ނީލަން ފިހާރަތައް ހުންނަ ސަރަހައްދުގައި ހޯމަ ދުވަހުގެ ފަތިހު ހިނގި އަލިފާނުގެ ހާދިސާއަށްފަހު މިހާރު އެ ސަރަހައްދުން ދުންއެރުން ކޮންޓްރޯލް ކުރެވިފައިވާ ކަމަށް އެމްއެންޑީއެފްއިން ބުނެފިއެވެ.

އެމްއެންޑީއެފްއިން ބުނެފައިވާގޮތުގައި ދުންގަނޑު ކޮންޓްރޯލް ކުރެވިފައިވަނީ އަންގާރަ ދުވަހުގެ ހަވީރުއެވެ. އަދި މިހާރު އެ ސަރަހައްދު ވަނީ ފުލުހުންނާ ހަވާލުކޮށްފައެވެ.

އެމްއެންޑީއެފްއިން ކުރިން ބުނެފައިވާ ގޮތުގައި އަލިފާންގަނޑު ފެތުރުނީ ނީލަން ފިހާރައިގެ އުތުރުފަޅިން، އިމާދުއްދީން ސްކޫލާ ދިމާލުންނެވެ. މި ހާދިސާއާ ގުޅޭ ކޯލް ސިފައިންނަށް ލިބިފައިވަނީ ހޯމަ ދުވަހުގެ ފަތިހު 5:43ގައެވެ.

ނީލަން ފިހާރަ ސަރަހައްދުގައި ލަކުޑިއާއި، ދަގަނޑާއި، އަލިފާން ހިފާ ޒާތުގެ އެތައް ބާވަތެއްގެ ސާމާނު ހުރެއެވެ. އެހެންކަމުން އަލިފާން ނިއްވުމުގައި އެމްއެންޑީއެފްގެ ފަޔަރ އެންޑް ރެސްކިޔުއަށް ދަތިތަކާ ދިމާވިއެވެ. މިހާދިސާގައި ފަޔަރ އެންޑް ރެސްކިޔު ސަރވިސްގެ ފަޔަމަނުންނާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ފަޔަރމަނުން ކުރި މަސައްކަތުން، ނީލަން ފިހާރައިގެ އުތުރުގައި އިމާދުއްދީން ސްކޫލާއި ދިމާގައި ފެތުރެމުންދިޔަ އަލިފާން ހެނދުނު 07:35 ހާއިރު ވަނީ ކޮންޓްރޯލް ކޮށްފައެވެ. އަދި ނީލަން ފިހާރައިގެ އިރުމަތިން ފެތުރެމުންދިޔަ އަލިފާން ކޮންޓްރޯލްކުރެވިފައި ވަނީ ހެނދުނު 08:30 ހާއިރުއެވެ.

އަލިފާން ނިއްވާލި ނަމަވެސް އެ ސަރަހައްދުން ބޯކޮށް ދުން އަރަމުން ދިއުމާ ގުޅިގެން އެ ސަރަހައްދުގައި ހުރި ދެ ސްކޫލެއްގެ ކިޔެވުންވެސް ހޯމަ ދުވަހު ވަނީ މެދުކަނޑާލާފައެވެ. ނަމަވެސް އަންގާރަ ދުވަހު އަލުން ދެ ސްކޫލުގައިވެސް ކިޔެވުން ފަށާފައިވާ ކަމަށް އެޑިއުކޭޝަން މިނިސްޓްރީން މައުލޫމާތު ދެއެވެ.

މި ހާދިސާގައި ރޯވި ލޭބަރ ކުއާޓަރތަކުން 299 މީހުން ވަނީ އެހެން ތަނަކަށް ބަދަލުކޮށްފައެވެ. އެތަނުގައި ދިރިއުޅެމުން އައީ ބިދޭސީންނެވެ. ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ން ބުނެފައިވާ ގޮތުގައި މިހާދިސާގެ ސަބަބުން މާލެ ސިޓީ ކައުންސިލުގެ ލޭބަރ ކުއާޓަރއެއް ބޭނުންނުކުރެވޭ ވަރަށް ވަނީ އަނދާފައިކަމަށާއި، ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑްގެ ލޭބަރ ކުއާޓަރއަކަށް ވެސް ދުމުގެ އަސަރު ކުރުމުގެ ސަބަބުން އެތަނުން މީހުން ހުސްކޮށްފައިވާކަމަށެވެ. މާލެ ސިޓީ ކައުންސިލްގެ މުވައްޒަފުން މިހާރު ވަނީ ވަގުތީގޮތުން ހުޅުމާލޭގައި ހުންނަ ކޮވިޑު ފެސިލިޓީއަށް ބަދަލުކޮށްފައެވެ.

އަލިފާނުގެ ހާދިސާ ހިނގި ސަރަހައްދުގައި ދުމުގެ އަސަރު ހުރުމާ ގުޅިގެން ހޯމަ ދުވަހުން ފެށިގެން މާސްކު އަޅައިގެން އެސަރަހައްދުގައި އުޅުމަށް ހެލްތު ޕްރޮޓެކްޝަން އެޖެންސީ(އެޗްޕީއޭއި)ން އިލްތިމާސްކުރިއެވެ. މީގެ އިތުރުން، އަލިފާން ރޯވެ ވަރަށް ބޮޑަށް ދުންގަނޑު ފެތުރުނުއިރު ދުމުން ރައްކާތެރިވުމަށް ގޭގޭގެ ދޮރުތަކާއި ކުޑަދޮރުތައް ބަންދުކުރުމަށްވެސް އެޗްޕީއޭއިން އިލްތިމާސްކުރިއެވެ.