ހިޔާ ފްލެޓުތަކުގެ ކުލި ބޮޑު، ކުލި ދެއްކުމަށް އެހީއެއް ދިނުމަކީ ސަރުކާރަށް ކުރެވެން އޮތް ކަމެއް: ނަޝީދު
4 ޖެނުއަރީ 2023 | ބުދަ 14:32ބޯހިޔާވަހިކަމެއް ލިބުމަކީ މާލެ ސަރަޙައްދުގައި ދިރިއުޅޭ މީހުންނަށް ލިބޭނެ ވަރަށް ބޮޑު ނަސީބެއް
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސް ނަޝީދު ވަނީ "ހިޔާ" މަޝްރޫއުގެ ފްލެޓްތަކުގެ ސަރަހައްދަށް ވަޑައިގެންފައި
ހިޔާ ފްލެޓުތަކުގެ ކުލި ބޮޑު ކަމަށާއި، ކުލި ދެއްކުމަށް އިތުރު އެހީއެއް ދިނުމަކީ ސަރުކާރަށް ކުރެވެން އޮތް ކަމެއްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ބުދަ ދުވަހު ރައީސް ނަޝީދު ވަނީ "ހިޔާ" މަޝްރޫއުގެ ފްލެޓްތަކުގެ ސަރަހައްދަށް ވަޑައިގެންފައެވެ. އެހެންނަމަވެސް، އެ ސަރަޙައްދުގައި ދިރިއުޅޭ ބައެއް ފަރާތްތަކުން ވަނީ އެއްވުމުގައި އަޑުގަދަކޮށް، ހަމަނުޖެހުން އުފައްދާފައެވެ.
އެ ހަމަނުޖެހުންތަކުގައި ބައެއް ފަރާތްތައް ފުލުހުންގެ ބެލުމުގެ ދަށަށްވެސް ގެންގޮސްފައިވާއިރު، ފަހުން ރައީސް ނަޝީދުވެސް ވަނީ އެ އިވެންޓު ދޫކުރައްވައި އެ ސަރަޙައްދުން ވަޑައިގެންފައެވެ.
އެ ސަރަޙައްދުން ވަޑައިގެންނެވުމުގެ ކުރިން ސަޕޯޓަރުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ނަޝީދު ވިދާޅުވީ، ބޯހިޔާވަހިކަމެއް ލިބުމަކީ މާލެ ސަރަޙައްދުގައި ދިރިއުޅޭ މީހުންނަށް ލިބޭނެ ވަރަށް ބޮޑު ނަސީބެއް ކަމަށާއި، މާލެ ސަރަޙައްދުގައި އުޅޭ މީހުން ދިރިއުޅެމުންދަނީ ވަރަށް ބިކަ ހާލުގައި ކަމަށެވެ.
އޭރުވެސް އިދިކޮޅު ފަރާތްތަކުން ގެންދިޔައީ އެ ސަރަޙައްދުގައި އަޑުގަދަކުރަމުންނެވެ.
ހިޔާ ފްލެޓުތަކަށް އަލިއަޅުވާލައްވާ ރައީސް ނަޝީދު ވިދާޅުވީ، އެތަނުގެ ކުލި ބޮޑު ކަމަށެވެ. އެހެންނަމަވެސް ބޯހިޔާވަހިކަމެއް ލިބުމަކީ ކޮންމެ މީހަކަށްވެސް ލިބިގެންދާ ނަސީބެއްކަމަށް ރައީސް ނަޝީދު ވިދާޅުވިއެވެ.
ފްލެޓުތައް އަޅާފައިވަނީ ބޮޑު އަގުގައިކަން ފާހަގަ ކުރައްވައި ރައީސް ނަޝީދު އިތުރަށް ވިދާޅުވީ، ފްލެޓުތަކުގެ ކުލި ބޮޑުވެފައިވަނީ އެ ސަބަބާހުރެ ކަމަށެވެ.
ދައުލަތުގެ އެންމެ ބޮޑު ދަރަންޏެއް ހިއްސާ ކުރަނީވެސް ހުޅުމާލެއިންކަމަށް ރައީސް ނަޝީދު ވިދާޅުވިއެވެ. އެގޮތުން ދަރަނި އަނބުރާ ދެއްކުމަށްޓަކައި ޓެކްސް ބޮޑު ކުރަން ޖެހިފައިވާ ކަމަށާއި، ދަރަނި އަނބުރާ ދެއްކުމަށް އެ ގޮތްގޮތުން ފައިސާ ހޯދަން ޖެހިފައިވާކަމަށް ރައީސް ނަޝީދު ވިދާޅުވިއެވެ.
އޭގެ އިތުރުން، އިމާރަތް ކުރަން ބޭނުންކުރާ ތަކެތީގެ އަގު ބޮޑުވުމުގެ ސަބަބުންވެސް އިމާރަތްތަކުގެ ކުލި ބޮޑުވުމަށް މެދުވެރިވާކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވާ ގޮތުގައި ހިޔާ ފްލެޓުތަކުގައި އުޅޭ މީހުންނަށް މި ވަގުތު އޮތް އެންމެ ބޮޑު އެއް ތަކުލީފަކީ އާމްދަނީ މަދުވުމާއި، ތަކެތީގެ އަގު ބޮޑުވުމާއި، އެކަންކަމުގެ ސަބަބުން ދިރިއުޅުމަށް ދިމާވާ ހާސްކަމެވެ.
އެ ކަންކަމުން އަރައިގަތުމަށްޓަކައި ކުލި ދެއްކުމުގައި އިތުރު އެހީއެއް ދިނުމަކީ ސަރުކާރަށް ކުރެވެން އޮތް ކަމެއްކަމަށް ރައީސް ނަޝީދު ވިދާޅުވިއެވެ. އަދި އެއީ އެމްޑީޕީގެ ދެން އަންނަ ސަރުކާރެއްގައި ކޮންމެހެން ކުރަން ޖެހޭ ކަމެއްކަމަށްވެސް ރައީސް ނަޝީދު ވިދާޅުވިއެވެ.
