ފުއްގިރި މައްސަލަ ސަންއަށް ނާކާމިޔާބު: "ހީއެއްގެ މައްޗަށް ބިނާކޮށް ދައުލަތުގެ ނިޒާމެއްގެ އަސާސީ ސިފަތައް ގެއްލުވައެއް ނުލެވޭނެ"
މިއީ އިސްތިއުނާފީ އޮޅިގަނޑު ގިރާކުރާ ބަވަތުގެ މައްސަލައެއް ނޫން
ރ. ފުއްގިރި ހިޔާނާތުގެ މައްސަލައިގެ ޝަރީއަތުގެ ކުރީގެ ހުށައެޅުންތަކާއި ގުޅޭގޮތުން ސަން ކުންފުނިން ހައިކޯޓުގައި އިސްތިއުނާފު ކޮށްފައިވާ މައްސަލަ
ރ ފުއްގިރި ހިޔާނާތުގެ މައްސަލައިގެ ޝަރީއަތުގެ ކުރީގެ ހުށަހެޅުންތަކާ ގުޅޭގޮތުން، ސަން ކޮންސްޓްރަކްޝަން އެންޑް އިންޖިިނިޔަރިންގ ޕްރައިވެޓް ލިމިޓެޑާއި ސަން އިންވެސްޓްމަންޓުގެ ފަރާތުން ހައިކޯޓުގައި އިސްތިއުނާފުކޮށްފައިވާ މައްސަލަ އެ ކުންފުނިތަކަށް ނާކާމިޔާބުވެއްޖެއެވެ.
ރ ފުއްގިރި ހިޔާނާތުގެ މައްސަލައިގެ ޝަރީއަތުގެ ކުރީގެ ހުށަހެޅުންތަކާ ގުޅޭގޮތުން، ސަން ކޮންސްޓްރަކްޝަން އެންޑް އިންޖިިނިޔަރިންގ ޕްރައިވެޓް ލިމިޓެޑާއި ސަން އިންވެސްޓްމަންޓުގެ ފަރާތުން ހައިކޯޓުގައި އިސްތިއުނާފުކޮށްފައިވާ މައްސަލައިގެ އަޑުއެހުންތައް ނިންމާލާފައިވަނީ 2 އޭޕްރީލް 2023 ގައެވެ.
އެގޮތުން ބަލާއިރު، އިސްތިއުނަފީ ނުކުތާތަކުގެ ގޮތުގައި އެ ކުންފުނިތަކުން ހުށަހަޅާފައިވަނީ އެންމެ ނުކުތާއެކެވެ. އެއީ ހެކި ހާމަކުރުމާ ގުޅޭގޮތުން ދަށު ކޯޓުން ނިންމި ނިންމުމެވެ.
ހައިކޯޓުގައި މި މައްސަލައިގެ ބެންޗު ބަލަހައްޓަވާފައިވަނީ ފަނޑިޔާރު ދީބާނާޒް ފަހުމީއެވެ. ދެން ހިމެނިވަޑައިގަންނަވަނީ ފަނޑިޔާރު ހުސައިން ޝަހީދު އަދި ފަނޑިޔާރު ފާތިމަތު ފަރުހީޒާއެވެ.
ހޯމަ ދުވަހު އޮތީ މި މައްސަލައިގެ ޙުކުމް ކުރެއްވުމެވެ. އެގޮތުން މިއީ އިސްތިއުނާފީ އޮޅިގަނޑު ގިރާ ކުރެވޭ ބާވަތުގެ މައްސަލައެއްތޯ ބަލާއިރު، ދަށު ކޯޓުން ފަނޑިޔާރަކު އެ ފަނޑިޔާރެއްގެ އިހުތިޔާރު ބޭނުން ކޮށްފައިވާ ގޮތުގެ ތެރެއަށް އިސްތިއުނާފީ ކޯޓަކުން ވަނުމަކީ މަދު ޙާލަތެއްގައި މެނުވީ ނުކުރާނެ ކަމެއްކަމަށް ސުޕްރީމް ކޯޓުގެ ނިންމުމެއްގައި ބަޔާންކޮށްފައިވާކަަމަށް ފަނޑިޔާރު ދީބާނާޒް ވިދާޅުވިއެވެ.
