ކުނީގެ މައްސަލަ ހައްލުކުރުމަށް ކޮމިއުނަލް ބިންތަކެއް ކަނޑައެޅުމުގެ ވިސްނުން އެބަ ހުރި - ވެމްކޯ
ކުނީގެ މައްސަލަ އަކީ ހައްލު ނުކުރެވި ގިނަ ދުވަސްވެފައިވާ މައްސަލަ އެއް
ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު
ކުނީގެ މައްސަލަ ހައްލުކުރުމަށް ކޮމިއުނަލް ބިންތަކެއް ކަނޑައެޅުމުގެ ވިސްނުން އެބަ ހުރި ކަމަށާއި އެކަމާއި މެދު ގޮތެއް ނިންމާނީ ކަމާއި ބެހޭ ފަރާތްތަކާއި އެކުގައި މަޝްވަރާކުރުމަށް ފަހުގައި ކަމަށް ވޭސްޓް މެނޭޖްމެންޓް ކޯޕަރޭޝަން ވެމްކޯ އިން ބުނެފިއެވެ.
ރާއްކެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން ވެމްކޯގެ މެނޭޖިން ޑިރެކްސްޓަރ ޔޫސުފް ސިރާޖް ވިދާޅުވީ ކުނީގެ މައްސަލަ ހައްލުކުރުމަށް ރާއްޖޭގައި ކުރަން ޖެހޭ މަސައްކަތްތައް އަދިވެސް ވަރަށް ގިނަ ކަމަށެވެ. ކުނީގެ މައްސަލަ ހައްލުކުރަން ދިމާވާ އެންމެ ބޮޑު އެއް ގޮންޖެހުމަކީ މާލޭގައި އިމާރާތްތައް ބިނާކޮށްފައިވާ ގޮތް ކަމަށް ވެސް އޭނާ ވަނީ ވިދާޅުވެފައެވެ. އެގޮތުން ރާއްޖޭގައި ޒަމާނުއްސުރެ އޮތް ސަޤާފަތުގެ ސަބަބުން ކުންޏަށް ޒިންމާވުމުގެ ސިފަ އާއްމުންގެ ކިބައިގައި އަށަގަނެފައި ނެތް ކަމަށާއި އެއީ ވަރަށް ދެރަ ކަމެއް ކަމަށް އޭނާ ވަނީ ވިދާޅުވެފައެވެ. ކުނި މަދު ސާފު މުޖުތަމައު އެއް ބިނާ ކުރެވޭނީ އެންމެންގެ އެއްބާރުލުން ލިބިގެން ކަމަށް ވެސް ސިރާޖް ވިދާޅުވިއެވެ.
ކުނީގެ މައްސަލަ އަކީ ހައްލު ނުކުރެވި ގިނަ ދުވަސްވެފައިވާ މައްސަލަ އަކަށް ވުމުން ކުނި މެނޭޖްކުރުމުގެ އިންތިޒާމްތައް ހަމަޖައްސަން ގޮންޖެހުންތައް ދިމާވާކަން ސިރާޖުވަނީ ފާހަގަކުރައްވާފައެވެ. އެގޮތުން ނިޒާމަށް ގެންނަ ބަދަލުތަކުގެ އަސަރު ފެންނަން ވެސް ދުވަސްކޮޅެއް ނަގާނެކަމަށް ސިރާޖް ވިދާޅުވިއެވެ. ނަމަވެސް މި އަހަރު ނިމުމުގެ ކުރިން ކުނި މެނޭޖްކުރުމުގެ ނިޒާމުން އެކަށީގެންވާ ބަދަލެއް ފެންނާނެ ކަަމުގެ އުންމީދު އެބަ އޮތް ކަމަށް ސިރާޖް ވިދާޅުވިއެވެ. މީގެ އިތުުރުން މާލޭގެ ކުނި ނެގުމުގެ އިންތިޒާމްތައް ހަމަޖެހިފައިވާ ގޮތަށް ބަލާ އިރު ކުނި ނަގަނީ ގޭގެ ދޮރުމަތިން ކަމަށާއި އެއީ ދުނިޔޭގެ އެހެން ތަންތަނާއި އަޅާ ބަލާ އިރު ވަރަށް ތަފާތު ގޮތެއް ކަމަށް ސިރާޖް ވިދާޅުވިއެވެ. ގިނަ ގޭގޭގައި ކުނި އަޅާނެ ޑަސްބިނެއް ބަހައްޓާނެ ޖާގަ ވެސް ތިރީ ފަންގި ފިލާގައި ނުހުންނަކަން އޭނާ ވަނީ ފާހަގަކުރައްވާފައެވެ. އެހެންކަމުން ގޭގެ ތިރީގައި ކުނި ބެހެއްޓުމަކީ ބައެއް ފަހަރު އެ ތަންތަން ހަޑިވާ ކަމަކަށް ވުމުން އެއީ ގޭބިސީތަކުގެ ކަންބޮޑުވުމެއް ކަަމަށް ސިރާޖް ވަނީ ވިދާޅުވެފައެވެ.
އެކަން ހައްލުކުރުމަށް ގެތައް އިމާރާތްކުރާ އިރު ކުނި މެނޭޖް ކުރެވޭނެ ގޮތަށް އިމާރާތްކުރާކަން ޔަގީން ކުރަން މޮނިޓަރކުރުމުގެ މަރުހަލާ އިތުރަށް ހަރުދަނާކުރަން ޖެހޭ ކަމަށް އޭނާ ވިދާޅުވިއެވެ. އަދި މިހާރު ވެމްކޯގެ ވިސްނުން ހުރީ ކޮމިއުނަލް ބިންތަކެއް ކަނޑައެޅުމަށް ފަހު އެތަންތަނަށް ކުނި އެޅޭނެ އިންތިޒާމް ހަމަޖެއްސުމަށް ކަމަށް ސިރާޖް ވިދާޅުވިއެވެ. އެހެންނަމަވެސް އެކަމާއި މެދު ގޮތެއް ނިންމާނީ ކަމާއި ގުޅޭ ސްޓޭކްހޯލްޑަރުންގެ ބަހެއް ހޯދުމަށް ފަހުގައި ކަމަށް ސިރާޖް ވަނީ ވިދާޅުވެފައެވެ.
އެކަމުގެ ސަބަބުން ކުނިނެގުމަށް ގޭބިސީތަކަށްދާ ވަގުތު ގެއަށް ނުވަދެވޭ މައްސަލައަށް ހައްލު ލިބޭނެ ކަމަށް އޭނާ ވަނީ ވިދާޅުވެފައެވެ. ސިރާޖު މިހެން ވިދާލުވެފައި ވާއިރު މީހުން ނޫޅުމުގެ ސަބަބުން ކުނި ނެރެވޭނެ އިންތިޒާމް ހަމަނުޖެހުމަކީ ވެމްކޯ އަށް ދިމާވާ ގޮންޖެހުމެކެވެ. އަދި ކުނި ނެރެން އޮންނަ ގަޑިއަށް ވުރެ މާބޮޑަށް ލަހުން ނުވަތަ ކުރިން ކުނި ނެރުމާއި، މަގުމަތީގައި ކުނި ބެހެއްޓުމުގެ މައްސަލަ ދަނީ ފެންމަތިވަމުންނެވެ. ވެމްކޯ އިން އިލްތިމާސްކުރަނީ ގޭގެ އެންމެ ތިރީ ފަންގިފިލާ އަށް ކުނި ނެރެފައި ބެހެއްޓުމަށެވެ.
