަޔާނުގައި ބުނެފައިވެއެވެ.

ދައުވާލިބޭ ފަރާތުން ވަނީ މި މައްސަލައިގައި އިންސާފުވެރި ޝަރީއަތެއް ކުރިއަށް ގެންދިއުމަށް އެދިލައްވާފައެވެ.

އޭގެ އިތުރުން، މި މައްސަލަ ކޯޓަށް ހުށައަޅައި ޝަރީއަތް ހިނގަމުން ދަނިކޮށް ދައުލަތުން ހުށައަޅާފައިވާ އިތުރު ލިއެކިއުންތައް ޝަރީއަތަށް ބަލައިނުގަތުމަށްވެސް ދައުވާލިބޭ ފަރާތުން ހުށައަޅާފައިވެއެވެ.

ނަމަވެސް ހެކި ހާމަ ކުރުމުގެ މަސްއޫލިއްޔަތު ދެމިގެންދިއުމަކީ ދައުލަތަށްވެސް ދިފާއަށްވެސް ޖިނާއީ އިޖުރާއަތުގެ ޤާނޫނުގެ 135 ވަނަ މާއްދާގެ ދަށުން ލިބިދޭ ޙައްޤެއްކަމަށް ދައުލަތުގެ ވަކީލު ވިދާޅުވިއެވެ.

ގާޒީ ވިދާޅުވީ، އެ ހުށައެޅުމާމެދު ދެން އޮންނަ އަޑުއެހުމެއްގައި ގޮތެއް ނިންމަވާނެ ކަމަށެވެ.

ދެން އޮންނާނީ މި މައްސަލައިގެ ހެކިބަސް ނެގުމެވެ. އެގޮތުން އޭޕްރީލް 30 ގައި މި މައްސަލައިގެ އަޑުއެހުން އޮންނާނެއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.