މާރޗުގެ ނިޔަލަށް ގާދިއްފުށީ ގޮނޑުދޮށް ހިމާޔަތްކޮށް ނިންމާލެވޭނެ: އާޒިމް
2 މާރިޗު 2023 | ބުރާސްފަތި 03:53މަސައްކަތުގެ ބޮޑު ބައެއް މިހާރު ވަނީ ނިމިފައި
ގާދިއްފުށީ ގޮންޑުދޮށް ހިމާޔަތްކުރުމުގެ މަސައްކަތް އެމްޓީސީސީގެ ޓީމުން ބައްލަވައިލެއްވުން
ތ. ގާދިއްފުށީ ގޮނޑުދޮށް ހިމާޔަތްކުރުމުގެ މަޝްރޫއު މާރޗް މަހުގެ ނިޔަލަށް އެއްކޮށް ނިންމާލެވޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީގެ ސީއީއޯ އިސްވެ ހުންނަވައިގެން ވަނީ ގާދިއްފުށީގެ ގޮނޑުދޮށް ހިމާޔަތްކުރުމުގެ މަޝްރޫއު ކުރިއަށްދާގޮތް ބައްލަވާލައްވާފައެވެ. އަދި މީޑިއާތަކަށް މައުލޫމާތުދެއްވަމުން އާޒިމް ވިދާޅުވީ ގާދިއްފުށީ ގޮނޑުދޮށް ހިމާޔަތްކުރުމުގެ މަޝްރޫއުގެ ބޮޑު ބައެއް މިހާރު ނިމިފައިވާކަމަށެވެ.
އާޒިމް ވިދާޅުވީ އެރަށުން ވަރަށް ބޮޑު ސަރަހައްދެއް ގިރާފައިވާކަމަށެވެ. މިހާތަނަށް ކުރެވުނު މަސައްކަތުން ބޮޑު ސަރަހައްދަކަށް ވެލި އަޅައި ހިމާޔަތްކުރެވިފައިވާކަމަށް އާޒިމް ވިދާޅުވިއެވެ. އަދި މަސައްކަތް ނިމޭ ވަރަކުން އެ ސަރަހައްދުތައް އާންމުންނަށް ހުޅުވާލަމުންދާކަމަށް ވަނީ ވިދާޅުވެފައެވެ.
އާޒިމް ވިދާޅުވީ މި މަސައްކަތް ކުރިއަށްގެންދަނީ ކައުންސިލުން އެދޭ ބައެއް ބަދަލުތައްވެސް ގެންނަމުން ކަމަށެވެ. އީއައިއޭ ހުއްދަ ދޭ ވަރަކަށް ތޮށިގަނޑު ބޭރަށް ޖައްސަން ކައުންސިލުން ބޭނުންވި ކަމަށާއި، އަދި ކައުންސިލުން އެދުނު ގޮތަށް ރަށުގެ ބޭރުން މަގެއް ހެދިފައިވާކަމަށް އާޒިމް ވިދާޅުވިއެވެ.
ގާދިއްފުށީ ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ 23 ސެޕްޓެމްބަރު 2021 ގައެވެ. މި މަޝްރޫއުގެ ދަށުން 500 މީޓަރގެ ރިވެޓްމަންޓް ޖެހުމަށް ހަވާލުކޮށްފައިވެއެވެ. މިއީ 17 މިލިއަން ރުފިޔާގެ މަޝްރޫއެކެވެ.
