ނައިވާދޫ ބަނދަރު އަޕްގްރޭޑްކުރުމުގެ މަސައްކަތް އެމްޓީސީސީއާ ހަވާލުކޮށްފި

ހދ. ނައިވާދޫ ބަނދަރު އަޕްގްރޭޑްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްފިއެވެ.

މި މަސައްކަތުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ސީއީއޯ އާދަމް އާޒިމްއެވެ.

މި މަޝްރޫއުގެ ތެރޭގައި 15،319.91 ކިއުބިކް މީޓަރަށް ބަނދަރު ފުންކުރުމާއި، 41،618.07 ކިއުބިކް މީޓަރަށް އައު ބަނދަރު ފުންކުރުމާއި، 15،319.91 ކިއުބިކް މީޓަރަށް ނެރު ފުންކުރުން ހިމެނެއެވެ. މީގެ އިތުރުން 290 މީޓަރ ބްރޭކްވޯޓަރ ޖެހުމާއި، 10 މީޓަރު ސަބްމާޖް ބްރޭކްވޯޓަރ ޖެހުމާއި، 25 މީޓަރު ގްރޯއިން ޖެހުމާއި، 73.3 މީޓަރ ރިވެޓްމެންޓް ޖެހުމާއި، 231 މީޓަރު އެއްގަމުތޮށި ޖެހުމާއި، 231 މީޓަރު ސްކޯރިން އެޕްރޮންޖެހުމާއި، 62 މޫރިންގ ރިންގް ހަރުކުރުމާއި، 10 މޫރިންގ ބޮއި ހަރުކުރުމާއި، 90 އަކަމީޓަރުގެ ރޭމްޕެއް ހެދުން ހިމެނެއެވެ. މީގެ އިތުރުން އެކްސެސް ޕްލެޓްފޯމް އެޅުމާއި، ކޮންކްރީޓް ޖެޓީއެއް ހެދުމާއި، 2 ނެވިގޭޝަން ލައިޓް ހަރުކުރުމާއި، 18 މަގުބައްތި ހަރުކުރުމާއި 2،087.85 އަކަ މީޓަރުގެ ޕޭންވެމްޓް ހެދުން ހިމެނެއެވެ.

މި މަސައްކަތް އެމްޓީސީސީއާ ހަވާލުކޮށްފައިވަނީ 51.3 މިލިއަން ރުފިޔާއަށެވެ. މި މަސައްކަތް 450 ދުވަހުގެ ތެރޭގައި ނިންމަންޖެހެއެވެ.