މަސައްކަތުގެ މާޙައުލުގެ ސަލާމަތާއި ޞިއްޙީ ރައްކާތެރިކަމުގެ ބިލުގެ މަސައްކަތް އަވަސްވުން މުހިންމު: ޓޭމް
11 އެޕްރީލު 2023 | އަންގާރަ 05:02މުދައްރިސުންގެ ހައްގުތައް ހޯދުމަށް ކުރާ މަސައްކަތަށް ޤާނޫނީ ހައިސިއްޔަތު ހޯދަން ބިލު މުހިންމު
ޓީޗަރސް ކޮންފަރެންސްގެ ތެރެއިން
ސަރުކާރުގެ ފަރާތުން ހުށަހަޅުއްވާފައިވާ، މަސައްކަތުގެ މާޙައުލުގެ ސަލާމަތާއި ޞިއްޙީ ރައްކާތެރިކަމުގެ ބިލު އަވަހަށް ނިމުމަކީ މުދައްރިސުންގެ ވަަރަށް ބޮޑު އުންމީދެއް ކަަމަށް ޓީޗަރސް އެސޯސިއޭޝަން (ޓޭމް)އިން ބުނެފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުން ޓޭމްގެ ރައީސް އަލީ ނާޒިމް ވިދާޅުވީ، ބާރަށު ދާއިރާގެ މެންބަރު އަޙްމަދު ޢަބްދުﷲ މަޖިލީހަށް ހުށަހަޅުއްވާ މަސައްކަތުގެ މާޙައުލުގެ ސަލާމަތާއި ޞިއްޙީ ރައްކާތެރިކަމުގެ ބިލަކީ ވަރަށް ގިނަ މަސައްކަތްތެރިންގެ އުންމީދާއި ގުޅިފައިވާ ބިލެއް ކަމަށެވެ. އެހެންކަމުން އެހެން މަސައްކަތްތެރިންނެކޭ އެއްފަދައިން މުދައްރިސުންވެސް އެދެނީ އެ ބިލުގެ މަސައްކަތް އަވަސްވުން ކަމަށް އޭނާ ވިދާޅުވިއެވެ. ސަބަބަކީ މުދައްރިސުންގެ ހައްގުތައް ހޯދުމަށް ކުރާ މަސައްކަތަށް ޤާނޫނީ ހައިސިއްޔަތު ހޯދަން އެ ބިލާއި އެކު ފަސޭހަވެގެން ދިއުން ކަމަށް ވެސް އޭނާ ވިދާޅުވިއެވެ. އެގޮތުން މުދައްރިސުންނަށް ލިބިދޭންޖެހޭ ފުރިހަމަ ރައްކާތެރިކަން ހޯދާދޭން އެ ބިލް ފާސްވުމުން ފަސޭހަވެގެންދާނެކަމަށް އޭނާ ވިދާޅުވިއެވެ.
ނާޒިމް ވަނީ މިހާރުވެސް މުދައްރިސުންނަށް ލިބެން ޖެހޭ ބައެއް ހައްގުތައް ނުލިބޭކަން ފާހަގަކުރައްވާފައެވެ. އެގޮތުން ސްކޫލްތަކުގެ މަސައްކަތްތައް އިންތިޒާމްވެފައި ހުންނަ ގޮތުން ގިނަ ވަގުތު މަސައްކަތުގައި އުޅެން ޖެހުނު ނަމަވެސް އިތުރުގަޑީގެ ފައިސާ ދިނުމުގައި އެހެން މަސައްކަތްތެރިންނާއި މުދައްރިސުންނާއި ވަރަށް ބޮޑަށް ތަފާތުކުރުންތަކެއް އެބަ ހުރިކަމަށް އޭނާ ވިދާޅުވިއެވެ. މުދައްރިސުންގެ މަސައްކަތަށް ގިނަ މީހުން ނުނިކުންނަ ސަބަބަކީ ވެސް މުދައްރިސުންގެ ވަޒީފާ އަކީ ވަރަށް ބުރަބޮޑު ވަޒީފާ އަކަށްވުން ކަމަށް އޭނާ ވިދަޅުވިއެވެ.
މަސައްކަތުގެ މާހައުލުގެ ރައްކަތެރިކަމާއި ވަޒީފާ އަދާ ކުރާ މީހުންގެ ހައްގުތައް ކަށަވަރުކޮށް ދިނުމަށް ބޭނުންވާ އޮނިގަނޑު އެކުލެވޭ މި ބިލު ސަރުކާރުގެ ފަރާތުން މަޖިލީހަށް ފޮނުވާފައިވަނީ މިދިޔަ އަހަރުއެވެ. މި ބިލުގެ ސަބަބުން މަސައްކަތުގެ މާހައުލުގައި ލިބޭ ގެއްލުމަށް ބަދަލު ލިބޭ ނިޒާމެއް އެކުލަވާލުމަށް މަގުފަހިވެގެންދާނެއެވެ. މީގެއިތުރުން މަސައްކަތުގެ މާހައުލުގައި ދިމާވާ އެކްސިޑެންޓުތަކާއި ހާދިސާތަކުގެ ސަބަބުން މަސައްކަތްތެރިންނާއި މަސައްކަތުގެ މާހައުލުގައި ހަރަކާތްތެރިވާ އެ ނޫން ވެސް ފަރާތްތަކަށް ލިބޭ އަނިޔާ އާއި ގެއްލުންތައް ރިޕޯޓުކޮށް މައްސަލަ ބަލާ ފިޔަވަޅު އެޅޭނެ ނިޒާމެއް ޤާއިމު ކުރުމަށް ވަނީ ހުށަހަޅާފައެވެ.
ހަމައެހެންމެ މަސައްކަތުގެ މާހައުލަކީ ސިއްހީގޮތުން ރައްކާތެރިތަނެއްކަން ކަށަވަރުކޮށްދިނުމަށް ބޭނުންވާ އަސާސީ އުސޫލުތައް ކަނޑައެޅުމަށް ވެސް އެ ބިލުގައި ވަނީ ހިމަނާފައެވެ. އަދި މަސައްކަތުގެ މާހައުލުން ދިމާވެދާނެ ބަލިތައް ކަނޑައަޅައި، އެފަދަ ބަލިތަކާއި އެ ނޫން ވެސް މަސައްކަތުގެ މާހައުލުގައި ދިމާވެދާނެ ނުރައްކާތަކާއި ގެއްލުންތަކުން އެފަދަ ފަރާތްތައް ރައްކާތެރިކުރުމުގެ އުސޫލުތައް ކަނޑައެޅުމަށް އެ ބިލުގައި ހުށަހަޅާފައިވެއެވެ. މީގެ އިތުރުން ސިއްހަތާއި ސަލާމަތާއި ގުޅޭ ނިންމުންތަކާއި ދިމާވާ މައްސަލަތައް ހައްލުކުރުމުގައި ބަސްބުނުމުގެ ފުރުސަތު ހޯދައިދިނުމުގެ ނިޒާމެއް ގާއިމްކޮށްދިނުމަށް ވެސް މި ބިލުގައި ހިިމަނާފައިވެއެވެ.
