ދުމުގެ އަސަރު ހުރުމުން ސަމާލުވުމަށް އިލްތިމާސްކޮށްފި
އަލިފާން ރޯވެ ވަރަށް ބޮޑަށް ދުންގަނޑު ފެތުރުނުއިރު ދުމުން ރައްކާތެރިވުމަށް ގޭގެ ދޮރުތަކާއި ކުޑަދޮރުތައް ބަންދުކުރުމަށް އެޗްޕީއޭއިން އިލްތިމާސްކުރޭ
ނީލަން ފިހާރަތައް ހުންނަ ސަރަޙައްދުގައި ހިނގި އަލިފާނުގެ ހާދިސާ
ނީލަން ފިހާރައިގައި ހޯމަ ދުވަހުގެ ފަތިހު ހިނގި އަލިފާނުގެ ހާދިސާއާ ގުޅިގެން އެސަރަހައްދުގައި ދުމުގެ އަސަރު ހުރުމާއެކު މާސްކު އަޅައިގެން އެސަރަހައްދުގައި އުޅުމަށް ހެލްތު ޕްރޮޓެކްޝަން އެޖެންސީ(އެޗްޕީއޭއި)ން އިލްތިމާސްކޮށްފިއެވެ.
މިކަމާއި ގުޅިގެން އެޗްޕީއޭއިން ވަނީ އެ ސަރަހައްދުގައި އުޅޭއިރު އަނގައާއި ނޭފަތް ނިވާކުރުމަށް އިލްތިމާސްކޮށްފައެވެ. އަލިފާން ރޯވެ ވަރަށް ބޮޑަށް ދުންގަނޑު ފެތުރުނުއިރު ދުމުން ރައްކާތެރިވުމަށް ގޭގެ ދޮރުތަކާއި ކުޑަދޮރުތައް ބަންދުކުރުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ. ދުމުގެ ސަބަބުން ނޭވާލާ ނިޒާމުގެ އިތުރުން ހިތުގެ ބަލި ހުންނަ ފަރާތްތަކަށް ކުރާ ނޭދެވޭ އަސަރު ބޮޑުވުން އެކަށީގެންވެއެވެ. އަދި އެއްވެސް މީހަކަށް ނޭވާ ކުރުވެ، ނޭވާލާން އުނދަގޫވެ، ގަދަޔަށް ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަށްވެސް އެޗްޕިއޭއީން ވަނީ އިލްތިމާސްކޮށްފައެވެ.
ދުމުގެ އަސަރު ވަރަށް ބޮޑަށް ހުރުމާއެކު އެތާ ކައިރީގައި ހުންނަ ސްކޫލްތަކުގެ ކިޔެވުން ވަނީ ހޯމަ ދުވަހު މެދުކަނޑާލާފައެވެ.
