ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރުކަމުން އަހުމަދު ރިޔާޒު އިސްތިއުފާ ދެއްވައިފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އަހުމަދު ރިޔާޒު ފޮނުއްވި އިސްތިއުފާގެ ސިޓީގައި ވިދާޅުވެފައި ވަނީ އިސްތިއުފާ ދެއްވަނީ މިއަހަރު ބާއްވާ ރިޔާސީ އިންތިޚާބުގައި މޯލްޑިވްސް ނެޝަނަލް ޕާޓީ (އެމްއެންޕީ)ގެ ރިޔާސީ ކެންޑިޑޭޓް އަދި އެ ޕާޓީގެ ރައީސް ކާނަލް ރިޓަޔާޑް މުޙައްމަދު ނާޒިމްގެ ކެމްޕެއިންގައި ޢަމަލީ ގޮތުން ބައިވެރިވެ، އެ ކެމްޕެއިންނަށް ވަގުތު ދިނުމަށް ޓަކައި ކަމަށެވެ.
ރިޔާޒު ވަނީ 2018 ވަނަ އަހަރުން ފެށިގެން އެ މަގާމުގައި ހުރެގެން ގައުމަށް ޚިދުމަތް ކުރެއްވުމުގެ ފުރުސަތު ދިން ކަމަށް ޓަކައި ރައީސް ޞާލިޙަށް ޝުކުރު އަދާކުރައްވާފައެވެ.
ޖުމްހޫރީ ޕާޓީގައި ކުރިން އުޅުއްވި، ރިޔާޒް ކުރިން ހުންނެވީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ކަމުގައެވެ. އެ މަގާމުގައި ހުންނަވަނިކޮށް ޖިންސީ ފުރައްސާރައިގެ މައްސަލައެއްގައި ވަޒީފާއިން ސަންޕެންޑުކޮށްފައި ބެހެއްޓުމަށް ފަހު ޓްރާންސްޕޯޓު މިނިސްޓްރީއަށް ބަދަލު ކުރެއްވީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ.
ތުހުމަތު ދޮގު ކުރައްވަމުން ރިޔާޒު ކުރިން ވިދާޅުވެފައި ވަނީ އޭނާ ގާނޫނާ ހިލާފު އެއްވެސް ކަމެއް ނުކުރައްވާ ކަމަށެވެ. އަދި ސިޔާސީ ބޭނުމަށް އަބުރު ކަތިނުލަން އެދިވަޑައިގަތެވެ.
