އަނބިމީހާއަށް ގެވެށި އަނިޔާކުރި މައްސަލަ: އަނބިމީހާ ބުނަނީ ގަޔަށް ވަޅި ހެރިފައިވަނީ ނިދީގައި ފުރޮޅެމުން ކަމަށް
މި މައްސަލައިގެ ޙުކުމް ކުރެއްވުން 6 މާރޗުގެ 09:00 ގައި އޮންނާނެ
އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނި
މާލޭ ގެއެއްގައި ބިދޭސީ އަންހެނަކަށް ގެވެށި އަނިޔާކުރި މައްސަލައިގައި ހައްޔަރުކުރި ބިދޭސީ މީހާއަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
ބުދަ ދުވަހުގެ އަޑުއެހުމުގައި އޮތީ ޚުލާސާ ބަޔާން އިއްވުމެވެ. އެގޮތުން ދައުލަތުން އޭނާގެ މައްޗަށް ކޮށްފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
އޭނާ އަނބިމީހާއަށް ޙަމަލާ ދީފައިވަނީ އަނބިމީހާ ނިދާފައި އޮއްވައިކަމަށް ދައުލަތުން ބުނެއެވެ.
އޭނާގެ އަނބިމީހާ ބުނެފައިވާ ގޮތުގައި އެ ޙާދިސާ ހިނގިއިރު ދެމީހުން ދިރިއުޅެމުން ދިޔައީ އެއް ގެއެއްގައެވެ. އެރޭ އޭނާ ނިދަން އޮތީ ސިޓިންގ ރޫމުގައި ކަމަށާއި، އޭނާއަށް ހޭލެވުނީ ފަތިހުކަމަށް ބުނެފައިވެއެވެ.
އޭނާ ހެކިބަސް ދީފައިވަނީ ތަހުގީގުގައި ދީފައިވާ ބަޔާނާ ޚިލާފަށެވެ. އެގޮތުން ހެކިބަސް ދެމުން އޭނާ ބުނެފައިވަނީ އޭނާ ނިދަން އޮތީ ސިޓީންގ ރޫމުގައި އޭނާ ތަރުކާރީ ކޮށަން ހުންނަ ތަނާ ދިމާލުގައި ކަމަށެވެ.
އެތަނުގައި އާންމުކޮށް ވަޅި ފަދަ ތަކެތި ހުންނަކަމާއި، އަދި އޭނާގެ ގަޔަށް ވަޅި ހެރިފައިވަނީ ނިދީގައި ފުރޮޅެމުން ކަމަށް ބުނެ އޭނާ ވަނީ އޭނާ ތަހުގީގުގައި ބަޔާން ދިން ގޮތާ ޚިލާފަށް ހެކިބަސް ދީފައެވެ.
އެހެންނަމަވެސް އޭނާ ސީންގައި ހުރެ ފުލުހުން ގާތުގައި ބުނެފައިވަނީ އޭނާއަށް ޙަމަލާދިނީ ފިރިމީހާ ކަމަށެވެ. އެކަން ބަޔާންކޮށް ސީން އޮފް ކްރައިމް އޮފިސަރުން ވަނީ ހެކިބަސް ދީފައެވެ.
އޭގެ އިތުރުން، މި މައްސަލައިގެ މެޑިކޯ ލީގަލް ރިޕޯޓު ތައްޔާރު ކުރެއްވި ޑޮކްޓަރުވެސް ވަނީ، ވަޅީގެ ތިލަ ހަށިގަނޑުގެ އެތެރެއަށް ވަދެފައިވާކަމަށް ބުނެފައެވެ. އަދި ސީޓީ ސްކޭނުންވެސް ދައްކަނީ އެގޮތަށެވެ.
ދައުލަތުން ހުށައެޅި ހެކީގެ އިތުރުން، ސީނަށް ދިޔަ ފުލުހުންގެ ބަޔާނާއި، އަދި އަނިޔާ ލިބުނު ފަރާތް ތަހުގީގަށް ދީފައިވާ ބަޔާނަށް ބަލާއިރު، އެކަންކަން ގުޅިގެން އަންނަކަމަށް ދައުލަތުން ބުނެއެވެ.
އޭނާ ތަހުގީގަށް ދިން ބަޔާން ފަހުން ބަދަލުކޮށްފައިވާއިރު، ގެވެށި އަނިޔާގެ މައްސަލަތަކުގައި އާންމު ގޮތެއްގައި މިގޮތަށް ހިނގާކަން ފާހަގަކޮށް ދައުލަތުން ވަނީ، މި މައްސަލައިގައިވެސް ހުށައެޅިފައިވާ ހެކި ޤަރީނާއަށް ބަލައި އަދުލުވެރި ޙުކުމެއް ކުރެއްވުމަށް އެދިލައްވާފައެވެ.
ދެން ކުރިއަށް ދިޔައީ ދިފާއުން ޚުލާސާ ބަޔާން އިއްވުމެވެ. އެގޮތުން ދައުވާއަށް އިންކާރު ކުރާ ކަމަށާއި، އޭނާ އެފަދަ ކަމެއް ނުކުރާކަމަށް އޭނާގެ އަނބިމީހާވެސް ބުނެފައިވާކަމަށް ޚުލާސާ ބަޔާނުގައި ދިފާއީ ވަކީލު ފާހަގަ ކުރެއްވިއެވެ.
ދިފާއުން ބުނާ ގޮތުގައި މި މައްސަލައިގެ ސީންއަށް ދިޔަ ފުލުހުންގެ ހެކިބަހުގައި އަނިޔާވި ފަރާތް ބުނި ބުނުން ކިޔާދީފައިވާ ގޮތް ތަފާތެވެ.
މި މައްސަލައިގެ ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި ގާޒީ ޝަފީއު ވިދާޅުވީ، މި މައްސަލައިގެ ޙުކުމް ކުރެއްވުން 6 މާރޗުގެ 09:00 ގައި އޮންނާނެކަމަށެވެ.
މި ޙާދިސާއާ ގުޅޭ ވީޑިއޯއެއް އާންމުވެފައިވާއިރު، ވީޑިއޯއިން ފެންނަނީ ގެއެއްގެ ސިޑިމަތިން ފުލުހުންގެ އެހީތެރިކަމާއެކު އެ އަންހެންމީހާ ފައިބައިގެންދާ މަންޒަރެވެ. އޭނާ ލައިގެން ހުރި ހެދުމުގެ ފަސްބައިގައި ވަރަށް ގިނަ ލޭ ހުއްޓެވެ.
އަންހެން މީހާގެ ޅިނދުކަށިގަނޑު ކައިރިއަށް ތޫނު އެއްޗަކުން ހަމަލާދީފައިވާއިރު، ވަރަށް ބޮޑަށް ޒަޚަމްވެފައިވެފައިވެއެވެ.
