ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ޓީމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީ ކާމިޔާބު ކުރުމުގައި އެމަނިކުފާނުގެ ޓީމު އަތުވާނެ އެއްވެސް މަގެއް ނެތްކަން މިހާރު އެނގޭނެ ކަމަށް އެމްޑީޕީގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވީ ބުރާސްފަތި ދުވަހުގެ ރޭ ރާޅުގަނޑު ސަރަހައްދުގައި ބޭއްވި އެމަނިކުފާނުގެ ކެޕްމޭން ޖަލްސާއެއްގައި ވާހަކަފުޅުދައްކަވަމުންނެވެ. އެގޮތުން، އެ ތަނަށް އެއްވެ ތިބި ފަރާތްތަކަށް އިޝާރާތް ކުރައްވައި އެމަނިކުފާނު ވިދާޅުވީ އެމަނިކުފާނުގެ ޓީމު އޮތީ އެތެރޭގެ ޓްރެކުގައި ކަމަށާއި ޕްރައިމަރީގެ ރޭސް ނިންމާނީ އެމަނިކުފާނުގެ ޓީމުކަން މިހާރު ރައީސް ޞާލިހުގެ ޓީމަށް ވެސް އެނގޭނެ ކަމަށެވެ.
ސިޔާސީ ދުނިޔޭގައި ހަފުތާއަކީ ވަރަށް ގިނަ ދުވަސްކަން ފާހަގަކުރައްވައި ނަޝީދު ވިދާޅުވީ ރައީސް ޞާލިހު ޕްރައިމަރީގައި ވާދަކުރައްވަން ނިންމެވިއިރު އެ އިންތިޚާބު ކާމިޔާބު ކުރުމަކީ ފަސޭހަ ކަމެއް ކަމަށް ހީފުޅު ކުރެއްވި ނަމަވެސް މިއަދު އެގޮތަށް ހީފުޅު ނުކުރައްވާނެ ކަމަށެވެ. އަދި ރައީސް ނަޝީދުގެ ބައްދަލުވުންތަކަށް ނުކުންނަ ފަރާތްތަކަކީ "އަސްލު އެމްޑީޕީ" މެންބަރުންގެ ގޮތުގައި ނަޝީދު ސިފަކުރެއްވިއެވެ.
ރައީސް އިބްރާހިމް މުހައްމަދު ޞާލިހަށް ވެސް އެގިވަޑައިގަންނަވާނެ މިރޭ މިތާ ތިބި މީހުންގެ އަދަދުވެސް، އަދި އަޅުގަނޑު ވެލިދޫއަށް ދިޔައީ ގަލޮޅުން މީހުން ގޮވައިގެންނެއް ނޫން. އަޅުގަނޑު ތުޅާދޫއަށް ދިޔައީވެސް ގަލޮޅުން މީހުން ގޮވައިގެންނެއް ނޫން. އެހެންނަމަވެސް ދާ ކޮންމެ ރަށަކުން އުތުރި އެމްޑީޕީގެ މެންބަރުން އެބައަރާ. ފަތު އަޑު ކިޔާފައި އެމީހުން އެބަ ނުކުމޭ.ރައީސް ނަޝީދު
ރައީސް ނަޝީދު ވިދާޅުވީ 2018 ވަނަ އަހަރު އެމްޑީޕީގެ މެނިފެސްޓޯގައި ވެރިކަން ދެމިގެންދާނީ 18 މަސްދުވަހައްކަން ފާހަގަކޮށްފައިވާނެ ކަމަށާއި ރައީސް ޞާލިހުވެސް ނުކުމެވަޑައިގެން އަނެއްކާވެސް ރައީސް ނަޝީދު ވެރިކަން ކުރާ ދުވަސް ދެކެވަޑައިގަންނަވަން ބޭނުންފުޅުވާކަމަށް ވިދާޅުވި ކަމަށެވެ. ނަމަވެސް މިހާރު އިތުރު ދައުރެއްގެ ވާހަކަފުޅު ރައީސް ދައްކަވާއިރު އަންނަ ދައުރެއްގައި ޤާނޫނު އަސާސީ އިސްލާހު ކުރައްވައި ތިންވަނަ ދައުރެއް އަދި ހަތަރުވަނަ ދައުރެއް ހޯއްދަވަން އުޅުއްވާނެ ކަމާމެދު ކަންބޮޑުވެވަޑައިގަންނަވާ ކަމަށާއި އެ ފުރުސަތު ދީގެން ނުވާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން އެމްޑީޕީން އަދި އެމަނިކުފާނު އަމިއްލަފުޅަށް ވެސް ކަންބޮޑުވަނީ މިއަދު އެޕާޓީގެ ސިޔާސަތުތަކާ ދުރަށް ދާތީ ކަމަށާއި އަދި ޑިމޮކްރަސީގެ އުސޫލުތަކާ ވެސް ޚިލާފުވާތީ ކަމަށް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ އިންތިޚާބުގައި ވާދަކުރައްވާ އެ އިންތިޚާބު ބޮޑުތަނުން ކާމިޔާބު ކުރައްވާނެ ކަމަށް ރައީސް ނަޝީދު އާއި ރައީސް ޞާލިހު ވެސް ގެންދަނީ ވިދާޅުވަމުންނެވެ. އެގޮތުން ރައީސް ޞާލިހު ވިދާޅުވާގޮތުގައި އެމްޑީޕީއަށް މިއަހަރުގެ ރިޔާސީ އިންތިޚާބު ކާމިޔާބު ކުރެވޭނީ އެމަނިކުފާނު ޕްރައިމަރީން ހޮވައިގެންނެވެ.
އެމްޑީޕީގެ ރިޔާސީ ޕްރައިމަރީ އޮންނާނީ މި މަހުގެ 28 ވަނަ ދުވަހުއެވެ.
