އިންޓަނޭޝަނަލް ފެޑެރޭޝަން އޮފް ފުޓްބޯލް ހިސްޓްރީ އެންޑް ސްޓެޓިސްޓިކްސް (އައިއެފްއެފްއެޗްއެސް) އިން ހޮވި 2022 ވަނަ އަހަރުގެ އެންމެ މޮޅު ކުޅުންތެރިޔަކަށް އާޖެންޓީނާގެ ކެޕްޓަން ލިއޮނަލް މެސީ ހޮވިއްޖެ އެވެ.

އައިއެފްއެފްއެޗްއެސް އިން އަހަރުގެ އެންމެ މޮޅު ކުޅުންތެރިޔާގެ މަގާމު އެންމެ ފުރަތަމަ ހޮވަން ފެށީ 1988 ވަނަ އަހަރު އެވެ. ނަމަވެސް ފަަހުން ފީފާގެ އެދުމުގެ މަތިން މެދު އެވޯޑު ދިނުން މެދުކެނޑުމަށްފަހު، އަލުން އެވޯޑު ދޭން ފެށީ 2020 ވަނަ އަހަރު އެވެ. އޭގެ ފަހުން 2020 ވަނަ އަހަރާއި 2021 ވަނަ އަހަރުގެ އެންމެ މޮޅު ކުޅުންތެރިޔަކަށް ހޮވުނީ ޕޮލެންޑުގެ ރޮބާޓް ލެވަންޑޯސްކީ އެވެ. 2022 ވަނަ އަހަރުގެ މޮޅު ކުޅުންތެރިޔާގެ އެވޯޑު މެސީ ހޯދީ ފްރާންސްގެ ކީލިއަން އެމްބާޕޭ އާއި ކަރީމް ބެންޒެމާއާ ވާދަކޮށެވެ. އެންމެ މޮޅު ކުޅުންތެރިޔަކަށް މެސީ ހޮވުނީ 275 ޕޮއިންޓާއެކު އެވެ. މެސީގެ ފަހަތުން އެމްބާޕޭ އަށް 35 ޕޮއިންޓު ލިބުނުއިރު، ބެންޒެމާ އަށް ލިބުނީ 30 ޕޮއިންޓެވެ. އެވޯޑު ކާމިޔާބު ކުރި މެސީ ވަނީ މިދިޔަ އަހަރު އޮތް ފީފާ ވޯލްޑް ކަޕް މުބާރާތް އާޖެންޓީނާއާއެކު ކާމިޔާބުކޮށްފަ އެވެ. މީގެ އިތުރުން އެ މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް މެސީ އެވެ.

އައިއެފްއެފްއެޗްއެސް އިން ހޮވި އަހަރުގެ އެންމެ މޮޅު ކޯޗަކަށް ހޮވުނީ އާޖެންޓީނާ އަށް ވޯލްޑް ކަޕް ކާމިޔާބުކޮށްދިން ލިއޮނަލް ސްކަލޯނީ އެވެ. ސްކަލޯނީ އެ އެވޯޑު ކާމިޔާބުކުރީ ފްރާންސްގެ ޑިޑިއޭ ޑެޝޯމްޕްސް އާއި މޮރޮކޯގެ ވަލީދު ރެގްރަގުއިއާ ވާދަކޮށެވެ. ސްކަލޯނީ އަށް 240 ޕޮއިންޓު ލިބުނުއިރު، ޑެޝޯމްޕްސް އަށް ލިބުނީ 45 ޕޮއިންޓެވެ. އަދި ވަލީދަށް ލިބުނީ 30 ޕޮއިންޓެވެ. ސްކަލޯނީ ވަނީ ފާއިތުވި ދެ އަހަރުގެ ތެރޭގައި އާޖެންޓީނާ އަށް ތިން ތައްޓެއް ކާމިޔާބުކޮށްދީފަ އެވެ. އެއީ 2021 ވަނަ އަހަރުގެ ކޮޕަ އެމެރިކާ މުބާރާތާއި، 2022 ވަނަ އަހަރު ކުޅުނު ފައިނަލިސިމާ އަދި ވޯލްޑް ކަޕެވެ.

މީގެ އިތުރުން އައިއެފްއެފްއެޗްއެސް އިން ހޮވި އަހަރުގެ އެންމެ ޒުވާން ކުޅުންތެރިޔަކީ އިންގްލެންޑުގެ ޖޫޑް ބެލިންހަމް އެވެ. އެންމެ މޮޅު ގޯލް ކީޕަރަކީ ބެލްޖިއަމްގެ ތިބައޫ ކޯޓުއާ އެވެ.