އެ ނިންމުމުގައި ބަޔާންކޮށްފައިވަނީ ފަނޑިޔާރުގެ އިހުތިޔާރު ބޭނުންކޮށްފައިވާ ގޮތް ގޯސްނަމަ، އެ ޙާލަތު އިސްތިއުނާފުގައި ތަފްސީލުކޮށް ބަޔާންކޮށްދޭންވާނެ ކަމަށެވެ.
އޭގެ އިތުރުން، ޝަރީއަތުގެ ނިޒާމުގެ 3 މަރުޙަލާގެ މާނައަކީ ދަށު ކޯޓުން ހުށައެޅޭ ދައުވާއެއް އެ އޮތް ގޮތަށް އަލުން 3 ފަހަރު ބެލުން ނޫން ކަމަށާއި، ފަނޑިޔާރު މައްސަލައެއް ބަލަންވާ ވަރަށް ނުބަލާކަމަށް ތުހުމަތު ކުރެވުމަކީ މައްސަލައެއް އިސްތިއުނާފު ކުރުމަށް އޮތް ހަރުދަނާ ސަބަބެއް ނޫންކަމަށްވެސް ސުޕްރީމް ކޯޓުގެ ނިންމުމެއްގައި ބަޔާންކޮށްފައިވާކަމަށް ފަނޑިޔާރު ވިދާޅުވިއެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، އިސްތިއުނާފު ފޯމުގައި ބަޔާންކޮށްފައިވާ ކަންކަމަކީ އިސްތިއުނާފީ އޮޅިގަނޑު ގިރާކުރާ ބަވަތުގެ މައްސަލައެއް ނޫންކަމަށް ފަނޑިޔާރު ވިދާޅުވިއެވެ. ނަމަވެސް މިއީ ހައިކޯޓުގައި މައްސަލަ ރަޖިސްޓްރީ ކުރުމުގެ ކުރިން އިދާރީ ގޮތުން ކަށަވަރު ކޮށްފައި އޮންނަން ޖެހޭނެ ކަމެއްކަމަށްވެސް ފަނޑިޔާރު ވިދާޅުވިއެވެ. ފަނޑިޔާރު އިތުރަށް ވިދާޅުވީ، އެކަންކަން އެހެން ހުރި ނަމަވެސް މި މައްސަލަ ހައިކޯޓުގައި ރަޖިސްޓްރީ ކުރުމަށްފަހު ބޭއްވި ޝަރީއަތުގެ މަޖިލީހުގައި އިސްތިއުނާފީ ނުކުތާއާއި ގުޅިގެން އިތުރަށް ދެކެވުނު ވާހަކަތަކުގެ ތެރޭގައި ފަނޑިޔާރުގެ އިހުތިޔާރު ބޭނުންކޮށްފައިވަނީ ނުރަނގަޅު އުސޫލެއްގެ މައްޗަށްކަން ސުވާލު އުފައްދައި ވާހަކަ ދެކެވިފައިވާ ކަމަށެވެ.
ވުމާއެކު އެއީ ހައިކޯޓުން ގޮތެއް ނިންމަންޖެހޭ ނުކުތާއެއްކަމަށް ދެކިލައްވާކަމަށް ފަނޑިޔާރު ވިދާޅުވިއެވެ.
ސަން ކުންފުނިތަކުގެ ފަރާތުން ބައެއް ހެކި ރައްކާތެރިކުރުމަށް ދަށު ކޯޓުގައި އެދުނެވެ. ނަމަވެސް އެ ހެކިތައް ދައުލަތަށް ދޫކުރުމަށް ގާޒީ ނިންމަވާފައިވާތީ، ސަން ކުންފުނިން އެ ނިންމުން ހައިކޯޓުގައި އިސްތިއުނާފުކުރީއެވެ.
