ޗެލްސީގެ ލިސްޓުން ނާގަލްސްމަން އާއި އެންރީކޭ ބޭރުވެއްޖެ، ޕޮޗެޓީނޯއާއެކު މަޝްވަރާތައް ކުރިއަށް

ޗެލްސީގެ ކޯޗަކަށް ގެންނަން ބޭނުންވާ ކެންޑިޑޭޓުންގެ ލިސްޓުން ޖަރުމަނުގެ ހޫލިއަން ނާގަލްސްމަން އާއި ސްޕެއިންގެ ލުއިސް އެންރީކޭ ބޭރުވީއިރު، މައުރީސިއޯ ޕޮޗެޓީނޯއާއެކު މަޝްވަރާތައް ކުރިއަށްދާ ކަމަށް ބޭރުގެ މީޑިއާ ރިޕޯޓުތައް ބުނެފި އެވެ.

އެންމެ ފަހުން ޗެލްސީގެ ކޯޗުކަމުގައި ހުރި ގްރަހަމް ޕޮޓާ ވަކި ކުރުމަށްފަހު، އެ މަގާމަށް ކުރީގެ ކޯޗު ފްރޭންކް ލަމްޕާޑު ހަމަޖެއްސީ ވަގުތީ ގޮތުންނެވެ. އެއީ މި ސީޒަންގެ ނިޔަލަށެވެ. އެއަށްފަހު ޗެލްސީން އަންނަނީ ދާއިމީ ކޯޗެއް ހޯދުމުގެ މަސައްކަތް ކުރަމުންނެވެ. އެގޮތުން ޗެލްސީން ގެންނަން ބޭނުންވާ ކޯޗުންގެ ލިސްޓުގައި ނާގަލްސްމަން، އެންރީކޭ އަދި ޕޮޗެޓީނޯގެ ނަން އޮތެވެ. ނަމަވެސް ޗެލްސީގެ ލިސްޓުން ނާގަލްސްމަން ބޭރުވެފައިވާ ކަމަށް ރިޕޯޓުތައް ބުނީ އޭނާއާއެކު ކުރި މަޝްވަރާ އިން އަލި މަގެއް ނުފެނުމުންނެވެ. ގިނަ މަޝްވަރާތަކެއް ކުރިއަށް ގެންދިޔައިރު، ނާގަލްސްމަން އެ މަގާމާ ހަވާލުވާން ބޭނުންނުވީ ކަމަށް ވެސް ރިޕޯޓުތައް ވަނީ ބުނެފަ އެވެ.

އެކަމާ ގުޅިގެން ޖަރުމަނުގެ ނޫހަކުން ނާގަލްސްމަނާ ސުވާލު ކުރުމުން އޭނާ ބުނީ، ކަމެއް ކެންސަލް ކުރަން ޖެހޭނީ އެހެން ކަމަކަށް ކޮމިޓުވެފައި ކަމަށެވެ. އެ ނޫހުގައި ބުނެފައިވާ ގޮތުން ޗެލްސީގެ ކޯޗުކަމާ ނާގަލްސަމަން ހަވާލުވާން ބޭނުންނުވީ އަންނަ ސީޒަނުގެ ޔުއެފާ ޗެމްޕިއަންސް ލީގުގެ ޖާގައެއް އެ ޓީމަށް ނުލިބޭތީ އެވެ. އިނގިރޭސި ޕްރިމިއާ ލީގުގައި މި ސީޒަންގައި ޗެލްސީގެ ފަރާތުން ފެންނަމުން އަންނަ ކުޅުމަށް ބަލާއިރު، އަންނަ ސީޒަންގެ ޗެމްޕިއަންސް ލީގުން އެ ޓީމު ނުފެނުމަކީ ގާތް ކަމެކެވެ.

ނާގަލްސްމަންގެ އިތުރުން ކުރިން ސްޕެއިން ޤައުމީ ޓީމުގެ ކޯޗަކަށް ހުރި އެންރީކޭ ވެސް ވަނީ އެ ލިސްޓުން ބޭރުވެފައި ކަމަށް ރިޕޯޓުތައް ބުނެ އެވެ. އަލުން އަނބުރާ ކުލަބު ފުޓުބޯޅަ އަށް އަންނަން ބޭނުންވާކަން ވެސް ހާމަކޮށްފައިވާ އެންރީކޭ ޗެލްސީގެ ލިސްޓުން ބޭރުވީ އެ ކުލަބުން ބޭނުންވެގެން ކަމަށް ރިޕޯޓުތައް ބުނެ އެވެ. މީގެ އިތުރުން ރިޕޯޓުތައް ބުނާ ގޮތުގައި ޗެލްސީން މިހާރު މަޝްވަރާ ކުރަމުން އަންނަނީ ކުރިން އިނގިރޭސި ޕްރިމިއާ ލީގުގެ ޓޮޓެންހަމާއި، ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ) އަށް ވެސް އިރުޝާދު ދީފައިވާ ޕޮޗެޓީނޯއާ އެވެ. އެގޮތުން އެކަމުގެ މަޝްވަރާތައް މިދިޔަ ހަފްތާގައި ކުރިއަށް ދިޔަ ކަމަށާއި، ކުރިއަށް އޮތް ދުވަަސްތަކުގައި އިތުރު މަޝްވަރާތައް ވެސް ކުރިއަށްދާނެ ކަމަށް ރިޕޯޓުތައް ބުނެ އެވެ.

ނަތީޖާ ދަށްވުމުގެ ސަބަބުން ޗެލްސީން ވަނީ ގާތްގާތުގައި ކޯޗުން ވަކި ކުރަން ފަށައިފަ އެވެ. ލަމްޕާޑު ވަކި ކުރުމަށްފަހު އެ މަގާމަށް ގެނައީ ތޯމަސް ޓުޗެލް އެވެ. ނަމަވެސް ކުލަބުގެ ވެރިން ބަދަލުވެ އޭނާ ވަކިކޮށް ގެނައީ ޕޮޓާ އެވެ. ޗެލްސީ މިހާރު އޮތީ ޕްރިމިއާ ލީގުގެ 11 ވަނައިގަ އެވެ.