ތައުލީމީ ދާއިރާއިން ފަންނީ ގާބިލްކަން އިތުރުކުރަން 26500 އަށްވުރެ ގިނަ މުވައްޒަފުން ތަމްރީނު ކުރެވިފައިވޭ: ރައީސް

މި ސަރުކާރުން މިހާތަނަށް މުދައްރިސުންގެ ފަންނީ ޤާބިލްކަން އިތުރުކުރުމަށް ހިންގި ތަފާތު ޕްރޮގްރާމްތަކުން 26500 އަށްވުރެ ގިނަ މުވައްޒަފުން ތަމްރީނު ކުރެވިފައިވާ ކަަމަށް ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހު ވިދާޅުވެއްޖެއެވެ.

ރާއްޖޭގައި ފުރަތަމަ ފަހަރަށް ތަޢުލީމުގެ ޤާނޫނެއް އެކުލަވާލައި ތަންފީޒުކުރަން ފެށީ 2021 ވަނަ އަހަރެވެ. ފޭދޫ ސްކޫލްގެ 50 ވަނަ އަހަރީ ދުވަހުގެ ޖަލްސާގައި ވާހަކަދައްކަވަމުން ރައީސް ވަނީ ތައުލީމުގެ ޤާނޫނު ތަންފީޒުކުރަން ފެށުމާއެކު، ޤާނޫނީ އޮނިގަނޑުގެ ތެރެއިން ކަށަވަރު ނުވެ ހުރި، އުނގެނުމާ ގުޅޭ އެތައް ޙައްޤެއް މިހާރު ކަށަވަރު ކުރެވިފައިވާ ކަމަށް ވިދާޅުވެފައެވެ. އެއާއި އެކު ނިޒާމަށް އަންނާނެ އެންމެބޮޑު އެއް ބަދަލަކީ، ސްކޫލް މާޙައުލުގެ ތެރެއިން، ފަންނީ އަދި މަސައްކަތްތެރިކަމުގެ ތަޢުލީމު، މިހާރަށްވުރެ ފުޅާގޮތެއްގައި ފޯރުކޮށްދެވޭނެ ގޮތަށް ރާއްޖޭގެ ތަޢުލީމީ ނިޒާމު ބަދަލުވެގެން ދިއުން ކަމަށް ރައީސް ވިދާޅުވިއެވެ.

ރައީސް ވިދާޅުވީ އެ ބަދަލާއެކު، ކުދިންގެ ކިބައިގައި ހުންނަ ތަފާތު ހުނަރުތަކާއި ފަންނުވެރިކަން ތަރައްޤީކުރުމަށް މިހާރަށްވުރެ ފުޅާ ދާއިރާއެއްގައި ފުރުޞަތު ހޯދައިދެވޭނެ ކަމަށެވެ. އަދި ޤައުމުގެ ތަރައްޤީއަށް ކޮންމެހެން ބޭނުންވާ ފަންނުވެރިކަމާއި މަސައްކަތްތެރިކަމުގެ ދާއިރާތަކަށް ކުދިން އަހުލުވެރިކުރެވޭނެ ކަމަށް އެމަނިކުފާނު ވަނީ ވިދާޅުވެފައެވެ. ޤާނޫނީ އޮނިގަނޑަށް ގެނައި މި ބަދަލުތައް ތަންފީޒުކުރުމުގެ މަސައްކަތްވެސް ސަރުކާރުން ކުރަމުންދާ ކަމަށް ވެސް ރައީސް ވިދާޅުވިއެވެ.

މީގެ އިތުރުން މިދިޔަ އަހަރުގެ ޖަނަވަރީ މަހު އަޅުގަނޑުމެން ސެޓެލައިޓް ސްކޫލް ނިޒާމުވެސް ރާއްޖޭގެ ބައެއް ރަށްރަށުގައި ޤާއިމުކޮށް ކިޔަވައިދޭން ފަށާފައިވާ ކަމަށް ރައީސް ވިދާޅުވިއެވެެ. ހަމައެހެންމެ ތަޢުލީމީ ދާއިރާގެ ސިޔާސަތުތައް ރަނގަޅަށް ތަންފީޒު ކުރުމަށްޓަކައި އެ ފަންނުގެ މީހުންނަށް ރަނގަޅު ގޮތްތައް ހަމަޖައްސައިދިނުމަކީ ކުރަންޖެހޭނެ ކަމެއް ކަމަށް ރައީސް ވަނީ ވިދާޅުވެފައެވެެ.

ރައީސް ވަނީ ތައުލީމީ ދާއިރާ ކުރިއެރުވުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވާފައެވެ. އެގޮތުން ވ. އަތޮޅަކީ ރާއްޖޭގެ އެންމެ ކުޑަ އަދި އާބާދީވެސް އެންމެ ކުޑަ އަތޮޅު ކަމަށް ވާއިރު މިދިޔަ އަހަރާ ޖެހެންދެން ވެސް އެ އަތޮޅުގައި މަތީ ސާނަވީއަށް ކިޔަވައިދޭ ސްކޫލެއް ނެތް ކަން ރައީސް ފާހަގަކުރެއްވިއެވެ. އަދި އެ އަތޮޅުގައި މުޅިން އަލަށް މަތީ ސާނަވީއަށް ކިޔަވައިދޭން ފެށްޓީ މި ސަރުކާރުންކަމަށް ރައީސް ވިދާޅުވިއެވެ. އެއާއެކު، ރާއްޖޭގެ ހުރިހާ އަތޮޅެއްގައި މަތީ ސާނަވީއަށް ކިޔަވައިދޭ ސްކޫލްތައް މިހާރު ޤާއިމްވެފައި ހުންނާނެ ކަމަށާއި އެއީ ތާރީހީ ކަމެއް ކަމަށް އެމަނިކުފާނު ވަނީ ވިދާޅުވެފައެވެ. އަމާޒަކީ، ކުދިންނަށް ކިޔަވައިދިނުމުގައިވެސް، އެންމެ އަތޮޅެއްވެސް، އެންމެ ރަށެއްވެސް، އަދި އެންމެ ފަރުދަކު ވިޔަސް ބާކީ ނުކުރުން ކަމަށް ރައީސް ވަނީ ވިދާޅުވެފައެވެ.

ރައީސް އިތުރަށް ވިދާޅުވީ ތަޢުލީމީ ދާއިރާގެ ކުރިއެރުމަށް ކުރަމުންދާ މަސައްކަތަކީ، ދިވެހި ޤައުމުގެ ކުރިމަގަށް އާރޯކަމާއި ފިނިކަން ގެނެސްދިނުމަށް އިންދޭ ހިޔާބޮޑު ގަހެއް ކަމަށް ގަބޫލުކުރައްވާ ކަމަށެވެ. އަދި އެކަމުގެ ނަތީޖާ މިއަދު ނުވަތަ މާދަމާ ނުފެނުނު ނަމަވެސް ކުރިމަގުގެ ޖީލުތައް ހަމަގައިމުވެސް އެ ގަހުގެ މޭވާތައް ބިންނަން ލިބޭނެ ކަމަށް ރައީސް ވިދާޅުވިއެވެ. އެކަމުގެ ސަބަބުން ކުރިއަށް އޮތްތަނުގއި ހުރިހާ ދާއިރާއަކުން ޤައުމުގެ ކުރިމަގާ ހަވާލުވާނެ ހީވާގި، ކެރޭ ދަރިންތަކެއް އުފެދިގެންދާނެ ކަމަށް ރައީސް ވިދާޅުވިއެވެ.