މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ އެކިއެކި މަސައްކަތްތައްކުރުމަށް އިންތިޚާބީ މައި މަރުކަޒެއް ހުރުމަކީ ކޮންމެހެން މުހިންމު ކަމެއްކަމަށާއި މިދުވަސްވަރަކީ އިލެކްޝަންސް ކޮމިޝަން(އީސީ)އަށް ޖާގައިގެ ގޮތުން ދަތި ދުވަސްވަރެއްކަމަށް އެކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރިޔާސީ އިންތިޚާބަށް އީސީން ވަމުންދާ ތައްޔާރީތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފުއާދު ވިދާޅުވީ ކުރިން އީސީގެ މަސައްކަތްތައް ހިންގަމުން އައި ބާ ޖަމާލުއްދީން ސްކޫލު އިމާރާތުން ނުކުންނަން ޖެހުމުން ޖާގައިގެ ދަތިކަން ވަރަށް ބޮޑަށް ކުރިމަތިވެފައިވާކަމަށެވެ. އީސީގައި 12 ސެކްޝަން އޮންނައިރު އާންމު ގޮތެއްގައި 4 ސެކްޝަން ނުވަތަ 6 ސެކްޝަން ހިންގަމުން އަންނަނީ އިންތިޚާބީ މަރުކަޒުގައި ކަމަށާއި ނަމަވެސް މިހާރު ހުރިހާ ސެކްޝަނުތަކުގެ މަސައްކަތްތައް ކުރަމުންވެސް އަންނަނީ މައި އޮފީހުގައި ކަމަށެވެ. އެހެންކަމުން ނެތް ޖާގައެއްގައި ހުރިހާ މުވައްޒަފުން މެނޭޖުކުރަމުންދަނީ ތޮއްޖެހިގެން ކަހަލަ ގޮތަކަށްކަމަށް ފުއާދު ވިދާޅުވިއެވެ.
ރިޔާސީ އިންތިޚާބާ ދިމާކޮށް މައި މަރުކަޒެއްގެ ގޮތުގައި ދިވެހިރާއްޖޭގެ އަޑުގެ އިމާރާތުން ބައެއް ހަމަޖެއްސުމަށް ވަނީ ނިންމާފައެވެ. އެކަމާއި ގުޅޭގޮތުން ފުއާދު ވިދާޅުވީ އެކަމުގެ މަޝްވަރާތައް ހައުސިންގ މިނިސްޓްރީ އާއި ފިނޭންސް މިނިސްޓްރީއާ ގުޅިގެން ކުރިޔަށްގެންގޮސްފައިވާކަމަށެވެ. މިމަހުގެ 15 ހިސާބުގައި އަޑުގެ އިމާރާތުގެ ދެކުނު ބައި ލިބޭނެކަމަށް ބެލެވޭކަމަށް ފުއާދު ވިދާޅުވިއެވެ.
ފުއާދު ވިދާޅުވީ އެތަން ލިބުމުން އިންތިޚާބާ ގުޅުން ހުރި މަސައްކަތްތައްކުރެވޭ ފަދަ ތަނަކަށް އެތަން ހެދުމަށްވެސް މަސައްކަތްތަކެއް ކުރަންޖެހޭނެކަމަށެވެ.
އެބަޖެހޭ ބައެއް ފާރުތައް ނުވަތަ ހުރަސްތައް ނައްތާލާގައި ބައެއް ހޯލުތައް ބޮޑުކުރުމާއި ބައެއް ދިމާދިމާލުން ވަކިކުރުން ފަދަ ބަދަލުތަކެއް ގެންނަންޖެހޭ. އެތަނުގެ އިލެކްޓްރިކަލް ވަޔަރިންގ އަށްވެސް ބަދަލުތަކެއް ގެންނަންޖެހޭ.ފުއާދު ތައުފީގު / އީސީގެ ރައީސް
ފުއާދު ވިދާޅުވީ މީގެކުރީގެ އިންތިޚާބުތަކުގައިވެސް އިންތިޚާބީ މައި މަރުކަޒެއް ބޭނުންކުރިކަމަށެވެ. އެގޮތުން ނަސަންދުރަ ޕެލަސް ހޮޓަލް ބޭނުންކޮށްފައިވާއިރު ދަރުބާރުގެއާއި ބާ ޖަމާލުއްދީންވެސް އިންތިޚާބީ މައި މަރުކަޒުގެ ގޮތުގައި ބޭނުންކޮށްފައިވެއެވެ.
މިމަސައްކަތައް ކުރިމަތިލާއިރު ޗާޓުތަކާއި އެނޫންތަކެތިވެސް ބަހައްޓަން ޖާގަ ބޭނުންވާނެ. ކަމާބެހޭ ހުރިހާ ލިޔެކިޔުންތައް ތައްޔާރުކުރުމާއި ބެހެއްޓުމާއި މިހުރިހާ ކަމެއް ޖާގަ ނެތިއްޔާ މަސައްކަތް ނުކުރެވޭނެ. ޖާގަ އޮވެގެން ތަނެއް ލިބިގެން ފުލް ސްޕީޑްގައި މަސައްކަތްތައް ފަށައިގަނެވޭނީފުއާދު ތައުފީގު / އީސީގެ ރައީސް
މިފަހަރުގެ ރިޔާސީ އިންތިޚާބު ބޭއްވުމަށް ހަމަޖެހިފައިވަނީ ސެޕްޓެމްބަރ މަހުގެ ތެރޭގައެވެ. އިންތިޚާބުގެ އެކި ކަންކަމަށް 8000 އޮފިޝަލުން ބޭނުންވާނެކަމަށް ފުއާދު ވިދާޅުވިއެވެ. އަދި 800 ވޯޓު ފޮށި ބަހައްޓަންޖެހޭނެކަމަށް އަންދާޒާކުރެވޭކަމަށް ފުއާދު ވިދާޅުވިއެވެ. މިފަހަރުގެ އިންތިޚާބުގައި ވޯޓުލުމުގެ ހައްގު 280،000 މީހުންނަށް ލިބިފައިވާކަމަށް ފުއާދު ވިދާޅުވިއެވެ.
ރިޔާސީ އިންތިޚާބު ބޭއްވުމަށް، ބަޖެޓުގައި ހިމަނާފައި ވަނީ 90 މިލިއަން ރުފިޔާއެވެ. އީސީން ބުނާގޮތުގައި އެއީ ފުރަތަމަ ބުރު ބޭއްވޭނެހާ ފައިސާއެވެ. ދެވަނަ ބުރަކަށް ގޮސްފިނަމަ 25 މިލިއަން ރުފިޔާ ބޭނުންވާނެކަމަށް ފުއާދު ވިދާޅުވިއެވެ.
