އަނބިމީހާއަށް ގެވެށި އަނިޔާކުރި މައްސަލަ ސާބިތެއް ނުވި: ވަޅި ހެރުނީ ނިދީގައި ފުރޮޅެމުންކަމަށް އަނބިމީހާ ބުނޭ
އަނބިމީހާ ހެކިބަސް ދީފައިވަނީ ތަހުގީގުގައި ދީފައިވާ ބަޔާނާ ޚިލާފަށް
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށް
މާލޭ ގެއެއްގައި ބިދޭސީ އަންހެނަކަށް ގެވެށި އަނިޔާކުރި މައްސަލައިގައި ހައްޔަރުކުރި ބިދޭސީ މީހާއަށް ކުރާ ދައުވާ ސާބިތުނުވާކަމަށް ޙުކުމް ކޮށްފިއެވެ.
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.
މި މައްސަލައިގެ ޚުލާސާ ބަޔާން އިއްވާފައިވަނީ 15 ފެބްރުއަރީ 2023 ގައެވެ.
ދައުލަތުން އޭނާގެ މައްޗަށް ކޮށްފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
އަންގާރަ ދުވަހު އޮތީ މި މައްސަލައިގެ ޙުކުމް ކުރުމެވެ.
އޭނާ އަނބިމީހާއަށް ޙަމަލާ ދީފައިވަނީ އަނބިމީހާ ނިދާފައި އޮއްވައިކަމަށް ދައުލަތުން ބުނެއެވެ.
އޭނާގެ އަނބިމީހާ ބުނެފައިވާ ގޮތުގައި އެ ޙާދިސާ ހިނގިއިރު ދެމީހުން ދިރިއުޅެމުން ދިޔައީ އެއް ގެއެއްގައެވެ. އެރޭ އޭނާ ނިދަން އޮތީ ސިޓިންގ ރޫމުގައި ކަމަށާއި، އޭނާއަށް ހޭލެވުނީ ފަތިހުކަމަށް ބުނެފައިވެއެވެ.
އޭނާ ހެކިބަސް ދީފައިވަނީ ތަހުގީގުގައި ދީފައިވާ ބަޔާނާ ޚިލާފަށެވެ. އެގޮތުން ހެކިބަސް ދެމުން އޭނާ ބުނެފައިވަނީ އޭނާ ނިދަން އޮތީ ސިޓީންގ ރޫމުގައި އޭނާ ތަރުކާރީ ކޮށަން ހުންނަ ތަނާ ދިމާލުގައި ކަމަށެވެ.
އެތަނުގައި އާންމުކޮށް ވަޅި ފަދަ ތަކެތި ހުންނަކަމާއި، އަދި އޭނާގެ ގަޔަށް ވަޅި ހެރިފައިވަނީ ނިދީގައި ފުރޮޅެމުން ކަމަށް ބުނެ އޭނާ ވަނީ އޭނާ ތަހުގީގުގައި ބަޔާން ދިން ގޮތާ ޚިލާފަށް ހެކިބަސް ދީފައެވެ. އޭނާ ބުނާ ގޮތުގައި އެގޮތަށް ކުރިން ބުނެފައިވަނީ ފުލުހުން އޭނާ ޑީޕޯޓު ކޮށްލާނެ ކަމަށް ބުނެ ބިރުދައްކާތީއެވެ.
އެހެންނަމަވެސް އޭނާ ސީންގައި ހުރެ ފުލުހުން ގާތުގައި ބުނެފައިވަނީ އޭނާއަށް ޙަމަލާދިނީ ފިރިމީހާ ކަމަށެވެ. އެކަން ބަޔާންކޮށް ސީން އޮފް ކްރައިމް އޮފިސަރުން ވަނީ ހެކިބަސް ދީފައެވެ. ނަމަވެސް މި މައްސަލައިގެ ސީންއަށް ދިޔަ ފުލުހުންގެ ހެކިބަހުގައި އަނިޔާވި ފަރާތް ބުނި ބުނުން ކިޔާދީފައިވާ ގޮތް ތަފާތެވެ.
ގާޒީ ވިދާޅުވީ، ދައުލަތުން ހުށައަޅާފައިވާ ހެކިތަކަށް ބަލާއިރު، ދައުވާގައި ބަޔާންކޮށްފައިވާ ފަދައިން އޭނާ އަނބިމީހާއަށް ޙަމަލާ ދިންކަން އެކަށީގެންވާ ޝައްކެއް ނެތް މިންވަރަށް ސާބިތު ކޮށްފައި ނުވާ ކަމަށެވެ.
މި ޙާދިސާއާ ގުޅޭ ވީޑިއޯއެއް އާންމުވެފައިވާއިރު، ވީޑިއޯއިން ފެންނަނީ ގެއެއްގެ ސިޑިމަތިން ފުލުހުންގެ އެހީތެރިކަމާއެކު އެ އަންހެންމީހާ ފައިބައިގެންދާ މަންޒަރެވެ. އޭނާ ލައިގެން ހުރި ހެދުމުގެ ފަސްބައިގައި ވަރަށް ގިނަ ލޭ ހުއްޓެވެ.
