އިގްތިސާދުގައި އެންމެ ބޮޑު ހަރަކާތްތަކެއް ހިނގަނީ ކޮމަރސްގެ ދާއިރާއިން ކަމަށް އެސްޑީއެފްސީން ބުނެފި
ޓޫރިޒަމް ދާއިރާ ވެސް ދަނީ ވަރަށް ބޮޑަށް ތަރައްގީވަމުން
އެސްއެމްއީ ޑިވެލޮޕްމަންޓް އެންޑް ފައިނޭންސް ކޯޕަރޭޝަން
ދިވެހި އިގްތިސާދުގައި އެންމެ ބޮޑު ހަރަކާތްތަކެއް ހިނގަނީ ކޮމަރސްގެ ދާއިރާއިން ކަމަށް އެސްއެމްއީ ޑިވެލޮޕްމަންޓް އެންޑް ފައިނޭންސް ކޯޕަރޭޝަން (އެސްޑީއެފްސީ)ން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އެސްޑީއެފްސީގެ ޗީފް އޮޕަރޭޓިން އޮފިސަރު ނާޒިމް ހަބީބް ވިދާޅުވީ އިގްތިސާދު ހިނގަމުންދާ ގޮތް އަންދާޒާ ކުރެވޭ ކަމަށާއި، ހޯދާ ހޯދުންތަކުން އެންމެ ބޮޑެތި ހަރަކާތްތައް ހިނގަނީ ކޮމަރސްގެ ދާއިރާއިން ކަމަށެވެ. އެގޮތުން ކުދި ފިހާރަތަކާއި، ރެސްޓޯރަންޓްތަކާއި، ބޯކޮށާ ތަންތަނާއި ސެލޫންތަކާއި، ފަހާތަންތަނަކީ އެންމެ ބޮޑު ހަރަކާތްތައް އިގްތިސާދުގެ ތެރޭގައި ހިންގަމުން ގެންދާ ތަންތަން ކަމަށް ނާޒިމް ވިދާޅުވިއެވެ.
ޓޫރިޒަމްގެ ދާއިރާއަށް އިޝާރާތް ކުރައްވައި ނާޒިމް ވިދާޅުވީ ޓޫރިޒަމް ދާއިރާ ވެސް ވަރަށް ބޮޑަށް ތަރައްގީވަމުން އަންނަ ކަމަށާއި، ރާއްޖޭގެ ހުރިހާ އަތޮޅަކަށް ޓޫރިޒަމް ދާއިރާއިން ކުރިއަށް ދިއުމަށް ލޯނުތައް ދޫކޮށްފައިވާ ކަމަށެވެ. އެއީ ގެސްޓްހައުސްތައް އެޅުމަށާއި، ޑައިވިން ސެންޓަރާއި، އެހެނިހެން ވެސް ޓޫރިޒަމް ދާއިރާއާ ގުޅުންހުރި ވިޔަފާރިތައް ހުޅުވުމަށް ކަމަށް ނާޒިމް ވިދާޅުވިއެވެ. އަދި މަސްވެރިކަމުގެ ދާއިރާއިން ވެސް ކުރިއަށްދާން ބޭނުންވާ ފަރާތްތަކަށް ލޯނު ދޫކޮށްފައިވާކަން އޭނާ ފާހަގަކުރެއްވިއެވެ.
އެސްޑީއެފްސީ އިން ދަނީ އިގްތިސާދާ ގުޅުންހުރި ގިނަ ދާއިރާތައް ކުރިއެރުވުމަށް ބޭނުންވާ މާލީ އެހީތެރިކަން ފޯރުކޮށްދެމުންނެވެ. އެގޮތުން މައިގަނޑު 6 ލޯނެއް ދޫކުރާ ކަމަށް އެކޯޕޮރޭޝަނުން ބުނެއެވެ.
