މަގުތަކުގައި ތާރު އަޅާގޮތް މިނިސްޓަރު އަސްލަމް މަޖިލީހުގެ ރައީސްއަށް ކިޔައިދެއްވައިފި
ތާރު ކަނޑާ ނަގާނެ، އެއީ އެ މަސައްކަތް ކުރާ ގޮތް
އަމީނީ މަގުގައި ތާރު އެޅުމުގެ މަސައްކަތް ކުރަނީ
އަމީނީ މަގުގައި އެޅި ތާރު ކަނޑާ ނަގަމުންދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމާއި ގުޅިގެން، އެކަން ކުރާ ގޮތް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާ ސްޓަރަކްޗަރ މުހައްމަދު އަސްލަމް ސާފުކޮށްދެއްވައިފިއެވެ.
މަގުތައް ތަަރައްގީކުރުމަށްފަހު ކޮނެ، ކަނޑާ ހަދާތީ އެކަމާއި ގުޅިގެން ކުޑަހުވަދޫ ދާއިރާގެ މެންބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރު އަސްލަމް ވިދާޅުވެފައިވަނީ މަގުތައް ނުކޮންނަ ހިސާބަށް ނުދާތަން ފާހަގަވާ ކަމަށެވެ. ކޮންމެވެސް ކަމެއް ކޮށްލަން މަގު ކަނޑާ ނަގަން ޖެހޭ ކަމަށާއި، އެހެންވަނީ ހުރިހާ ނިޒާމެއް ގާއިމްވެފައި ނެތުމުން ކަމަށެވެ. އަދި އެ ހުރިހާ ނިޒާމެއް ގާއިމްވެފައި އޮތްނަމަ ރާއްޖެ ވާނީ ތަރައްގީވެފައިވާ ގައުމެއްގެ ގޮތުގައި ކަމަށާއި، ތަރައްގީވަމުން އަންނަ ގައުމަކަށްވުމުން، އެކި ޒާތުގެ ކަންކަން ދިމާވަމުންދާ ކަމަށެވެ. އަދި ހުރިހާ ކަމެއް ހައްލުވެގެން މަސައްކަތް ކުރަމުންދާ ކަމަށް ނުދެންނެވޭނެ ކަމަށެވެ.
އެއަށްފަހު އިތުރު މެންބަރަކަށް ފުރުސަތު ދިނުމުގެ ކުރިން ރައީސް ނަޝިދުވަނީ މެންބަރުގެ ސުވާލު ތަކުރާރުކުރައްވާ މެންބަރު އެއްސެވީ ތާރު އަޅާފައި ކަނޑާ ނަގަނީ ކީއްވެގެންތޯ އައްސަވާފައެވެ.
މަޖިލީހުގެ ޖަލްސާގައި މެންބަރު ހަސަން ލަތީފުގެ ވާހަކައަށްފަހު ވެސް ރައީސް ނަޝީދު ވަނީ އަމީނީ މަގުން ތާރު ކަނޑާކަމަށް ވިދާޅުވެ އެވާހަކަ ދައްކަވާފައެވެ.
ރައީސް ނަޝީދުގެ ވާހަކަފުޅަށް ޖަވާބުދެއްވަމުން މިނިސްޓަރު ވަނީ އަމީނީ މަގުގައި ހިނގާ މަސައްކަތް ތަފްސީލުކޮށް އެކަން ކުރަމުންދާ ގޮތް ކިޔައިދެއްވާފައެވެ. މިނިސްޓަރު ވިދާޅުވީ ތާރު ކަނޑަނީ، ތާރު އަޅާ ނިމޭއިރު މަގުގައި ހުންނަ ޖަންކްޝަންތަކުގެ މަތީގައި ހުރި ކޮންޓްރީޓް ބައި ކަމަށެވެ. ތާރުއަޅަމުންދާއިރު ޕޭވަރު ދާނީ އޭގެވެސް މަތިން ކަމަށާއި، އެހެންކަމުން އެތާ މަތީގައި ތުނި އެއްޗެއް އަޅާ ބާއްވާފައި އޭގެ މަތިން ތާރު ކަނޑާ ނަގާނެ ކަމަށެވެ. އެއީ އެ މަސައްކަތް ކުރާ ގޮތް ކަމަށް މިނިސްޓަރު ތަކުރާރުކޮށް ވިދާޅުވިއެވެ.
މިނިސްޓަރު ވިދާޅުވީ އެއީ އެ މަސައްކަތް ކުރާ ގޮތް ކަމަށާއި، އެ އެތިކޮޅު ކަނޑާ ނަގާނެ ކަމަށެވެ. އެއީ ތުނިތުނިކޮށް ޕޭވަރުން އެޅިފައި ހުންނަ ތާރު ކޮޅެއް ކަމަށާއި، އެތަންކޮޅު ނަގާނެ ކަމަށާއި، އެއީ މަގުގައި ތާރު އަޅާގޮތް ކަމަށް މިނިސްޓަރު އަސްލަމް ވިދާޅުވިއެވެ.
