އެޕްރީލު 15 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް ކުރިމަތިލާފައިވާ ކެންޑިޑޭޓުންގެ ގުރުއަތުނެގުމާއި ނަން ތަރުތީބުކުރުން ބުދަ ދުވަހު އޮންނާނެކަމަށް އިލެކްޝަންސް ކޮމިޝަން(އީސީ)ން ބުނެފިއެވެ.

އީސީން ބުނީ ގުރުއަތު ނެގުމާއި ނަން ތަރުތީބުކުރުން އޮންނާނީ ބުދަ ދުވަހުގެ މެންދުރު 2 ޖަހާއިރު އިލެކްޝަންސް ކޮމިޝަންގައި ކަމަށެވެ. ކެންޑިޑޭޓަށް ހާޒިރުވެވެން ނެތްނަމަ، ކެންޑިޑޭޓުގެ ފަރާތުން ބަދަލުގައި އަންނަ މީހެއް ބަޔާންކޮށް، ކެންޑިޑޭޓުގެ ސިޓީއަކާއެކު އައުމަށް އޭސީން އެދެއެވެ. އެހެންނަމަވެސް، ކެންޑިޑޭޓު ނުވަތަ ބަދަލުގައި މީހަކު ހާޒިރުނުވާނަމަ، ކެންޑިޑޭޓުގެ ބަދަލުގައި ގުރުއަތު ނަގާނީ އިލެކްޝަންސް ކޮމިޝަނުގެ ފަރާތުންކަމަށް އީސީން ބުނެއެވެ.

ގުރައިދޫ ދާއިރާގެ ބައި އިލެކްޝަންގައި ވާދަކުރަނީ ތިން ޕާޓީއަކުންނެވެ. އެއީ ވެރިކަން ކުރާ މައި ޕާޓީ އެމްޑީޕީ އާއި އިދިކޮޅު ޕީޕީއެމް އަދި އެމްއެންޕީންނެވެ. އެމްޑީޕީން ވާދަކުރައްވަނީ އިބްރާހީމް ޝާޒެވެ. ޕީޕީއެމް އިން ވާދަކުރައްވަނީ އެދާއިރާގެ މެންބަރަކަށް ކުރިން ހުންނެވި އިބްރާހީމް ރިޒާގެ ކޮއްކޮ ހުސައިން ރިޒާއެވެ. އެމްއެންޕީން ވާދަކުރައްވަނީ އަލީ އަރީފް އެވެ.

ގުރައިދޫ ދާއިރާގެ ގޮނޑި ހުސްވެފައިވަނީ އެގޮނޑި ތަމްސީލުކުރައްވަމުން ގެންދެވި ޕީޕީއެމްގެ މެންބަރު އިބްރާހީމް ރިޒާ ފެބްރުއަރީ މަހުގެ 23 ވަނަ ދުވަހު އަވަހާރަވުމާ ގުޅިގެންނެވެ.

މިދާއިރާގެ ބައި އިލެކްޝަން އޮންނާނީ އޭޕްރީލް މަހުގެ 15 ވަނަ ދުވަހުއެވެ.

މިއީ 19 ވަނަ ރައްޔިތުންގެ މަޖިލީހުގައި ބައި އިލެކްޝަން ބާއްވާ ދެ ވަނަ ދާއިރާއެވެ. މިދިޔަ އަހަރު ކޮމަންޑޫ ދާއިރާގެ ބައި އިލެކްޝަން ބާއްވާފައިވަނީ އެދާއިރާގެ ގޮނޑި ފުރުއްވަމުން ގެންދެވި ހުސައިން ވަހީދު އަވަހާރަވުމުންނެވެ.