އިސްތިއުނާފުގައި ބަޔާންކޮށްފައިވާ ގޮތުގައި އެ ހެކިތައް ހާމަކޮށްފިނަމަ ކުންފުނީގެ މުވައްޒަފުންނަށް ނުރައްކަލާ ކުރިމަތިވެ، މާލީ ގޮތުން ބޮޑު ގެއްލުމެއް ވެދާނެއެވެ.
އޭގެތެރޭގައި، ކުންފުނީގެ އިންޓަރނަލް މެމޯގެ ދަށުން ތަހުގީގު ޓީމުން ތަހުގީގުކުރުމަށްފަހު ކުންފުނީގެ ބައެއް މުވައްޒަފުންނާ ސުވާލު ކުރުމުން ދީފައިވާ ބަޔާންތައް ހިމެނެއެވެ.
އެހެންނަމަވެސް، ކުންފުނީގެ މުވައްޒަފުންނަށް ނުރައްލެއް އޮތްކަމަށް އިސްތިއުނާފު ކުރާ ފަރާތުން ބުނާ ބުނުމެއް ފިޔަވައި އިތުރު ހެކި ޤަރީނާއެއް ނެތްކަމަށް ފަނޑިޔާރު ދީބާނާޒް ފަހުމީ ވިދާޅުވިއެވެ.
ހެކި ދޫކުރުމަށް ކުންފުނިން ދެކޮޅުހަދާ މައިގަނޑު ސަބަބަކީ ދައުލަތަށް އިތުބާރު ނުކުރެވުމާއި، ހެކިންގެ މައުލޫމާތު ލީކުވެ އާންމުވެދާނެކަމަށް ބެލެވުމެވެ. ނަމަވެސް އެ ހުށައެޅުން ބިނާކުރާ ޤާނޫނީ އަސާސެއްވެސް އިސްތިއުނާފުގައި ބުނެދެވިފައިނުވާކަމަށް ފަނޑިޔާރު ވިދާޅުވިއެވެ. ދައުލަތުގެ އިދާރާއަކުން ނުރަނގަޅު ކަމެއް ކުރާނަމަ، އެ އިދާރާއެއް ޖަވާބުދާރީ ކުރެވޭނެ ގޮތްތައް ހުންނާނެކަން ފާހަގަ ކުރައްވައި ފަނޑިޔާރު ވިދާޅުވީ، މިއީ ދައުލަތުގެ ނިޒާމު ހިނގާނެ އާންމު އުސޫލު ކަމަށާއި، ހީކުރެވޭ ކަންކަމުގެ މައްޗަށް ބިނާކޮށް ދައުލަތުގެ ނިޒާމެއްގެ އަސާސީ ސިފަތައް ދޫކޮށްލުމަކީ ޤާނޫނީ ގޮތުން ބަލައިގަނެވޭނެ ކަމެއް ނޫން ކަމަށެވެ.
ވުމާއެކު، ދަށު ކޯޓުގެ ނިންމުމަކީ ޤާނޫނީ އުސޫލަކާ ޚިލާފު ނިންމުމެއްކަމަށް ބެލެވެން ނެތްކަމަށް ފަނޑިޔާރު ދީބާނާޒް ފަހުމީ ވިދާޅުވިއެވެ. އެ ރައުޔަށް ފަނޑިޔާރު ފާތިމަތު ފަރުހީޒާވެސް ވަނީ ތާއީދު ކުރައްވާފައެވެ.
ފަނޑިޔާރު ހުސައިން ޝަހީދު ވިދާޅުވީ، މިއީ އިސްތިއުނާފީ އޮޅިގަނޑު ގިރާ ކުރެވޭނެ މައްސަލައެއް ނޫން ކަމަށާއި، މި މައްސަލައިގެ ހުށައެޅިފައިވާ ނުކުތާތަކާމެދު ގޮތެއް ކަނޑައަޅާނެ ތަނެއް އޮތްކަމަށްވެސް ދެކިނުލައްވާ ކަމަށެވެ.
