މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ހިމެނޭ މީހުންގެ ބަންދު ދަމަހައްޓައިފިއެވެ.

ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.

އޭގެ ތެރެއިން އަލީ ޒުބައިރުއާއި އަހުމަދު ސުނައިނު ޝަރުތުތަކާއެކު ބަންދުން ދޫކޮށްލާފައިވަނީ 23 ނޮވެމްބަރު 2022 ގައި ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައެވެ. އެ އަޑުއެހުމުގައި އެ ކޯޓުގެ ގާޒީ މުޙައްމަދު މިސްބާހު ވިދާޅުވީ، މައްސަލައިގެ ހެއްކާއި، ހެކިތަކުން ދައުވާ ސާބިތު ކުރުމަށް ހުރި ފުރުސަތުތައް ފަދަ ކަންކަމަށް ރިއާޔަތްކުރާއިރު، އެމީހުން ބަންދުން ދޫކޮށްލަން ފެނިވަޑައިގަންނަވާކަމަށެވެ.

އަދި، މި މައްސަލަ އެކަށީގެންވާ އަވަސް މިނެއްގައި ކުރިއަށް ގެންދިއުމުގައި ގޮންޖެހުންތައް ހުރި ކަމަށާއި، މައްސަލަ ބެލުމަށް ދާއިމީ ގާޒީއެއް ނެތްކަންވެސް ގާޒީ ފާހަގަ ކުރެއްވިއެވެ.

އޭގެ ފަހުން ބޭއްވި އަޑުއެހުމެއްގައި މުޖާހިދުވެސް ދޫކޮށްލާފައިވާއިރު، އޭނާވެސް ދޫކޮށްލީ ޝަރުތުތަކާއެކުއެވެ. އޭގެ ތެރޭގައި ދައުލަތުގެ ހެކިންނާއި ވާހަކަ ނުދެއްކުމާއި، ހެއްކަށް ނުފޫޒު ނުފޯރުވުމާއި ކޯޓުން އަންގާ ގޮތެއްގެ މަތިން ކޯޓަށް ހާޒިރުވުމަށް އެންގުން ހިމެނެއެވެ. އަދި ދިރިއުޅުމުގެ އަސާސީ ކަންކަން ފުއްދުމަށް ނޫން ގޮތަކަށް ގެއިން ބޭރަށް ނުކުތުން ވަނީ މަނާކޮށްފައެވެ.

ދަށު ކޯޓުގެ އެ ނިންމުންތައް ދައުލަތުން ވަނީ ހައިކޯޓުގައި އިސްތިއުނާފު ކޮށްފައެވެ. އެގޮތުން 7 ޑިސެމްބަރު 2022 ގައި ހައިކޯޓުގައި ބޭއްވި އަޑުއެހުމުގައި ވަނީ މުޖާހިދު ބަންދުން ދޫކޮށްލުމަށް ނިންމި ނިންމުން ބާތިލުކޮށްފައެވެ.

މައްސަލައެއް ލަސްވުމަކީ، ބަންދުގައި ހުންނަންޖެހޭ މީހަކު ދޫކޮށްލަންޖެހޭ ސަބަބެއް ނޫންކަން ފާހަގަކޮށް ހައިކޯޓުގެ ޙުކުމުގައި ބުނެފައިވަނީ، މައްސަލަ ބަލާ ކޯޓެއްގައި ނުވަތަ އެ ކޯޓެއްގެ ސެކްޝަނުގައި ނުވަތަ ޖުޑީޝަލް ދާއިރާގެ ކޯޓެއްގައި ދާއިމީ ފަނޑިޔާރަކު ނެތްނަމަ، ޢަމަލު ކުރަންވީ ގޮތް ޤާނޫނުގައި ބަޔާންކޮށްފައިވާ ކަމަށެވެ.

ޙުކުމުގައި ފާހަގަ ކުރައްވާފައިވާ ގޮތުގައި މުޖާހިދު ޝަރީޢަތް ނިމެންދެން ބަންދުކޮށްފައިވާ މައްސަލައަކީ، 100 ކިލޯ ނުވަތަ އެއަށްވުރެ ގިނަ ކިލޯގެ މަސްތުވާތަކެތި ހިމެނޭ މައްސަލައެއްގައި، އޭގެތެރެއިން 80 ވަރަކަށް ކިލޯއާ އަޙްމަދު މުޖާހިދުއާ ގުޅުވާލެވޭ އެކަށީގެންވާ ހެކިތަކެއް ހުރި މައްސަލައެކެވެ.

އަދި މަސްތުވާތަކެތި މުޖުތަމަޢަށް ފޯރުކޮށްދިނުމުގައި ނުވަތަ މި ކަމުގެ ވިޔާފަރީގައި އަޙްމަދު މުޖާހިދު ޝާމިލުވާކަމަށް ބެލެވޭނެ ހެކިތައް ހުށަހަޅާފައިވާކަންވެސް ޙުކުމުގައި ބަޔާން ކުރައްވާފައިވެއެވެ. ވުމާއެކު، މުޖާހިދު ޝަރުޠުކޮށް ދޫކޮށްލުމަށް ކްރިމިނަލް ކޯޓުން ނެރެފައިވާ އަމުރު ނެގެހެއްޓިދާނެ ޤާނޫނީ ސަބަބެއް އޮތްކަމަކަށް ދެކިވަޑައިނުގަންނަވާކަން ހައިކޯޓުުގެ ޙުކުމުގައި ފާހަގަ ކުރެއްވިއެވެ.

އެ ކަންކަމުގެ މައްޗަށް ރިއާޔަތްކޮށް އަންގާރަ ދުވަހުގެ އަޑުއެހުމުގައި ދައުލަތުން ވަނީ، އެމީހުން ޝަރީއަތް ނިމެންދެން ބަންދު ކުރުމަށް ނިންމި ނިންމުން އެގޮތުގެ މަތިން ދެމެހެއްޓުމަށް އެދިލައްވާފައެވެ.

އެކަމާ ގުޅިގެން ދިފާއީ ވަކީލު ވިދާޅުވީ، މި މައްސަލަ އަދިވެސް އޮތީ އިބްތިދާއީ މަރުޙަލާގައި ކަމަށާއި، ދިފާއުން ބޭނުންވަނީ ވީހާވެސް އަވަހަށް މައްސަލަ ކުރިއަށް ގެންދިއުމަށް ކަމަށެވެ. ބަންދު މުރާޖައާއާ ގުޅޭގޮތުން މީގެ ކުރިން ބޭއްވި އަޑުއެހުންތަކުގައި ފާހަގަކުރި ކަންކަން ފިޔަވައި އިތުރު ކަމެއް މިވަގުތަށް ފާހަގަކުރަން ނެތްކަމަށް ދިފާއީ ވަކީލު ވިދާޅުވިއެވެ.

ގާޒީ މުޙައްމަދު މިސްބާހު ވަނީ ދެ ފަރާތުން ދެއްކި ވާހަކައާއި، ހައިކޯޓުގެ ނިންމުމަށް ރިއާޔަތް ކުރައްވައި އަނެއްކާވެސް އެމީހުންގެ ބަންދު ދަމަހައްޓަވާފައެވެ.