ތުރުކީއާއި ސީރިޔާއަށް، ނިމުނު ހަފުތާގައި އައި ބާރުގަދަ ބިންހެލުމުގައި މަރުވި މީހުންގެ އަދަދު 23 ހާހަށް އަރާފައިވާއިރު، މި އަދަދު އަދިވެސް ވަރަށް ބޮޑަށް އިތުރުވަމުން ދާނެކަމަށް ދަނީ ބެލެމުންނެވެ.

މަރުނުވެ ސަލާމަތްވީ މީހުންގެ ތެރެއިން އެންމެ ފުން އަސަރެއް ކުރާނީ ބިންހެލުމުގައި ވެއްޓުނު އިމާރާތްތަކުގެ ދަށުން ނެރެ ސަލާމަތްކޮށްފައިވާ ގިނަ އަދަދެއްގެ ތުއްތުކުދިންނެވެ. ތުރުކީގެ އަޑާނާގެ ވަކި ހޮސްޕިޓަލެއް މިހާރު ވަނީ މިފަދަ ކުދިންނަށް ޚާއްސަކޮށްފައެވެ. އެކުދިންގެ މައިންބަފައިންނެއް ނެތެވެ. އަޅާލާނެ އާއިލާގެ މީހަކު ނެތެވެ. އަމުދުން އެކުދިން ނިސްބަތްވަނީ ކޮން ތަނެއްގެ ކޮންއާއިލާއަކަށްކަންވެސް ނޭނގެއެވެ. ކުދިންގެ އަމިއްލަ ނަމެއްވެސް ގިނަ ކުދިންނަކަށް ނޭގެއެވެ. އެއީ "އެނޯނިމަސް" ކުދިން ތަކެކެވެ.

މި މައުސޫމް ތުއްތު ކުދިންނަށް ބުއްފުޅި ދީ ބަލަހައްޓަމުން ގެންދަނީ ހޮސްޕިޓަލްގެ މުވައްޒަފުންނެވެ. ބައެއް ކުދިންނަށް ލިބިފައިވާ އަނިޔާތަކަށް ފަރުވާދެމުންދަނީ އިންޓެންސިވް ކެއަރގައެވެ. އަތްފައި ބިނދި، ބޮލަށް އަނިޔާވެފައިވާ ކުދިން ބައިވަރެވެ. ނަމަވެސް ކުދިން އަމިއްލައަށްވެސް ގަދަވުމަށް ހިތްވަރު ކުރާ ކަހަލައެވެ. މީހުން ފެނުމުން ހިނިތުން ވެލައެވެ. އުރާލަން ބުނެއެވެ. މިކަމުން މަންޒަރު ފެންނަ މީހުންގެ ހިތްތަކަށް ފުން އަސަރުތަކެއް ކުރުވައެވެ.

އަޑާނާ ހޮސްޕިޓަލުގެ ޑެޕިއުޓީ ޑައިރެކްޓަރ އަދި ޕީޑިއޭޓްރިޝަނެއްގެ ވަޒީފާ އަދާކުރާ ޑޮކްޓަރަކު މައުލޫމާތު ދީފައިވާގޮތުގައި އެކި ކުދިން ފެނުނު އިމާރާތް ނުވަތަ ސަރަހައްދުގެ މައުލޫމާތު އެއްކުރެވޭތޯ ހޮސްޕިޓަލުން ދަނީ މަސައްކަތް ކުރަމުންނެވެ.

