އެ އުމުރުގެ އެހެން ކުދިންނާ ޚިލާފަށް، އުމުރުން އެންމެ 13 އަހަރުގެ ޔާސްމީން ސަރާމީ ދެކެމުން ދަނީ ހަމަ އެންމެ ހުވަފެނެކެވެ. އެއީ އަސްދުއްވުމުގެ ދާއިރާގައި މަޝްހޫރު އަންހެނަކަށްވެ، ބައިނަލްއަގުވާމީ ފެންވަރުގެ މުބާރާތްތަކުގައި ވާދަކުރުމަށް ދެކެމުންދާ، ފޮނި ހުވަފެނެވެ.
ފަލަސްތީނަށް ނިސްބަތްވާ ޔާސްމީންގެ ހިތުގައި، އަސްދުއްވުމަށް ޝައުގުވެރިކަން އުފެދުނީ އޭނާގެ ބައްޕަގެ ސަބަބުންނެވެ. ޔާސްމީންގެ ބައްޕައަކީ އަސްދުއްވުމަށް ޚާއްޞަ ކުލަބެއް ކުރިން ހިންގި މީހެކެވެ. ޔާސްމީންގެ ތުއްތު އުމުރުގެ ދުވަސްތައް ހޭދަކުރީ ކުލަބުގައި، އަސްތަކާ ވާހަކަދައްކައިހެދުމުގައެވެ. ބައްޕައަށް އަތްގާތްކޮށްދޭން އުޅުނު އުޅުމުގެ ތެރޭގައި، ޔާސްމީންގެ ހިތުގައިވެސް އަސްތަކަށް ޚާއްޞަ މަގާމެއް ދެވި، އަސްދުއްވަން ގަސްދުކުރިއެވެ.
އަހަރެންގެ ބައްޕައަކީ ކުރިން، އަސްދުއްވާ ކުލަބެއް ހިންގި މީހެއް. ބޭބެ ދާނެ ކޮންމެ ދުވަހަކުވެސް އެތަނަށް. އަހަރެންވެސް ދަން، އެމީހުންނަށް އެހީވާން. އެހެން ގޮސް އުޅުމުގެ ތެރޭގަ، އެމީހުންނާ އެކީ އަސްދުއްވާ ހިތްޖެހުނީ.ޔާސްމީން ސަރާމީ؛ އަސްދުއްވާ ކުއްޖެއް
ފުރާވަރު އުމުރުގެ ދުވަސްތައް ގުނަންފަށާފައިވާ ޔާސްމީން، އަސްދުއްވުމުގެ ތަމްރީނުތަކުގައި ކޮންމެ ހަފުތާއަކު 5 ދުވަސް ހޭދަކުރެއެވެ. މިދިޔަ 2 އަހަރު ދުވަސްވެސް ދިޔައީ އެގޮތަށެވެ. ޔާސްމީންގެ ފަރިތަކުރުންތައް ކުރިއަށްގެންދަނީ ހުޅަނގުގެ އައްސޭރީގެ އަރީހާގައި އޮންނަ އަސްދުއްވާ ކުލަބެއްގައެވެ. އެތަނަކީ، ފަލަސްތީނަށް ވެރިވެފައިވާ އާންމު ނުތަނަވަސްކަމުން މިންޖު ހޯދައިދޭ ތަނެކެވެ.
ކިތަންމެ ގިނަ ހުރަސްތަކަކާއި ގޮންޖެހުންތަކެއް ގިރާކުރަން ޖެހިފައި އޮތެއްކަމަކު، ޔާސްމީންއަކީ ބައިނަލްއަގުވާމީ ފެންވަރުގައި، ފުރިހަމަ ކާމިޔާބީތަކެއް ހޯދާނެ އަސްދުއްވުންތެރިއެއްކަމާމެދު، އޭނާގެ ކޯޗު، އަލީ ޖަމާލީ ކުޑަކޮށްވެސް ޝައްކެއްނުކުރެއެވެ.
ފަލަސްތީނުގެ ރައްޔިތުންގެ މެދުގައި އަސްދުއްވުމަށް އޮންނަ ޝައުގުވެރިކަން އިތުރުވެ، އެކަމުގެ މަގުބޫލުކަން އިތުރުވަމުން އަންނަކަން ޖަމާލީ ފާހަގަކުރިއެވެ. އެހެންކަމުން، ގިނަ އަސްތަކާއި، ފަރިތަކުރުންތައް ކުރިއަށް ގެންދާނެ ރަނގަޅު ފެންވަރުގެ ތަންތަން އިތުރުވަމުން އަންނަކަމަށް ޖަމާލީ ބުންޏެވެ.
ބައިނަލްއަގުވާމީ މުބާރާތްތަކުގަ ވާދަކުރާއިރު އަހަރުމެންނަށް ކުރިމަތިލާންޖެހޭ އެންމެ ބޮޑު ދަތި ކަމަކީ، އަހަރުމެންނާއެކު އަހަރުމެންގެ އަސްތައް ނުގެންދެވޭކަން. އެހެންވެ، އަހަރުމެންނަށް ޖެހެނީ، އެންމެ ރަނގަޅު އަސްތަކުގެ ބަދަލުގަ، އެހެން އަސްތަކެއް ކުއްޔަށް ނަގަން. ބައެއް ފަހަރު، އެންމެ ބަލިކަށި، ދެރަ އަސްވެސް ލިބޭ. އެ ހުރިހާ ކަމަކާ އެކީވެސް، އަހަރުމެން ފެބުރުއަރީ މަހުވެސް މުބާރާތެއްގަ ވާދަކުރިން. ރަނގަޅު އަސްތަކެއް ކުއްޔަށް ނެގީ. ރަނގަޅު ނަތީޖާތަކެއްވެސް ހޯދުނު. އެކަމަކު، އަހަރުމެންނާ އެކީ، އަހަރުމެންގެ އަސްތައް ގެންދެވުނުނަމަ، އެއަށްވުރެވެސް ރަނގަޅު ނަތީޖާތަކެއް ނެރެވުނީސް.އަލީ ޖަމާލީ؛ ޔާސްމީންގެ ޓްރެއިނަރ
ހުވަފެންތަކުގައި ކުލަ ޖައްސައި، ހަގީގަތަކަށް ހެދުމުގެ ބުރަ ދަތުރު ކުރަމުންދާ ޔާސްމީން މިހާރުވެސް ވަނީ ދޭސީ ފެންވަރުގެ ގިނަ މުބާރާތްތަކެއްގައި ވާދަކޮށްފައެވެ. މާޗް މަހު އޮތް މުބާރާތެއްގައިވެސް އޭނާ ވަނީ ވާދަކޮށްފައެވެ. އެ މުބާރާތުން އޭނާ 1 ވަނަ ހޯދީ 2 އައްޑަނައަކާވެސް އެކުގައެވެ. ބަލާ ބެލުމަށް މިއީ ކުޑަ ކާމިޔާބީއެއް ނަމަވެސް، މިއީ ފޮނި ހުވަފެންތަކަކުން ގެންގޮސްދޭ އުޖާލާ މުސްތަގުބަލަކާ ދިމާއަށް އެޅުނު މުހިންމު ފިޔަވަޅެއްކަމާމެދު ދެބަސްވާކަށް ނެތީމެވެ.
