ހޮފެންހަމް ބަލިކޮށް ޑޯޓްމަންޑުން އެއް ވަނަ އަށް
މެޗުން މޮޅުވެ ޑޯޓްމަންޑް އެއް ވަނައިގައި އޮތީ ކުޅުނު 22 މެޗުން 24 ޕޮއިންޓާއެކު
ޑޯޓްމަންޑުން ކުޅުނު މެޗުގެ ތެރެއިން
ޖަރުމަނު ލީގުގައި ހޮފެންހަމާ ދެކޮޅަށް ކުޅުނު މެޗުން މޮޅުވެ ބޮރޫޝިއާ ޑޯޓްމަންޑުން ލީގު ތާވަލްގެ އެއް ވަނަ އަށް ޖެހިލައިފި އެވެ.
ހޮނިހިރު ދުވަހުގެ ރޭ ހޮފެންހަމްގެ ދަނޑުގައި ކުޅުނު މެޗަށް ނިކުތްއިރު، ލީގުގައި ތިން ޓީމު ވަނީ ޕޮއިންޓުގެ ގޮތުން އެއްވަރުވެފަ އެވެ. އެއީ ޑޯޓްމަންޑާއި، އެންމެ ފަހުގެ ޗެމްޕިއަން ބަޔާން މިއުނިކާއި، ޔޫނިއަން ބާލިން އެވެ. މޮޅުވެގެން އެއް ވަނަ އަށް ޖެހިލެވެން ލިބުނު ފުރުސަތުގެ ބޭނުން ހިފައި ޑޯޓްމަންޑުން ވަނީ އެއް ވަނަ އަށް ޖެހިލައިފަ އެވެ. މެޗުގެ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް މާކޯ ރެއުސް ތަނަވަސްކޮށްދިން ފުރުސަތެއްގައި ޑޯޓްމަންޑަށް ލީޑު ނަގައިދިނީ ހޫލިއަން ބްރަންޑްޓް އެވެ. އޭގެ ފަހުން ދެ ވަނަ ހާފުގައި މާރިއުސް ވޮލްފް ލަނޑެއް ޖެހި ނަމަވެސް ވީއޭއާރުން ވަނީ އެ ލަނޑު ބަލައި ނުގަންނަން ނިންމައިފަ އެވެ.
މެޗުން މޮޅުވެ ޑޯޓްމަންޑް އެއް ވަނައިގައި އޮތީ ކުޅުނު 22 މެޗުން 24 ޕޮއިންޓާއެކު އެވެ. ޑޯޓްމަންޑަށް ވުރެ މަދުން މެޗެއް ކުޅެގެން ދެ ވަނިގައި އޮތް ބަޔާން އާއި ތިން ވަނައިގައި އޮތް ޔޫނިއަން ބާލިން އަށް ލިބެނީ 43 ޕޮއިންޓެވެ. ލީގުގައި އާދިއްތަ ދުވަހުގެ ރޭ މި ދެ ޓީމު ބައްދަލު ކުރާ މެޗުން މޮޅުވާ ޓީމަކަށް ޑޯޓްމަންޑާ އެއްވަރު ކުރުމުގެ ފުރުސަތު އޮންނާނެ އެވެ.
