ނ. މަނަދޫގެ ގެއެއްގެ ތެރެއިން މަރުވެފައި އޮތް އަންހެނަކު ފެނުމާ ގުޅިގެން، ހުއްދަ ނުހޯދައި އެ ރަަށަށް އެރުމާއި ފުރުން މަނާކޮށްފިއެވެ.

މަނަދޫ ކޮމިއުނިޓީ ވައިބަރ ގްރޫޕަށް އެ ރަށު ކައުންސިލުގެ ރައީސް ސޮބީހު ހިއްސާކުރައްވާފައިވާ މެސެޖެއްގައި، ފުލުހުން ތަހުގީގުކުރަމުންދާ މައްސަލައަކާ ގުޅިގެން ފުލުހުން އިތުރަށް ބަލަންޖެހޭ ކަންތައްތަކެއް ހުރިކަމަށް ބުނެފައިވެއެވެ. އެހެންކަމުން މަނަދޫއަށް އެއްވެސް އުޅަނދެއް ދާނަމަ ނުވަތަ އެރަށުން ފުރާނަމަ އެކަން ފުލުހުންނަށް އަންގާފައި ނޫނީ ނުފުރުމަށް އަންގާފައިވެއެވެ.

ކައުންސިލުން މިފަދަ އެންގުމެއް އަންގާފައިވަނީ، މަނަދޫގައި އެކަނި ދިރިއުޅެމުންދިޔަ 62 އަހަރުގެ އަންހެނަކު މަރުވެފައި އޮއްވައި ފެނުނު މައްސަލައަކާ ގުޅިގެންނެވެ. ހުއްދަ ހޯދައިގެން ރަށަށް އެރުމާއި ފޭބުމަށް އަންގާފައިވަނީ ފުލުހުންގެ އެދުމުގެ މަތިން ކަމަށް ކައުންސިލުން ބުނެފައި ވީނަމަވެސް ފުލުހުން އެކަން ކަށަވަރުކޮށްދީފައެއް ނުވެއެވެ.

ފުލުހުން ބުނީ މަނަދޫގައި އެކަނި ދިރިއުޅޭ 62 އަހަރުގެ އަންހެއްނެއްގެ ހަބަރެއް ނުވާކަމަށް، އެޕްރިލް މަހުގެ 7 ވަނަ ދުވަހުގެ 18:13 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ ރިޕޯޓާ ގުޅިގެން ފުލުހުން އޭނާ ދިރިއުޅޭ ގެއަށް ގޮސް އެ ގެއަށް ވަނީ، އޭނާ ދިރިއުޅުނު ގޭގެ ކޮޓަރީގެ ދޮރު ވައްޓާލައިގެން ކަމަށްވެސް ފުލުހުން ބުނެއެވެ. ފުލުހުން އެތަނަށް ވަތްއިރު އެ އަންހެން މީހާ އޮތީ ބިންމަތީގައި ކަމަށާއި، އޭނާ އޮތީ މަރުވެފައި ކަމަށް ފުލުހުން ބުނެއެވެ.

އެ އަންހެން މީހާގެ ހަށިގަނޑުގައި ޒަހަމްތައް ހުރި ކަމަށް ބައެއް މީޑިއާތަކުން ރިޕޯޓްކޮށްފައިވެއެވެ. ނަމަވެސް ކަމާބެހޭ ފަރާތަކުން އެކަން އަދި ކަށަވަރުކޮށްދީފައެއް ނުވެއެވެ.

އެކަމާ ގުޅިގެން އިތުރަށް ބަލަންޖެހޭ ކަންކަން ބަލަމުންދާކަަމަށް ފުލުހުން ވަނީ ބުނެފައެވެ.