މަނަދޫގައި އަންހެނަކު މަރާލުން: ގެ ހުރީ ފުލުހުންގެ ބެލުމުގައި ދަށުގައި

ނ. މަނަދޫގެ ގެއެއްގެ ތެރެއިން މަރުވެފައި އޮތް އަންހެނަކު ފެނުމާ ގުޅިގެން، އޭނާ ދިރިއުޅުމެންދިޔަ ގެ ފުލުހުންގެ ބެލުމުގެ ދަށަށް ގެނެސްފައިވާ ކަމަށް އެ ރަށު ކައުންސިލުގެ ރައީސް އަބްދުއްރަހްމާން ސަބީހު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ސަބީހު ވިދާޅުވީ މާލެއިން ދިޔަ ފުލުހުންގެ ޓީމެއް އެ ރަށުގައި ހަރަކާތްތެރިވަމުންދާ ކަމަށެވެ. ފުލުހުން ވެސް ބުނެފައިވަނީ މައްސަލައިގެ ތަހުގީގަށް ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ޓީމެއް މަނަދޫގައި ހަރަކާތްތެރިވަމުންދާ ކަމަށެވެ.

ނ. މަނަދޫގެ ގެއެއްގެ ތެރެއިން މަރުވެފައި އޮތް އަންހެނަކު ފެނުމާ ގުޅިގެން، ހުއްދަ ނުހޯދައި އެ ރަަށަށް އެރުމާއި ފުރުން މިހާރު ވަނީ މަނާކޮށްފައެވެ.

މަނަދޫ ކޮމިއުނިޓީ ވައިބަރ ގްރޫޕަށް އެ ރަށު ކައުންސިލުގެ ރައީސް ސޮބީހު ހިއްސާކުރައްވާފައިވާ މެސެޖެއްގައި، ފުލުހުން ތަހުގީގުކުރަމުންދާ މައްސަލައަކާ ގުޅިގެން ފުލުހުން އިތުރަށް ބަލަންޖެހޭ ކަންތައްތަކެއް ހުރިކަމަށް ބުނެފައިވެއެވެ. އެހެންކަމުން މަނަދޫއަށް އެއްވެސް އުޅަނދެއް ދާނަމަ ނުވަތަ އެރަށުން ފުރާނަމަ އެކަން ފުލުހުންނަށް އަންގާފައި ނޫނީ ނުފުރުމަށް އަންގާފައިވެއެވެ.

ކައުންސިލުން މިފަދަ އެންގުމެއް އަންގާފައިވަނީ، މަނަދޫގައި އެކަނި ދިރިއުޅެމުންދިޔަ 62 އަހަރުގެ އަންހެނަކު މަރުވެފައި އޮއްވައި ފެނުނު މައްސަލައަކާ ގުޅިގެންނެވެ. ހުއްދަ ހޯދައިގެން ރަށަށް އެރުމާއި ފޭބުމަށް އަންގާފައިވަނީ ފުލުހުންގެ އެދުމުގެ މަތިން ކަމަށް ކައުންސިލުން ބުނެފައި ވީނަމަވެސް ފުލުހުން އެކަން ކަށަވަރުކޮށްދީފައެއް ނުވެއެވެ.

ފުލުހުން ބުނީ މަނަދޫގައި އެކަނި ދިރިއުޅޭ 62 އަހަރުގެ އަންހެއްނެއްގެ ހަބަރެއް ނުވާކަމަށް، އެޕްރިލް މަހުގެ 7 ވަނަ ދުވަހުގެ 18:13 އެހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ ރިޕޯޓާ ގުޅިގެން ފުލުހުން އޭނާ ދިރިއުޅޭ ގެއަށް ގޮސް އެ ގެއަށް ވަނީ، އޭނާ ދިރިއުޅުނު ގޭގެ ކޮޓަރީގެ ދޮރު ވައްޓާލައިގެން ކަމަށްވެސް ފުލުހުން ބުނެއެވެ. ފުލުހުން އެތަނަށް ވަތްއިރު އެ އަންހެން މީހާ އޮތީ ބިންމަތީގައި ކަމަށާއި، އޭނާ އޮތީ މަރުވެފައި ކަމަށް ފުލުހުން ބުނެއެވެ.

އެ އަންހެން މީހާގެ ހަށިގަނޑުގައި ޒަހަމްތައް ހުރި ކަމަށް ބައެއް މީޑިއާތަކުން ރިޕޯޓްކޮށްފައިވެއެވެ. ނަމަވެސް ކަމާބެހޭ ފަރާތަކުން އެކަން އަދި ކަށަވަރުކޮށްދީފައެއް ނުވެއެވެ.އެކަމާ ގުޅިގެން އިތުރަށް ބަލަންޖެހޭ ކަންކަން ބަލަމުންދާކަަމަށް ފުލުހުން ވަނީ ބުނެފައެވެ.