ތުރުކީގެ އޮފިޝަލުން ވިދާޅުވެފައިވާގޮތުގައި ޑިޒާސްޓަރ ޒޯންގެ އެކި ތަންތަނުން ސަލާމަތް ކުރެވުނު، ނިސްބަތްވާ ސަރަހައްދު، އާއިލާ ނުވަތަ އަމިއްލަ ނަންވެސް ނޭނގޭ 260ށްވުރެ ގިނަ ކުދިން އެބަތިއްބެވެ. ގެދޮރު ނެތް، މައިންބަފައިން ނެތް ކުދިންގެ އަދަދު އަދި މިއަށްވުރެވެސް އިތުރު ވެގެން ދާނެކަމަށް ދަނީ ބެލެމުންނެވެ. މިހާރުވެސް އަޑާނާ ހޮސްޕިޓަލް ވަނީ އެފަދަ ކުދިން ގެނެސް ފުރިފައެވެ. ރަޖާތަކަށްލައި އޮޅާލާފައި ގޮދަޑިތަކުގެ މަތީގައި އަތުރާލާފައެވެ. ސަރޖަރީ ވޯޑް ވަނީ، އަނިޔާވެގެން އޮޕަރޭޝަންކޮށްފައިވާ ކުދިން ބައިތިއްބައި، ފުރިފައެވެ. ޑޮކްޓަރުން ބުނިގޮތުގައި ވާހަކަދެއްކޭވަރު ބޮޑެތި ކުދިންވެސް އަދި ތިބީ އެއްޗެއް ނުބުނެވި، ޝޮކްގައެވެ. މިވަގުތު އެކުދިންނާ މުއާމަލާތުކުރަން ޖެހެނީ ލޮލާއި ލޯ ސީދާކޮށް، ހަރަކާތުން ކަމަށް ޑޮކްޓަރުން ބުނެފައި ވެއެވެ. ކުދިން ހަމަޖެހުމަށް އަދި ދުވަސް ކޮޅެއް ނަގާނެކަމަށާއި، އޭރުން ކުދިންގެ ކިބައިން މައުލޫމާތު ހޯދަން މަސައްކަތް ކުރާނެ ކަމަށް ބުނެފައި ވެއެވެ. ކުދިން ނިސްބަތްވާ އިމާރާތް ނުވަތަ ސަރަހައްދު އެނގުނުނަމަވެސް އެއީ މިހާރު ގާފުންޏަކަށް ވަނީ ބަދަލުވެފައެވެ.

މިފަދަ ކުދިން އާއިލާތަކާ ގުޅުވުމަށް ތުރުކީގައި ސޯޝަލް މީޑިޔާ މެދުވެރިކޮށްވެސް ބަޔަކު ގެންދަނީ މަސައްކަތް ކުރަމުންނެވެ. މީގެ އިތުރުން، ސަލަމާތްވެ، އަދި ކުދިން ގެއްލިފައިވާ އާއިލާތަކުންވެސް ދަނީ އެކި މެޑިކަލް ސެންޓަރުތަކާއި ހޮސްޕިޓަލްތައް ހޯދަމުންނެވެ.

އަނެއްކޮޅުން އަޑާނާ ހޮސްޕިޓަލަށް އަދިވެސް ކުދިން ގެންނަނީއެވެ. ވަރުބަލިވެ ހޭނެތިފައިވާ ހާލަތުގައެވެ. އަޑާނާގެ އެންމެންނަކީވެސް ބިރުވެރިކަން ތަޖުރިބާކޮށް، ސަލާމަތްވެފައިވާ މީހުންނާއި ކުދިންނެވެ. ހޮސްޕިޓަލްގެ ޑެޕިއުޓީ ޑައިރެކްޓަރުގެ އަމިއްލަ އާއިލާގެ އެތައްބަޔަކު ވަނީ މަރުވެފައެވެ. ގެދޮރުވަނީ ހަލާކުވެފައެވެ. އޭނާވެސް ޒަޚަމްތައް ތަހައްމަލްކުރަމުންދާ އޭނާގެ ކުދިންނާއެކު ހިޔާވަހިކަން ހޯދަމުން ދަނީ ހޮސްޕިޓަލްގައެވެ. އޭނާ ބުނިގޮތުގައި އޭނާ އެތަނުގައި ހުރީ އެ ޔަތީމު ކުދިންނަށްޓަކައެވެ. މަންމައެއްގެ ހައިސިއްޔަތުން ކުރެވޭ ފުން އިހުސާސްތަކުގެ ސަބަބުންނެވެ. މައެއް ބަފައެއް ނެތް، އެހާ ގިނަކުދިން ތިބިއިރު މަޔަކަށް ކުރެވޭނެ އެންމެ ފުން ހިތާމަޔަކީ އަމިއްލަ ތުއްތު ދަރިފުޅާ ވަކިވުންކަމަށް އޭނާބުނެފައި ވެއެވެ.