މާލޭ ލީގު: ވިކްޓްރީ އާއި އީގަލްސް ބައްދަލުކުރި މެޗު އެއްވަރުވެއްޖެ

މާލޭ ލީގުގައި ވިކްޓްރީ ސްޕޯޓްސް ކްލަބް އާއި ކްލަބް އީގަލްސް ބައްދަލުކުރި މެޗު އެއްވަރުވެގެން ނިމިއްޖެ އެވެ.

ބުދަ ދުވަހު ހަވީރު ކުޅުނު ވިކްޓްރީ އަދި އީގަލްސް ބައްދަލުކުރި ފޯރިގަދަ މެޗު އެއްވަރުވީ 0-0 ގެ ނަތީޖާއިންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންގޮސްފައިވާއިރު، ފުރަތަމަ ހަމަލާ އުފެއްދީ އީގަލްސް އިންނެވެ. އެގޮތުން އީގަލްސްގެ އިބްރާހިމް އައިސަމް ފޮނުވާލި ހަމަލާ ކާމިޔާބެއް ނުވިއެވެ. އޭގެ ފަހުން ވިކްޓްރީގެ ބިދޭސީ ކުޅުންތެރިޔާ މުސްތަފާ ސެޑިކް އަށްވެސް ވަނީ ލީޑު ނެގުމަށް ފުރުސަތެއް ލިބި ބޭކާރުވެފައެވެ.

ދެވަނަ ހާފްގައި ދެޓީމުގެ ފަރާތުންވެސް މާ އެދެވޭ ކުޅުމެއް ފެނިގެންގޮސްފައިނުވާއިރު، ލަނޑު ޖެހުމަށްވެސް މާގިނަ ފުރުސަތުތަކެއް ލިބިފައެއްނުވެއެވެ. އެހެންނަމަވެސް އީގަލްސްގެ ރިޒްވާން އަށް ދެވަނަ ހާފްގައިވެސް ލީޑު ނެގުމަށް ފުރުސަތުތަކެއް ލިބި ވަނީ ބޭކާރުވެފައެވެ.

މެޗަށްފަހު ވާހަކަދައްކަމުން ވިކްޓްރީގެ ކޯޗު އަލީ ސުޒެއިން ބުނީ އީގަލްސް އަތުން ޕޮއިންޓެއް ލިބުމުން ހިތްހަމަޖެހޭ ކަމަށާއި، ހުރިހާ ޝުކުރެއްވެސް އޭނާ އަދާކުރަން ބޭނުންވަނީ ކުޅުންތެރިންނަށް ކަމަށެވެ.

އެގޮތުން އޭނާ ބުނީ މުސާރަ ނުލިބޭތީ ކުޅުންތެރިންގެ މޯޓިވޭޝަނަށް އަސަރުކޮށްފައިވާ ކަމަށާއި، އީގަލްސް ކަހަލަ އޯގަނައިޒް ފުޓުބޯޅައެއް ކުޅޭ ޓީމަކާ ދެކޮޅަށް ޕޮއިންޓެއް ލިބުމަކީ އުފާވާ ކަމެއްކަމަށެވެ.

މެޗަށްފަހު ވާހަކަދައްކަމުން އީގަލްސްގެ ކޯޗު އިހުސާން އަބްދުލްޢަނީ ސާންތި ބުނީ ރޯދަމަހަށްފަހު ހަވީރު ކުއްލިއަކަށް މެޗެއް ކުޅެން ޖެހުމުން އޭގެ އަސަރު ކުޅުންތެރިންނަށް ކޮށްފައިވާ ކަމަށާއި، އެގޮތުން ޓީމުގެ ބައެއް ސީނިއާ ކުޅުންތެރިންނަށް މެޗުގައި ރަނގަޅަށް ނުކުޅެވުނު ކަމަށެވެ.

މި ނަތީޖާއާއެކު 15 ޕޮއިންޓާއެކު ވިކްޓްރީ ފަސް ވަނަ އަށް ޖެހިލާފައިވާއިރު، 17 ޕޮއިންޓާއެކު ހަތަރު ވަނައިގައި އޮތީ ކްލަބް އީގަލްސް އެވެ.