ފާއިތުވި ހަފްތާގައި ރާއްޖެއިން ކޮވިޑް-19 ޖެހުނީ 6 މީހުންނަށްކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތަކަށް ބަލާލާއިރު ފެބްރުއަރީ 26ން މާޗް 4ށް މާލެ ސަރަހައްދުން 2 މީހުންނަށް ކޮވިޑް ޖެހިފައިވެއެވެ. އަދި އެހެނިހެން ހިސާބުތަކުން 4 މީހުންނަށް ކޮވިޑް ޖެހިފައެވެ. ފާއިތުވި ހަފްތާ ގައި އެއްވެސް މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާދީފައެއްނުވެއެވެ.

އޭގެކުރީ ހަފްތާގައި ރާއްޖެއިން ކޮވިޑް-19 ޖެހިފައިވަނީ 3 މީހުންނަށެވެ.

މިއާއެކު ރާއްޖެއިން މިހާތަނަށް 185،738 މީހުންނަށް ވަނީ ކޮވިޑް-19 ޖެހިފައެވެ. އަދި 311 މީހުން ވަނީ މަރުވެފައެވެ.

ވެކްސިންގެ ތަފާސްހިސާބުތަކަށް ބަލާލާއިރު މާޗް 4 ވަނަ ދުވަހުގެ ނިޔަލަށް ފުރަތަމަ ޑޯޒް 399،228 މީހުން ޖަހާފައިވެއެވެ. ދެވަނަ ޑޯޒް 385،113 މީހުން ޖަހާފައިވާއިރު ބޫސްޓަރ ފުރަތަމަ ޑޯޒް 167،656 މީހުން ވަނީ ޖަހާފައެވެ. އަދި 1538 މީހުން ވަނީ ބޫސްޓަރ ދެވަނަ ޑޯޒް ޖަހާފައެވެ.