މުއްދަތު ހަމަވެފައިވާ ލައިސަންސް މި މަހުގެ ނިޔަލަށް ބޭނުން ކުރެވޭނެ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޓްރާންސްޕޯޓް މިނިސްޓްރީން ކުރި އިއުލާނެއްގައި ވަނީ، މުއްދަތު ހަމަވެފައިވާ ލައިސަންސް ކާޑު މިމަހުގެ 31 ވަނަ ދުވަހުގެ ނިޔަލަށް ބޭނުންކުރެވޭނެ ކަމަށެވެ.
އެކަމަކު މުއްދަތު ހަމަވެފައިވާ ލައިސަންސް ބޭނުންކުރުމުގެ މުއްދަތު އަނެއްކާވެސް އިތުރުކުރި ސަބަބެއް އެ މިނިސްޓްރީން ހާމައެއް ނުކުރެއެވެ.
ޓްރާންސްޕޯޓް މިނިސްޓްރީން މިހާރު އެއްގަމު އުޅަނދު ދުއްވުމުގެ ލައިސަންސް ދޫކުރަނީ ޑިޖިޓަލްކޮށެވެ.
އޮންލައިންކޮށް ލައިސަންސަށް އެދުމުގެ ކަންތައްތައް ދަނީ ރަނގަޅަށްކަމަށާއި، އެކަމަށް އާންމުންގެ ތަރުހީބު ބޮޑުކަމަށް އެ މިނިސްޓްރީން ވަނީ ބުނެފައެވެ.
އެ މިނިސްޓްރީން ބުނީ އެއްގަމުގައި ދުއްވާ އުޅަނދުފަހަރުގެ ދުއްވުމުގެ ލައިސަންސްގެ ޚިދުމަތް ފެށިގެން އައިއިރު ގޮންޖެހުންތަކާ ކުރިމަތިވިނަމަވެސް މިހާރު ޕްރޮސެސް ކުރިއަށްދަނީ ވަރަށް ރަނގަޅަށް ކަމަށެވެ.
މިއީ ޑިޖިޓަލައިޒޭޝަންގެ ތެރެއިން ގެނެވޭ ފުރަތަމަ ޚިދުމަތްކަން ފާހަގަކޮށް އެ މިނިސްޓްރީން ބުނީ، ކުރިއަށް އޮތް ތަނުގައި އޮންލައިންކޮށް އެއްގަމާއި ކަނޑުގެ ލައިސަންސަށްވެސް އެދެވޭނެ ކަމަށެވެ. އަދި މިނިސްޓްރީގެ މަގުސަދަކީ ޚިދުމަތްތައް ޑިޖިޓަލައިޒްކުރުން ކަމަށްވެސް ބުނެފައި ވެއެވެ.
އެއްގަމު އުޅަނދު ދުއްވުމުގެ ލައިސަންސް ޑިޖިޓަލައިޒްކޮށް، އެ ޚިދުމަތް މިނިސްޓްރީން ތައާރަފުކޮށްފައިވާއިރު، މި ބަދަލާއެކު މިހާރު އީފާސް ޕޯޓަލް އަދި ޕޮލިސް ޕޯޓަލް މެދުވެރިކޮށް ލައިސަންސް ބަލާލެވޭނެއެވެ. މީގެ އިތުރުން ލައިސަންސް ކާޑު ޕޭޖުން ފެންނާނެ ކަމަށާއި، ކާޑާއެކު އަރާ ކިއުއާރް ކޯޑު ސްކޭން ކޮށްލުމުން ލައިސަންސްގެ ހުރިހާ ތަފްސީލެއް ލިބެން ހުންނާނެ ކަމަށް ޓްރާންސްޕޯޓް މިނިސްޓްރީން ބުނެއެވެ. ފިޒިކަލް ލައިސަންސް ކާޑު ނެތަސް ފުލުހުންގެ މޯބައިލް އެޕް "ޕޮލިސް އެމްވީ"ން ފެންނަ ޑިޖިޓަލް ލައިސަންސް ބަލައިގަންނާނެ ކަމަށް މިނިސްޓްރީން ބުނެފައިވެއެވެ.
