ކުމުންދޫ ނެރު ފުންކުރުމުގެ މަސައްކަތް ނިންމާލައިިފި

ހދ.ކުމުންދޫ ނެރު ފުންކުރުމުގެ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ބުނެފިއެވެ.

އެމްޓީސީސީން ބުނީ ކުމުންދޫ ނެރު ބަދަލުކުރުމުގެ މަޝްރޫއުގެ ދަށުން، ނެރު ފުންކުރުމާއި އައު ހާބަރ ބޭސިން ފުންކުރުމުގެ މަސައްކަތް ނިމިފައިވާ ކަމަށެވެ. އަދި މިހާރު ކުރިއަށްދަނީ ބޭރު ތޮށީގެ ބެޑް ތައްޔާރުކުރުމުގެ މަސައްކަތާއި ރެވެޓްމެންޓް ޕްރޮފައިލްކުރުމުގެ މަސައްކަތް ކަމަށް އެމްޓީސީސީން ބުނެއެވެ.

މި މަޝްރޫއުގެ ދަށުން 9346.56 ކިއުބިކް މީޓަރުގެ ސަރަހައްދެއްގައި އައު ހާބަރ ބޭސިން ފުންކޮށްފައިވާއިރު، 4954.91 ކިއުބިކް މީޓަރުގެ ސަރަހައްދުގެ, ނެރަށް ވަދެވެން އޮންނަ ދިމާ ފުންކޮށްފައިވެއެވެ. އަދި 142 މީޓަރުގެ ސަރަހައްދުގައި ބޭރުތޮށިލުމާއި، 198 މީޓަރުގެ ސަރަހައްދުގައި ރިވެޓްމެންޓް ޖެހުމުގެ މަސައްކަތް ކުރިއަށްދާނެ ކަމަށް އެމްޓީސީސީން ބުނެއެވެ.

އެރަށުގެ ބަނދަރު ހެދި އިރު ހަދާފައިވާ ނެރަކީ މޫސުން ގޯސްދުވަސްވަރު ބޭނުންކުރުމަށް ރައްކާތެރި ގޮތަކަށް ހަދާފައިވާ ނެރެއް ނޫނެވެ. އަދި އޮއިބާރުވާ ދުވަސްވަރު ނެރު ބޭނުން ނުކުރެވުމަކީ އެރަށުގެ ރައްޔިތުންގެ ވަރަށް ބޮޑު ކަންބޮޑުވުމެކެވެ. މި މައްސަލައަށް ހައްލެއް ހޯދައިދިނުމަށް އެމްޓީސީސީން އަމަލީ މަސައްކަތް ފަށާފައިވަނީ 02 އޭޕްރީލް 2022 ގައެވެ.

މި މަޝްރޫއަކީ 35.38 މިލިއަން ރުފިޔާގެ މަޝްރޫއެކެވެ.

ވޭތުވެދިޔަ 4 އަހަރުތެރޭ އެމްޓީސީސީން ވަނީ, ބަނދަރު ހެދުމާއި ބިން ހިއްކުމާއި އަދި ގޮނޑުދޮށް ހިމާޔަތްކުރުމުގެ ގިނަ މަޝްރޫއުތަކެއް ނިންމާފައެވެ.