ގުރައިދޫ ދާއިރާގެ ބައި-އިލެކްޝަން: އޮބްޒާރވަރުންނާއި މޮނީޓަރުންނަށް ވުމަށް އެދި ހުށަހަޅުމުގެ ފުރުސަތު ހުޅުވާލައިފި

އޭޕްރީލް މަހުގެ 15 ވަނަ ދުވަހު ބޭއްވުމަށް ހަމަޖެހިފައިވާ ގުރައިދޫ ދާއިރާގެ ބައި އިލެކްޝަންގައި މޮނީޓަރިންނާއި އޮބްޒަރވަރުންނަށް ވުމަށް އެދޭ ފަރާތްތަކަށް އެކަމަށް އެދި ހުށަހެޅުމަށް ހުޅުވާލައިފިއެވެ.

އިލެކްޝަންސް ކޮމިޝަން (އީސީ)ން ބުނީ މިކަމަށް ޝައުޤުވެރިވާ ފަރާތްތަކަށް މާރިޗު 16 ވާ ބުރާސްފަތި ދުވަހުގެ 10:00 އިން ފެށިގެން، މާރިޗު 25 ވާ ހޮނިހިރު ދުވަހުގެ 13:00 އާ ހަމަޔަށް އެ ފުރުޞަތު ހުޅުވާލާފައިވާކަމަށެވެ.

Advertisement

އީސީން ބުނީ އިންތިޚާބު މޮނީޓަރުކުރުމުގެ ހުއްދަދެވޭނީ އުމުރުން 18 އަހަރުވެފައިވާ ދިވެހިންނަށް ކަމަށެވެ. އަދި އެމީހަކީ ޖިނާއީ ކުށެއްގައި ހުކުމް ތަންފީޒުކުރަމުންދާ މީހެއްކަމުގައި ވެގެންނުވާނެކަމަށެވެ.

މީގެއިތުރުން މޯލްޑިވްސް ބްރޯޑްކާސްޓިންގ ކޮމިޝަންގައި ރަޖިސްޓްރީކޮށްފައިވާ ރޭޑިއޯ ނުވަތަ ޓީވީ ސްޓޭޝަނެއްގައި މަސައްކަތްކުރާ ނުވަތަ ނޫސް މަޖައްލާފަދަ ތަކެތީގެ ގާނޫނުގެ ދަށުން ރަޖިސްޓްރީކޮށްފައިވާ ނޫސް މަޖައްލާއެއްގައި މަސައްކަތް ކުރާ ނުވަތަ ބައިނަލްއަޤުވާމީ މީޑިއާއެއްގައި މަސައްކަތްކުރާ މީހެއްކަން އިލެކްޝަންސް ކޮމިޝަނަށް ކަށަވަރުވާ މީހެއް ކަމުގައިވެސް އެމީހަކު ވާންވާނެކަމަށެވެ. އަދި ރައްޔިތުންގެ މަޖިލީހުގެ އިންތިޚާބާބެހޭ މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި އެމީހަކު ވެގެންނުވާނެކަމަށް އީސީން ބުނެއެވެ.

އިންތިޚާބު އޮބްޒަރވްކުރުމުގެ ހުއްދަދެވޭނީ އުމުރުން 18 އަހަރު ވެފައިވާ ދިވެހިންނަށެވެ. އަދި އެމީހަކީ ޖިނާއީ ކުށެއްގައި ހުކުމް ތަންފީޒުކުރަމުންދާ މީހެއްކަމުގައި ވެގެންނުވާނެކަމަށާއި ސިޔާސީ ޕާޓީތައް ފިޔަވައި މަދަނީ ޖަމާޢަތަކުން ނުވަތަ އަމިއްލަގޮތުން އޮބްޒާވަރަކަށް ވުމަށް ހުށަހަޅާ ފަރާތެއްނަމަ، ސިޔާސީ ޕާޓީއެއްގެ ރަޖިސްޓަރީއެއްގައި އެ މީހެއްގެ ނަން ހިމެނިފައިވާ މީހަކު ކަމުގައި ވެގެންނުވާނެކަމަށެވެ. އަދި އެމީހަކީ ރައްޔިތުންގެ މަޖިލީހުގެ އިންތިޚާބާބެހޭ މަސައްކަތެއް އިލެކްޝަންސް ކޮމިޝަނުގެ ފަރާތުން ޙަވާލުވެގެން ހުރި މީހެއްކަމުގައިވެސް ވެގެންނުވާނެކަމަށް އީސީން ބުނެއެވެ.

ޝައުގުވެރިވާ ފަރާތްތަކުގެ ފޯމު ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށް ކަމަށް އީސީން ބުނެއެވެ.