ޕްރެޒިޑެންޓްސް ކަޕްގެ ގްރޫޕް އޭގައި ކުލަބް އީގަލްްސް އާއި ސުޕަ ޔުނައިޓެޑު ސްޕޯޓްސް (ސަސް) ކުޅުނު މެޗު ފަހަތުން އަރައި އީގަލްސް އިން ކާމިޔާބުކޮށްފި އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗަށް ނިކުތްއިރު ސަސް އޮތީ ކުޅުނު ފުރަތަމަ މެޗުގައި އެންމެ ފަހުގެ ޗެމްޕިއަން ވެލެންސިއާ ބަލިކޮށްފަ އެވެ. މިއީ މުބާރާތުގައި އީގަލްސްގެ ފުރަތަމަ މެޗެވެ. މެޗުގައި ސަސް އިން ރަނގަޅަށް ކުޅެމުން ދަނިކޮށް އެ ޓީމަށް މައްސަލަ ދިމާވީ، އަލީ އަޝްފާގު (ދަގަނޑޭ) އަށް އަނިޔާވެ ބަދަލު ކުރަން ޖެހުމުންނެވެ. އީގަލްސްއިން މެޗު ކާމިޔާބުކުރީ ސަސް އިން ދެ ލަނޑު ޖަހައި ކުރި ހޯދާފައި ވަނިކޮށެވެ. މެޗު ފަށައިގެން ދިހަ ވަނަ މިނެޓުގައި ސަސް އިން ވަނީ ލަނޑު ޖަހައި ލީޑު ނަގައިފަ އެވެ. އެއީ ސަސްގެ އައިހަމް އަޙުމަދު ނަގައިން ހުރަހަކުން ބޮލުން ބޯޅަ ގޯލަށް ވައްދާލަައިގެން ދަގަނޑޭ ޖަހައިދިން ލަނޑެކެވެ. އޭގެ ފަހުން އީގަލްސް އިން ވެސް ވަނީ ސަސްގެ އޭރިޔާ ތެރޭގައި ނުރައްކާތެރި ހަމަލާތަކެއް އުފެއްދުމަށް މަސައްކަތްކޮށްފަ އެވެ. އީގަލްސް އިން ނަތީޖާ ހަމަހަމަ ކުރުމަށް މަސައްކަތް ކުރަމުން ދަނިކޮށް 25 ވަނަ މިނެޓުގައި އީގަލްސްގެ ގޯލް ކީޕަރު މުޙައްމަދު ޝަފީއު ދަގަނޑޭ އަށް ކުރި ފައުލަކަށް ވަނީ ޕެނަލްޓީއެއް ދީފަ އެވެ. އެއަނިޔާއާއެކު ދަގަނޑޭ ދަނޑުން ބޭލިނަމަވެސް, އައިހަމް އަހުމަދު ޕެނަލްޓީ ކާމިޔާބުކޮށް ލީޑް ފުޅާކޮށްދިނެވެ. ދަގަނޑޭގެ ބަދަލުގައި ކުޅެން ނިކުތީ އަލީ ނަސޫހް ރަޝީދު އެވެ. އޭގެ ފަހުން ވެސް ފުރަތަމަ ހާފު ނިމުމުގެ ކުރިން އީގަލްސް އަށް ވަނީ ލަނޑު ޖެހުމަށް ރަނގަޅު ފުރުސަތުތައް ލިބިފަ އެވެ. ނަމަވެސް އެ ޓީމަށް އެއްވެސް ފުރުސަތެއްގެ ބޭނުމެއް ނުހިފުނެވެ.

ދެ ވަނަ ހާފުގައި އީގަލްސް އިން ވަނީ އަނިޔާގައިހުރި އަޙުމަަދު ރިޒުވާން (ރިޒޭ) ކުޅެން އަރުވައިފަ އެވެ. ދެ ވަނަ ހާފު ފަށައިގެން 22 ވަނަ މިނެޓުގައި އީގަލްސް އިން ވަނީ ލަނޑު ޖަހައި ފަރަގު ކުޑަކޮށްފަ އެވެ. ރިޒޭ ނަގައިދިން ހުރަހެއްގައި ބޮލުން ބޯޅަ ގޯލަށް ފޮނުވާލައިގެން އީގަލްސް އަށް ފަރަގު ކުޑަ ކޮށްދިނީ ބިދޭސީ ކުޅުންތެރިޔާ ފްރަންކާ އިވާން ކާލޯސް އެވެ. އޭގެ ފަހުން އީގަލްސް އަށް ލިބުނު ހިލޭ ޖެހުމެއްގައި ރިޒޭ ފޮނުވާލި ނުރައްކާތެރި ބޯޅަ ސަސްގެ ގޯލް ކީޕަރު ޔޫސުފް މީސަމް ވަނީ މަތަކޮށްފަ އެވެ. އީގަލްސް އިން މެޗުގެ ނަތީޖާ ހަމަހަމަ ކުރީ 72 ވަނަ މިނެޓުގަ އެވެ. އެއީ އިބްރާހީމް މުބީން އަޙުމަދު ރަޝީދު (މުއްކި) ދިން ބޯޅައެއް ގޯލަށް ފޮނުވާލައިގެން އިބްރާހީމް މަހުދީ ޙުސެއިން ކާމިޔާބުކޮށްދިން ލަނޑެކެވެ. މިއީ އިއްބެ އީގަލްސްއަށް ބަދަލުވެ ޖެހި ފުރަތަމަ ލަނޑެވެ. އޭގެ ތިން މިނެޓު ފަހުން އީގަލްސް އަށް ލީޑު ނަގައިދިނީ އިމްރާން ނަޝީދު އެވެ. އެއީ ޢަބްދުﷲ ހަނީފް (ބެންޖޯ) ދިން ބޯޅައެއް ތިރިތިރިން ގޯލަށް ވައްދާލައިގެންނެވެ. އޭގެ ފަހުން 89 ވަނަ މިނެޓުގައި އީގަލްސް އަށް ވަނީ ޕެނަލްޓީއެއް ދީފަ އެވެ. އެއީ ސަަސްގެ ގޯލްކީޕަރު ޔޫސުފް އީގަލްސްގެ ރިޒޭ އަށް ކުރި ފައުލަކަށް ދިން ޕެނަލްޓީއެކެވެ. އެއާއެކު ޔޫސުފަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކައިފަ އެވެ. އީގަލްސް އަށް ލިބުނު ޕެނަލްޓީ ކާމިޔާބުކޮށް އެ ޓީމަށް މެޗުން ފުރިހަމަ މޮޅެއް ހޯދައިދިނީ ރިޒޭ އެވެ.

މުބާރާތުގައި އީގަލްސް އަށް ދެން އޮންނާނީ ވެލެންސިއާއާ ދެކޮޅަށް ކުޅޭ މެޗެވެ. މި މަހުގެ 24 ވަނަ ދުވަހު ކުޅޭ އެ މެޗު އެއްވަރުކޮށްލައިގެން ވެސް އީގަލްސް އަށް ސެމީ ފައިނަލްގެ ޖާގައެއް ޔަޤީން ކުރެވޭނެ އެވެ.