މަހުގެ އަގެއް ނުއުފުލުނު، ހިތާމަކުރަން: ނަޝީދު

އަދިވެސް މަހުގެ އަގު ނުއުފުލޭތީ ހިތާމަކުރައްވާކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ ދ. މީދޫގައި ކުރިއަށްގެންދިޔަ އެމަނިކުފާނުގެ ކެމްޕެއިން ޖަލްސާގައި ވާހަކަފުޅުދައްކަވަމުންނެވެ. ރައީސް ނަޝީދު ވިދާޅުވީ 2008 ވަނަ އަހަރު އެމްޑީޕީގެ ފުރަތަމަ ވެރިކަން އުފެދިގެން އައިއިރު އެސްޓީއޯއިން ކަޅުބިލަމަސް ކިލޯއެއް ގަންނަމުންދިޔައީ 2.50 ރުފިޔާއާއި 6.50 ރުފިޔާއާ ދޭތެރޭގައި ކަމަށެވެ. އެއަށްވުރެ މައްޗަށް އަގު ނާރާނެ ކަމަށެވެ.

ރައީސް ނަޝީދު ވިދާޅުވީ ރޯމަހަކީ އަގުހެޔޮ އެއްޗެއް ކަމަށާއި، އެހެންނަމަވެސް ބާނާ މަހުގެ 70 އިންސައްތަ އެކްސްޕޯޓުކުރަނީ ރޮލާ ކަމަށް ވިދާޅުވިއެވެ. މީގެ ބަދަލުގައި އެ މަސް ޕްރޮސެސްކޮށްފިނަމަ އޭގެ އަގު އެތައް ގުނައަކަށް އަރައިގެންދާނެ ކަމަށް ވިދާޅުވިއެވެ.

ރައީސް ނަޝީދު ވިދާޅުވީ އެމްޑީޕީން ސިޔާސަތެއްގެ ގޮތުގައި ހުށަހެޅީ ރަށްރަށުގައި މަސް ބަންދުކުރެވޭނެ ގޮތް ހެދުމަށް ކަމަށެވެ. މަހުގެ އަގު އުފުލިގެންދާނީ އެ މަސް ޕްރޮސެސްކުރުމަށްފަހު އެކްސްޕޯޓުކޮށްގެން ކަމަށާއި، އެހެންނަމަވެސް އެކަން އެގޮތަކަށް ނުކުރެވޭކަމަށް ވިދާޅުވިއެވެ.

މަސް ޕްރޮސެސްކުރެވޭނެ ގޮތްތައް ފަހިކުރުމުގެ ބަދަލުގައި ސަރުކާރުން އަނެއްކާވެސް ގަސްތުކުރީ މިފްކޯގައި ރޯމަސް ރައްކާކުރާ ޖާގަ ބޮޑުކުރުމަށް ކަމަށް ރައީސް ނަޝީދު ވިދާޅުވިއެވެ. އެހެންނަމަވެސް އަދިވެސް މި ޖާގަ ބޮޑުކުރެވިފައިނުވާ ކަމަށާއި، ގޭދޮށު މަސް ޕްލާންޓުތަކެއްވެސް ހެދިފައިނުވާކަމަށް އެ މަނިކުފާނު ވިދާޅުވިއެވެ.

މިގޮތަށް މަސް ޕްރޮސެސް ނުކޮށް ރޯ މަހުގެ ގޮތުގައި މަސް އެކްސްޕޯޓުކުރާނަމަ ތަނަވަސް މުޖުތަމައަކަށް މި މުޖުތަމައު ބަދަލެއް ނުވާނެ ކަމަށް ރައީސް ނަޝީދު ވިދާޅުވިއެވެ. މި 5 އަހަރަކީ ތަނަވަސް މުޖުތަމައަކަށް ބަދަލުވާނެ 5 އަހަރެއް ކަމަށް ހިތުލައިގެން ހުންނެވި ކަމަށާއި، އެހެންނަމަވެސް އެކަން އެގޮތަށް ނުވާކަން ރައީސް ނަޝީދު ފާހަގަކުރެއްވިއެވެ.