ކަރަންޓު މީޓަރުގައި ލިފްޓު ނުވަތަ މެއިންޓަނަންސް މީޓަރު ވާނަމަ އެންގުމަށް އެދިއްޖެ
ކޮމާޝަލް ރެޒިޑެންޝަލް ކޮމްޕްލެކްސްތައް ބަލަހައްޓާ ފަރާތްތަކުން " ޕްރައިމަރީ މީޓަރ އައިޑެންޓިފިކޭޝަން އެންޑް ގްރޫޕިން ފޯމު" ފުރިހަމަކޮށް ހުށަހެޅުމަށް އެދިފައިވޭ
ވެމްކޯގެ މުވައްޒަފުން ކުނި އުކާލުމުގެ މަސައްކަތް ކުރަނީ
ގޭބިސީގެ ކަރަންޓު މީޓަރުތަކުގެ ތެރޭގައި ލިފްޓު ނުވަތަ މެއިންޓަނަންސް މީޓަރެއް ވާނަމަ އެކަން އެންގުމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)ން އެދިއްޖެއެވެ.
އެކަމާއި ގުޅިގެން ވެމްކޯއިން ބުނީ ވެމްކޯއިން ޚިދުމަތް ދެމުންދާ ގޭބެސީތަކާއި ކޮމާރޝަލް ރެޒިޑެންޝަލް ކޮމްޕްލެކްސްތައް އަދި ވިޔަފާރި ކުންފުނިތަކާއި އެކިއެކި މުއައްސަސާތަކުން ނަގާ ފީ 1 އޭޕްރީލުން ފެށިގެން ސްޓެލްކޯގެ ކަރަންޓު މީޓަރުތަކުގެ ބިލުގައި ހިމަނައިގެން ނެގުމަށް ވަނީ ހަމަޖެހިފައިކަމަށެވެ. އެހެންކަމުން އާންމު ގޭބިސީ ކަރަންޓް މީޓަރުތަކުގެ ތެރޭގައި ލިފްޓް ނުވަތަ މެއިންޓަނަންސް މީޓަރެއް ވާނަމަ އެފަރާތްތަކުން "ޔޫޓިލިޓީ މީޓަރ އެކްސްކްލޫޝަން ފޯމު" ހުށަހެޅުމަށް އެދޭކަމަށެވެ.
މީގެއިތުރުން ކޮމާޝަލް ރެޒިޑެންޝަލް ކޮމްޕްލެކްސްތައް ބަލަހައްޓާ ފަރާތްތަކުން " ޕްރައިމަރީ މީޓަރ އައިޑެންޓިފިކޭޝަން އެންޑް ގްރޫޕިން ފޯމު" ފުރިހަމަކޮށް ހުށަހެޅުމަށް އެދޭކަމަށް ބުނެފައި ވެއެވެ.
މިކަމާއި ގުޅޭގޮތުން ވާހަކަދައްކަވަމުން ވެމްކޯގެ އޮފިޝަލަކު "ރާއްޖެއެމްވީ" އަށް ވިދާޅުވީ އެގޮތަށް ވަކިކުރަން ބޭނުންވަނީ އެއީ ކޮންކަމަކަށް ބޭނުންކުރާ މީޓަރުތަކެއްކަން އެނގިގެންދިޔުމަށްކަމަށެވެ. އޭރުން އިތުރު ފީއެއް ނުނެގި ފީ ނަގަންޖެހޭ މީޓަރު އެނގިގެންދާނެކަމަށް އޮފިޝަލު ވިދާޅުވިއެވެ.
މީގެއިތުރުން ވެމްކޯއިން ބުނީ މިވަގުތު ވެމްކޯގެ ޚިދުމަތް ހޯދާ އެކިއެކި މުވައްސަސާތަކާއި ވިޔަފާރިތަކާއި ހިއްސާކޮށްފައިވާ "އިންފޮމޭޝަން އަޕްޑޭޓް ފޯމް" ފުރިހަމަ ކުރުމަށްފަހު 6 އޭޕްރީލް ވާ ބުރާސްފަތި ދުވަހުގެ ނިޔަލަށް ވެމްކޯއަށް ހުށަހެޅުމަށް އެދޭކަމަށެވެ. އަދި މި މުއްދަތުގައި މި މައުލޫމާތު ހުށަނާޅާ ފަރާތްތަކުގެ ހިދުމަތް މެދުކެނޑުމަކީ އެކަށީގެންވާ ކަމެއްކަމުގައިވެސް ވެމްކޯއިން ބުނެއެވެ.
މިފޯމުތައް ވެމްކޯގެ ވެބްސައިޓް މެދުވެރިކޮށް ހުށައެޅޭނެއެވެ.
