ދެ ރައީސުން ތިބި ކަމަށް ބުނާ މައްސަލަ ސުޕްރީމް ކޯޓުން ބޭރުކޮށްލައިފި
މިއީ ޕީޕީއެމް/ޕީއެންސީ ކޯލިޝަނުން ހުށަހެޅި މައްސަލައެއް
ރައީސް އާއި ނައިބު ރައީސް
ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކާ މެދު ގާނޫނީ ސުވާލު އުފެދިފައިވާ ކަމަށް ބުނެ އެކަމުގައި ގޮތެއް ނިންމުމަށް އިދިކޮޅު ޕީޕީއެމް/ޕީއެންސީ ކޯލިޝަނުން ސުޕްރީމް ކޯޓަށް ހުށަހެޅި ދުސްތޫރީ މައްސަލަ އެ ކޯޓުން ބޭރު ކޮށްލައިފިއެވެ.
މި މައްސަލަ އެ ކޯލިޝަނުން ކޯޓަށް ހުށަހެޅީ މި އަހަރުގެ ފެބްރުއަރީ މަހުގެ 27 ވަނަ ދުވަހުއެވެ. މިއީ މި މައްސަލަ ސުޕްރީމް ކޯޓަށް ހުށަހެޅި ދެވަނަ ފަހަރެވެ. ފުރަތަމަ ފަހަރަށް ހުށަހެޅުމުން ވެސް ސުޕްރީމް ކޯޓުން ވަނީ އެ މައްސަލަ ބޭރު ކޮށްލައިފައެވެ.
އިދިކޮޅު ކޯލިޝަނުން މި މައްސަލަ ސުޕްރީމް ކޯޓަށް ހުށަހެޅީ 25 ފެބްރުއަރީ 2022 ގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ތައިރޮއިޑް ސާޖަރީއެއް ހެއްދެވުމަށްޓަކައި ރައީސްކަމުގެ ޒިންމާ ވަގުތީގޮތުން އެމަނިކުފާނުގެ ނައިބު، ފައިސަލް ނަސީމާ ހަވާލު ކުރައްވާފައިވާތީއެވެ. އެގޮތުން، ނައިބު ރައީސް ހުންނެވީ ރައީސް ކަމުގެ ހުވާ ކުރައްވައިގެން ކަަމަށާއި އެ މަގާމުން ރައީސް ޞާލިހު މިހާރު ވަކިވެފައިވާ ކަމަށް އެ ކޯލިޝަނުން ވަނީ ބުނެފައެވެ.
ސުޕްރީމް ކޯޓުގެ ރަޖިސްޓްރާ އެ މައްސަލަ ބަލައިނުގަތުމަށް ނިންމެވިނަމަވެސް އެ ނިންމުން ފަނޑިޔާރުންގެ މަޖިލީހުގައި އިސްތިއުނާފް ކުރުމުގެ ފުރުސަތު އަދިވެސް އޮންނާނެ އެވެ. އަދި މައްސަލަ ބަލައިގަތުމާ މެދު އެންމެ ފަހުގެ ނިންމުން ނިންމާނީ ފަނޑިޔާރުންގެ މަޖިލީހުންނެވެ.
2018 ވަނަ އަހަރު އިންތިޚާބުކުރެވުނު ރައީސުލްޖުމްހޫރިއްޔާގެ ނައިބު، ރައީސުލްޖުމްހޫރިއްޔާގެ ދުސްތޫރީ ހުވައިކުރައްވައި ރައީސުލްޖުމްހޫރިއްޔާގެ މަޤާމާ ހަވާލުވެވަޑައިގެންފައިވަނިކޮށް، 2018 ވަނަ އަހަރު އިންތިޚާބުވެވަޑައިގެންފައިވާ ރައީސުލްޖުމްހޫރިއްޔާ އަލުން މަޤާމާ ހަވާލުވެވަޑައިގަތުމުން އުފެދިފައިވާ ދުސްތޫރީ އޮޅުންބޮޅުމަށް ސާފު ހައްލެއް ހޯދައިދިނުމަށް ގޮވާލައި ރައްޔިތުންގެ މަޖިލީހަށް ވެސް ގަރާރެއް ހުށަހެޅިއެވެ.
