ގާނޫނަށް ބަދަލު ނާންނަ ހިނދެއްގައި ވޯޓްލުމަށް ޑިޖިޓަލް އައިޑީ ބޭނުމެއްނުކުރެވޭނެ: އީސީ
5 މާރިޗު 2023 | އާދީއްތަ 17:44ގާނޫނުގައި ޑިޖިޓަލް އައިޑީ ބޭނުންކުރާ ވާހަކައެއް ނެތް
އިލެކްޝަންސް ކޮމިޝަންގެ ނައިބުރައީސް، އިސްމާއީލް ހަބީބް
ގާނޫނަށް ބަދަލު ނާންނަ ހިނދެއްގައި، އެއްވެސް އިންތިޚާބެއްގައި ވޯޓްލުމަށް ޑިޖިޓަލް އައިޑީ ބޭނުން ނުކުރެވޭނެ ކަމަށް އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި އާދިއްތަ ދުވަހުގެ ރޭ ވާހަކަފުޅުދައްކަވަމުން ހަބީބު ވިދާޅުވީ، އިލެކްޝަންސް ކޮމިޝަނުން އަބަދުވެސް ބަލާނީ ގާނޫނުގައި އޮންނަ ގޮތަށް ކަމަށެވެ. ވޯޓްލާއިރު ގެންނަ ޖެހެނީ ކޮން އެއްޗެއްކަން ގާނޫނުގައި ކަނޑައެޅިގެން ބުނެފައިވާކަމަށާއި އެގޮތުން މުއްދަތު ހަމަނުވާ އައިޑީކާޑު، ޕާސްޕޯޓް ނުވަތަ ލައިސަންސު ކާޑު އަދި ޕާސްޕޯޓް ކާޑު ގެންނަން އޮންނަކަމަށް ވިދާޅުވިއެވެ.
ގާނޫނުގައި ޑިޖިޓަލް އައިޑީ ބޭނުންކުރާ ވާހަކަ ނެތްކަން ފާހަގަކުރައްވައި ހަބީބު ވިދާޅުވީ، ވޯޓްލާ މީހުން ވޯޓްލާ މަރުކަޒަށް ފޯނު ވެއްދުން ގާނޫނުން މަނާކުރާކަމަށެވެ. އެހެންކަމުން ޑިޖިޓަލް އައިޑީ ތައާރަފުކުރިނަމަވެސް، މިހާރު ގާނޫނު އޮތްގޮތުން އެކަން އިލެކްޝަންސް ކޮމިޝަނަށް ނުކުރެވޭނެ ކަމަށް ވިދާޅުވިއެވެ.
ލޮލަށް ފެނުމުން މަހުރޫމްވެފައިވާ މީހުންނަށްވެސް ސިއްރު ވޯޓެއް ލުމުގެ ފުރުސަތު އޮންނަންޖެހޭނެ ކަމަށާއި, އެއީ ގާނޫނުން ލިބިދޭ ހައްގެއްކަމަށް ބުނެ، އެ ފުރުސަތު ހޯދައިދޭން ބްލައިންޑް އެސޯސިއޭޝަނުން ވަނީ އެދިފައެވެ. ބްލައިންޑް އެސޯސިއޭޝަންގެ ނައިބު ރައީސް ހުސައިން ޝަރީފް ނޫސްވެރިންނާ ބައްދަލުކުރައްވައި ބުދަ ދުވަހު ވިދާޅުވީ، ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކޮށްދޭ ގާނޫނުން ކަށަވަރުކޮށްދީފައިވާ މިނިވަންކަމާއެކުވެސް، ސިއްރު ވޯޓެއް ލުމުގެ ހައްގުން އެ ފަރާތްތައް މަހުރޫމްކޮށްފައިވާކަމަށެވެ.
މިކަމާ ގުޅިގެން ހަބީބް ވިދާޅުވީ، އިލެކްޝަންސް ކޮމިޝަންގެ ޓެމްޕްލެޓް ހުންނަނީ ވޯޓް ކަރުދާސް ލެވޭގޮތަށް ހަދާފައި ކަމަށާއި، އޭރުން އެމީހަކު ފާހަގަ ޖަހަން ބޭނުންވާ އަސްލު ތަނުގައި ޖެހުމުގެ ފުރުސަތު ލިބިގެންދާނެ ކަމަށެވެ. އަދި މިފަހަރުގެ ރިޔާސީ އިންތިޚާބުގައި، ލޮލަށް ފެނުމުން މަހުރޫމްވެފައިވާ މީހުންނަށްވެސް އެކަނި ގޮސް ވޯޓްލެވޭނެ ގޮތް ހަމަޖެއްސުމަށް ކޮމިޝަނުން ކުރަންޖެހޭ ހުރިހާ މަސައްކަތެއް ކުރާނެ ކަމަށް ވިދާޅުވިއެވެ. މިކަމަށް ގާނޫނީ ހައްލެއް ގެނައުމުގެ މަސައްކަތް ފަށާފައިވާކަމަށް ވެސް ހަބީބު ވިދާޅުވިއެވެ.
ހަބީބް އިތުރަށް ވިދާޅުވީ، އިންތިޚާބާބެހޭ ގާނޫނަށް ބަލާއިރު، ހަމައެކަނި ފާހަގަކޮށްފައި އޮންނަނީ ވޯޓް ކަރުދާހުގައި ފާހަގަ ޖެހުމުގައި ޖިސްމާނީ ގޮތުން ނުކުޅެދުންތެރިކަން ހުންނަ މީހުންނަށް ފުރުސަތު ދޭ ވާހަކަ އެކަނި ކަމަށާއި، އެފަދަ މީހުން އެހީތެރިންނާއެކު ވޯޓްލުމަށް ފުރުސަތު ދޭން ޖެހޭ ކަމަށެވެ. އަދި ގާނޫނުތަކަށް އަންނަ އިސްލާހުތަކާއެކު އެފަރާތްތައް ބޭނުންވާ ގޮތަށް ވޯޓްލުމުގެ ހައްގު ފަހިވެގެންދާނެ ކަމަށްވެސް ވިދާޅުވިއެވެ.
