ޖަލްސާތައް މެދުކަނޑާލި ސަބަބެއް އަމީން އާންމަށް އެނގިވަޑައިނުގެންނެވި!

ރައްޔިތުންގެ މަޖިލީހުގެ ޖަލްސާތައް މެދުކަނޑާލި ސަބަބެއް ދަންނަވަން އެނގިވަޑައިނުގަންނަވާ ކަމަށް، އަމީން އާންމު އަހްމަދު މުހައްމަދު ވިދާޅުވެއްޖެ އެވެ.

މަޖިލީހުގެ ޖަލްސާއެއް އަންގާރަ ދުވަހު ބާއްވާނެ ކަމަށް ހޯމަ ދުވަހުގެ ޖަލްސާގައި އިއުލާނު ކުރެއްވި އެވެ. ޖަލްސާތައް މެދުކަނޑާލި ސަބަބެއް މަޖިލީހުން ހާމަ ނުކުރި ނަމަވެސް، ޖަލްސާތައް މެދުކަނާލީ، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ ހޯމަ ދުވަހު މަޖިލީހަށް ވެއްދި ފަހުންނެވެ.

ރާއްޖެއެމްވީއަށް އެނގިފައިވާ ގޮތުގައި މަޖިލީހުގެ ޖަލްސާތައް މެދުކަނޑާލާފައިވަނީ ވަކި މުއްދަތެއް ނެތް ގޮތަށެވެ.

މިކަމާ ގުޅިގެން ރާއްޖެއެމްވީ އަމީން އާންމު އަހްމަދު މުހައްމަދުއަށް ގުޅުމުން ވިދާޅުވީ "ނޭނގޭ އެއްޗެއް ދަންނަވާކަށް ތިޔަކަށް،" މިހެންނެވެ.

މަޖިލީހުގެ ގަވާއިދުގައި ބުނެފައިވާ ގޮތުގައި ގަވާއިދުގައި އެހެން ގޮތަކަށް ބަޔާންކޮށްފައި ނުވާހާހިނދަކު، ނުވަތަ އެހެން ގޮތަކަށް މަޖިލީހުން ކަނޑަނާޅާހާހިނދަކު، މަޖިލީހުގެ ދައުރުގެތެރޭގައި ހިނގާ ޢާންމު ޖަލްސާތައް، ހަފްތާއަކު މަދުވެގެން ތިން ދުވަހު ބާއްވަންވާނެއެވެ. އެއީ ހޯމަ ދުވަހާއި އަންގާރަ ދުވަސް އަދި ބުދަ ދުވަހެވެ.