ވިލިމާލޭގައި ބަގީގެ ހިދުމަތް ފެށިނަމަވެސް މިނީ ބަހުގެ ހިދުމަތް ހުއްޓައެއް ނުލާނެ: އެމްޓީސީސީ

ވިލިމާލޭގައި ބަގީގެ ހިދުމަތް ފެށިނަމަވެސް މިނީ ބަހުގެ ހިދުމަތް ހުއްޓާ ނުލާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ޓްރާންސްޕޯޓް މެނޭޖަރު ޒައިދު އަމްޖަދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން ޒައިދު ވިދާޅުވީ ވިލިމާލޭގައި މިނީ ބަހުގެ ހިދުމަތް ދުވާލެއްގެ މައްޗަށް 1500 ވަރަކަށް މީހުން ބޭނުންކުރާ ކަމަށެވެ. އޭގެތެރޭގައި 500 ސްކޫލު ކުދިން ހިމެނޭ ކަމަށާއި ހިދުމަތަށް ރަނގަޅު ތަރުހީބެއް ލިބޭ ކަމަށް ވެސް ވިދާޅުވިއެވެ.

ބަހުގެ ގަޑިތައް ކަނޑައަޅާފައިވާނީ ފެރީގެ ގަޑިތަކާ ގުޅުވާލުމަށްފަހު ކަމަށް ވެސް ޒައިދު ވިދާޅުވިއެވެ. ބަސް ދަތުރުކުރާ ރޫޓުތައް ކަނޑައަޅާފައި ވަނީ ރައްޔިތުން އެންމެ ގިނައިން ދާންޖެހޭ ސަރަހައްދުތައް ދެނެގަތުމަށްފަހު ކަމަށް އެމްޓީސީސީން ބުނެފައިވެއެވެ. އެގޮތުން ސްކޫލުތަކާއި، ހޮސްޕިޓަލާއި، ފެރީ ޓާމިނަލް އަދި ބީޗުތައް ހިމެނެއެވެ.

ވިލިމާލޭގައި އެންމެ ރޫޓަކުން ދަތުރުކުރާކަން ފާހަގަކުރައްވާ ޒައިދު ވިދާޅުވީ އެންމެ ގިނަވަގެން 4 ބަސް ބޭނުންކުރާ ކަމަށެވެ. އަދި އެވްރެޖްކޮށް މުޅި ދުވަހަށް ބޭނުންކުރަނީ ދެ ބަސް ނޫނީ ތިން ބަސް ކަމަށެވެ.

ވިލިމާލޭގައި މިނީ ބަހުގެ ޚިދުމަތް އެމްޓީސީސީން ފެށީ ޖެނުއަރީ 20 ވަނަ ދުވަހުއެވެ. އެ ޚިދުމަތް ފަށާފައި ވަނީ ރާާއްޖެ ޓްރާންސްޕޯޓް ލިންކް އާރް.ޓީ.އެލްގެ ބަހުގެ ޚިދުމަތް މާލެ ސިޓީއަށް ފޯރުކޮށްދިނުމަށް އެމްޓީސީސީ އިން ކުރަމުންދާ މަސައްކަތުގެ ތެރެއިންނެވެ.

ވިލިމާލެއަކީ ތިމާވެއްޓާ ރައްޓެހި އުޅަނދުތައް ދުއްވާ ސަރަހައްދަކަށްވާތީ އެމްޓީސީސީން އެތަނުގައި ޚިދުމަތް ދޭން ބޭނުން ކުރަނީ އިލެކްޓްރިކް ބަހެވެ. އެގޮތުން މި ޚިދުމަތް ދޭން ހަ އިލްކެޓްރިކް ބަސް ބޭނުން ކުރާއިރު މި ބަސްތަކުގައި 11 މީހުންނަށް އިށީނދެގެން އަދި އިތުރު ހަތަރު މީހުންނަށް ކޮޅަށް ހުރެ ދަތުރު ކުރެވޭނެއެވެ. މި ބަސްތަކަކީ ވީލްޗެއާއެކުވެސް ފަސޭހަކަމާއެކު އަރައި ފޭބޭގޮތަށް ހުންނަ ބަސްތަކެކެވެ.

ބަހުގެ ޚިދުމަތް ވިލިމާލެއަށް ފުޅާކޮށްފައި ވާއިރު ރާއްޖޭގައި ދަތުރުފަތުރުގެ ޚިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން، އެމްޓީސީސީގެ މަޤްޞަދަކީ އެކަށީގެންވާ އަގުގައި ލުއިފަސޭހަކަމާއެކު ބޭނުންކުރެވޭ ޚިދުމަތެއް ފަހިކޮށްދިނުން ކަމަށް އެ ކުންފުނިން ބުނެއެވެ.