ގުރައިދޫ ދާއިރާގެ ބައި އިލެކްޝަން އަށް ފުރިހަމައަށް ތައްޔާރު، ބޮޑު ޝަކުވާ އެއް ނެތް - އީސީ
9 އެޕްރީލު 2023 | އާދީއްތަ 10:20ގުރައިދޫ ދާއިރާގެ ބައި އިލެކްޝަން ބާއްވަނީ އެ ދާއިރާގެ މެމްބަރުކަމުގައި ހުންނެވި ޕީޕީއެމްގެ މެމްބަރ އިބްރާހިމް ރިޒާ ފެބްރުއަރީ މަހުގެ 23 ވަނަ ދުވަހު އަވަހާރަވުމާ ގުޅިގެން
ގުރައިދޫ ދާއިރާގެ ބައި އިލެކްޝަންގައި ވާދަކުރައްވާ ކެންޑިޑޭޓުން
ގުރައިދޫ ދާއިރާގެ ބައި އިލެކްޝަން އަށް ފުރިހަމަ އަށް ތައްޔާރުވެފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
އެ ކޮމިޝަންގެ ރައީސް ފުޢާދު ތައުފީގް "ރާއްޖެ އެމްވީ" އަށް ވިދާޅުވީ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި އިލެކްޝަނުގައި ރަޖިސްޓްރީ ކޮށްފައިވާ ފޮށީގެ މައުލޫމާތު ހިމެނޭ ރަޖިސްޓަރީ އާންމުކޮށް އެ ރަޖިސްޓަރީއަށް ޝަކުވާ ހުށަހެޅުމުގެ ފުރުސަތު ހުޅުވާލުމުން ބޮޑު ޝަކުވާ އެއް ހުށަހަޅާފައި ނުވާ ކަމަށެވެ. އެހެންކަމުން އިންތިޚާބަށް ވާން ޖެހޭ ފަހުގެ ތައްޔާރީތައް ވަމުންދާ ކަމަށް އޭނާ ވިދާޅުވިއެވެ. އަދި އިންތިޚާބު ރަނގަޅަށް ކުރިއަށް ދާނެ ކަމުގެ ފުރިހަމަ އުންމީދު އެބަ އޮތް ކަމަށް ވެސް އޭނާ ވަނީ ވިދާޅުވެފައެވެ.
މީގެ އިތުރުން އެއްވެސް ފަރާތަކުން ސަރުކާރުގެ ތަކެތި ވިޔަސް އަމިއްލަ ތަކެތި ބޭނުންކޮށްގެން ވެސް އިންތިޚާބަށް ނުފޫޒު ނުފޯރުވުމަށް އިލްތިމާސްކުރައްވާ ކަަމަށެވެ. ރައްޔިތުންގެ އަޑު އަހާ ރައްޔިތުންނަށް ވޯޓު ލުމަށް ފުރިހަމަ އަށް ފުރުސަތު ދިނުމަށް އޭނާ ވަނީ ގޮވާލާފައެވެ. އެކި ބޭބެފުޅުން އިންތިޚާބަށް ނުފޫޒު ފޯރުވަން މަސައްކަތް ކުރާ ކަމަށް އަޑު އިވޭ ކަމަށާއި އެއީ ބަލައިގަނެވޭ ކަމެއް ނޫން ކަމަށް ފުއާދު ވަނީ ވިދާޅުވެފައެވެ. އަދި ކޮރަޕްޝަންގެ އަމަލެއް ހިނގާކަމަށް ޝައްކު ކުރެވޭ ނަމަ ނުވަތަ އިންތިޚާބަށް ނުފޫޒު ފޯރުވުމަށް ރިޝްވަތު ދިނުން ފަދަ ކަމެއް ކުރާ ނަމަ އެކަން ކަމާއި ބެހޭ އިދާރާތަކަށް ރިޕޯޓްކުރުމަށް އޭނާ ވަނީ ޢިލްތިމާސްކުރައްވާފައެވެ.
އޭޕްރީލް މަހުގެ 15 ވަނަ ދުވަހު ބާއްވަން ނިންމައިފައިވާ މި އިންތިހާބުގެ ބައި އިލެކްޝަނުގައި ތިން ޕާޓީއަކުން ވާދަކުރެއެވެ. އެއީ ވެރިކަންކުރާ މައި ޕާޓީ، އެމްޑީޕީ އާއި އިދިކޮޅު މައި ޕާޓީ ޕީޕީއެމް އާއި އަދި އެމްއެންޕީއެވެ. ކެންޑިޑޭޓު ނަންބަރު އެކެއް ލިބިވަޑައިގަތީ ޕީޕީއެމްގެ ކެންޑިޑޭޓް ޙުސައިން ރިޒާ އާދަމް އަށެވެ. ކެންޑިޑޭޓް ނަންބަރު ދޭއް އެމްޑީޕީގެ ކެންޑިޑޭޓް އިބްރާހީމް ޝާޒަށް ލިބިވަޑައިގެންނެވިއިރު ކެންޑިޑޭޓް ނަންބަރު ތިނެއް ލިބިވަޑައިގަތީ އެމްއެންޕީގެ ކެންޑިޑޭޓް ޢަލީ ޢަރީފް އަށެވެ.
ގުރައިދޫ ދާއިރާގެ ބައި އިލެކްޝަން ބާއްވަނީ އެ ދާއިރާގެ މެމްބަރުކަމުގައި ހުންނެވި ޕީޕީއެމްގެ މެމްބަރ އިބްރާހިމް ރިޒާ ފެބްރުއަރީ މަހުގެ 23 ވަނަ ދުވަހު އަވަހާރަވުމާ ގުޅިގެންނެވެ.
ރިޒާ އަވަހާރަވީ ކެންސަރުގެ އާލާސްކަންފުޅުގައި އުޅުއްވާތާ ގިނަ ދުވަސްތަކެއް ފަހުންކަމަށް މައުލޫމާތު ލިބެއެވެ. އާލާސްކަންފުޅާ އުޅުއްވާތީ މި ފަހުން އޭނާ ގިނައިން އުޅުއްވީ ފަރުވާއަށް ރާއްޖޭން ބޭރުގައެވެ. އަވަހާރަވީ މެލޭޝިޔާގައި ފަރުވާ ހޯއްދަވަމުން ގެންދަވަނިކޮށެވެ.
ޕީޕީއެމްގެ މެންބަރެއް ކަމަށްވާ ރިޒާ ވަނީ 17 ވަނަ ރައްޔިތުންގެ މަޖިލީހުގަޔާއި 18 ވަނަ ރައްޔިތުންގެ މަޖިލީހުގައި ވެސް މެންބަރުކަން ކުރައްވާފައެވެ. އޭނާ ވަނީ ކުރީގެ ސަރުކާރުގައި ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައްޔިތުންގެ މަޖިލީހުގެ މެންބަރުންގެ ތެރެއިން ހޮވާ މެންބަރެއްގެ ގޮތުގައި ވެސް ހިމެނިވަޑައިގެންފައެވެ.
