ނީލަން ފިހާރާގައި ހިނގި އަލިފާނުގެ ހާދިސާ އާ ގުޅިގެން އެމްޓީސީސީން ދެމުންގެންދާ އާރުޓީއެލް ބަހުގެ ޚިދުމަތްދޭ ރޫޓްތަކަށް ބަދަލުތަކެއް ގެނެސްފިއެވެ.
އެކަމާއި ގުޅިގެން އެމްޓީސީސީން ބުނީ ނީލަން ފިހާރާ ސަރަހައްދުގައި ހިނގި އަލިފާނުގެ ހާދިސާ އާ ގުޅިގެން ބޮޑުތަކުރުފާނު މަގުގެ ސަރަހައްދެއް ބަންދުކުރެވިފައިވާތީ ބަހުގެ ޚިދުމަތުގައި ހިމެނޭ ރޫޓް 1 ކަމުގައިވާ ވެސްޓް ޕާކުން ހުޅުމާލެ ފޭސް 1ށް ބަސް ދާ ރޫޓް އަދި ރޫޓް 7 ކަމުގައިވާ ހުޅުމާލެ ފޭސް 2ން ވެސްޓްޕާކުގެ ބަހުގެ ޚިދުމަތަށް ވަގުތީ ގޮތުން ކާނިވަލު ސަރަހައްދަށް ބަދަލުކުރެވިފައިވާކަމަށެވެ. މީގެއިތުރުން ރޫޓް 11 ކަމުގައިވާ އަމީނީ ރޫޓް ވަގުތީ ގޮތުން މެދުކަނޑާލާފައިވާކަމަށް އެމްޓީސީސީން ބުނެއެވެ.
އަމީނީ ރޫޓް މެދުކަނޑާލާފައިވުމާއެކު އޯކިޑް ރޫޓް ބޭނުންކުރާ ކަސްޓަމަރުން އިތުރުވާނެކަމަށް ބެލެވޭތީ އޯކިޑް ރޫޓަށް މިހާރު ބަސް އިތުރުކޮށްފައިވާކަމަށް އެމްޓީސީސީން ބުނެއެވެ.
މީގެއިތުރުން މާލެ އިން ވެލާނާ އިންޓަރނޭޝަނަލް އެއާރ ޕޯޓަށް ދާ ރޫޓުވެސް ބަދަލުތަކަކަށްފަހު އަލުން ފެށުމަށް ހަމަޖެހިފައިވާކަމަށް އެމްޓީސީސީން ބުނެއެވެ. އެގޮތުން ވެސްޓް ޕާކުން ވެލާނާ އިންޓަރނޭޝަނަލް އެއާޕޯޓަށް ދިޔުމަށް ހަމަޖެހިފައިވާ ރޫޓް މިހާރު ފެށުމަށް ހަމަޖެހިފައިވަނީ ދަރުމަވަންތަ ހޮސްޕިޓަލް ބަސް ހުއްޓިންކަމަށް އެމްޓީސީސީން ބުނެއެވެ. އަދި މި ރޫޓުން ދެން ވެލާނާ އިންޓަރނޭޝަނަލް އެއާޕޯޓަށް ދަތުރުކުރާނީ މަޖިީދީ މަގުގެ ބަސް ހުއްޓިތަކަށް މަޑުކުރުމަށްފަހުކަމަށް އެމްޓީސީސީން ބުނެއެވެ.
އެހެންނަމަވެސް ބޮޑުތަކުރުފާނު މަގު އަލުން ހުޅުވާލުމާއެކު ބަހުގެ ރޫޓުތައް އާންމު ހާލަތަށް ބަދަލުވާނެކަމަށް އެމްޓީސީސީން ބުނެއެވެ.
