ރިޔާސީ އިންތިޚާބުގައި 280،000 މީހުންނަށް ވޯޓުލެވޭނެ، 800 ވޯޓު ފޮށި ބަހައްޓާނެ
ރިސޯޓުތަކުގައި މަދުވެގެން 50 މީހުން ރަޖިސްޓްރީކޮށްފިނަމަ އެރިސޯޓެއްގައި ވޯޓު ފޮށި ބަހައްޓާނެ
ރިޔާސީ އިންތިޚާބު 2018ގައި މީހަކު ވޯޓުލަނީ
މިއަހަރު ބާއްވާ ރިޔާސީ އިންތިޚާބުގައި ލަފާކުރެވޭ ގޮތުގައި 280،000 މީހުންނަށް ވޯޓުލެވޭނެކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރިޔާސީ އިންތިޚާބަށް އިލެކްޝަންސް ކޮމިޝަން (އީސީ)ން ވަމުންދާ ތައްޔާރީތަކާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ފުއާދު ވިދާޅުވީ، އަލަށް 18 އަހަރު ފުރިގެން ވޯޓުލެވޭ މީހުންގެ އަދަދު ވިއްސަކަށް ހާސް އުޅޭނެކަމަށެވެ. މީގެއިތުރުން މިފަހަރުގެ އިންތިޚާބަށް ރީރެޖިސްޓްރޭޝަނަށް ހުޅުވާލާނެކަމަށް ފުއާދު ވިދާޅުވިއެވެ.
ބައެއް ފަރާތްތަކުން ކައުންސިލު އިންތިޚާބުގެ ވޯޓަރސް ލިސްޓަށް ބެލޭނެކަމަށް ބުނަމުންދާކަމަށާއި، ނަމަވެސް ގިނަ ބައި-އިލެކްޝަންތަކެއް ބާއްވަމުންދާއިރު ވޯޓަރސް ލިސްޓަށް ބަދަލުތަކެއް އަންނާނެކަމަށެވެ. އެހެންކަމުން ރަޖިސްޓްރީވެފައިވާ ތަން ނޫން އެހެންތަނެއްގައި ވޯޓުލުމަށް ބޭނުންވާ ފަރާތްތަކަށް އެފުރުސަތު ހުޅުވާލާނެކަމަށް ފުއާދު ވިދާޅުވިއެވެ.
ރީ-ރެޖިސްޓްރޭޝަނަށް ހުޅުވާލާނީ ޖުލައި ހިސާބުގައިކަމަށް ފުއާދު ވިދާޅުވިއެވެ.
މިފަހަރުގެ އިންތިޚާބުގައި ލަފާކުރެވޭ ގޮތުގައި 800 ވޯޓު ފޮށި ބެހެއްޓޭނެކަމަށް ފުއާދު ވިދާޅުވިއެވެ. ރިސޯޓުތަކުގައި މަދުވެގެން 50 މީހުން ރަޖިސްޓްރީކޮށްފިނަމަ އެރިސޯޓެއްގައި ވޯޓު ފޮށި ބަހައްޓާނެކަމަށާއި، ޖަލުތަކުގައި 25 މީހުން ވޯޓުލާން ރަޖިސްޓްރީކޮށްފިނަމަ ވޯޓު ފޮށި ބަހައްޓާނެކަމަށް އޭނާ ވިދާޅުވިއެވެ.
މީގެއިތުރުން، ރާއްޖެއިން ބޭރު ގައުމުތަކުގައި ވޯޓު ފޮށި ބަހައްޓާނީ އެގައުމެއްގައި ވޯޓުލާން 150 މީހުން ތިބިނަމަ ކަމަށް ފުއާދު ވިދާޅުވިއެވެ. ރާއްޖެއިން ބޭރުގައި ވޯޓު ފޮށި ބަހައްޓާނެ ގައުމުތައް ކަނޑައެޅުމަށްޓަކައި ފޮރިން މިނިސްޓްރީއާއެކު މަސައްކަތްކުރެވެމުން ދާކަމަށް ފުއާދު ވިދާޅުވިއެވެ. އެގޮތުން ގައުމުތަކުގައި ދިރިއުޅޭ މީހުންގެ އަދަދުތައް ހޯދަމުންދާކަމަށް ވިދާޅުވިއެވެ.
ވޯޓު ފޮއްޓަކަށް އެންމެ ގިނަވެގެން ވޯޓުލެވޭނެ އަދަދަކީ 800 ކަމަށް ފުއާދު ވިދާޅުވިއެވެ. އެއަށްވުރެ ގިނަ މީހުން ތިބިނަމަ އެތަނެއްގައި ދެވަނަ ވޯޓު ފޮއްޓެއް ބަހައްޓާނެކަމަށް ވިދާޅުވިއެވެ. މީގެއިތުރުން މާލެއެކޭ އެއްގޮތަށް ހުޅުމާލޭގައިވެސް ކޮންމެ ދާއިރާއަކަށް ވަކިން ވޯޓު ފޮއްޓެއް ބަހައްޓާނެކަމަށް ފުއާދު ވިދާޅުވިއެވެ.
ވޯޓު ފޮށި ބަހައްޓާނެ ތަންތަން ކަނޑައެޅުމުގައި މިހާރުވެސް އެކިއެކި މުއައްސަސާތަކާއެކު ވާހަކަދައްކަމުންދާކަމަށް ފުއާދު ވިދާޅުވިއެވެ.
މީގެއިތުރުން މިފަހަރުވެސް ބޭނުންކުރާނެ ވޯޓު ކަރުދާހަކީ ހައި ކޮލިޓީ، ޑުޕްލިކޭޓް ވޯޓު ކަރުދާސް ނުހެދޭ ފެންވަރުގެ ކަރުދާސްކަމަށް ފުއާދު ވިދާޅުވިއެވެ.
މިއަހަރުގެ ރިޔާސީ އިންތިޚާބު ސެޕްޓެމްބަރ މަހު އޮންނާނެކަމަށް އީސީން ވަނީ ބުނެފައެވެ.
